عايش... ولكن !!!!
انا كنت محتار اكتب فى اى موضوع
بس فى الاخر قولت اهو افضفض معاكوا واللى يطلع بقا يطلع
طبعا كلنا شايفين اللى بيجرا فى البلد اليومين دول والله بجد الواحد مش عارف ايه اللى فاضل وحش وما اتعملش فى البلد
وفى وسط كل ده يقولولك ما شربتش من نيلها ههههههههههههه لا والله طيب علشان نشرب من نيلها كويس بقا
دى معارضه للاغنيه بتاعة شرين
بلدنا مبتش لينا والكلام ده بقاله سنين
تايهين على طول ضايعين واحنا مستسلمين
مهربتش من جيشها؟؟!! طيب من طوابير عيشها
طب دقت فى يوم اللحمه ولا العضم فى قراقيشها
مشفتش مجاريها ؟؟!!! طيب موقعتش فيها
ولا ليك مسئوول او واسطه علشان تعرف تتعين بيها
دور جواك تلقاها هى الزل وهيا القهر
مصر بلدنا حضاره وحجاره وفراعنه ونهر
يمكن راضى لانك فيها زى الطور راسك فى سواقيها
بس اللى مجرب وفارقها قال والله ما هرجع ليها
*****************************
اظن دى اللى مفروض تتغنى مش كلام الانشا اللى بيقولوه ده
المهم انا سمعت ان فى اضراب مدنى يوم 6/4
تفتكروا ممكن يحصل
اعتقد ان الشعب مش متعود انه يعمل اضراب والشعب سلبى اصلا
آآآآه صحيح كنت هنسى
سمعتوا عن موضوع هولندا
الاخ النائب اللى فى البرلمان الهولندى اللى عمل سريط فيديو مسىء جدا للقرآن
يعنى مكفاهمش الرسول دخلوا على القرآن كمان
ياجماعه ده ايميل الخارجيه الهولنديه ياريت نعمل حاجه ايجابيه بقا
buza@postbus51.n1
ياريت نبعت ع الميل ده نعرفهم اننا غضبانين جدا من اللى بيحصل ده
يمكن يحسوا على دمهم
يلا اهو حتى يبقى عملنا تقدم شويه بدل ماحنا حاطين ايدينا على خدنا كده
ونستفيد شويه من النت بدل ماحنا قاعدين نشيت ليل نهار
وعجبى!!!!!