عايش... ولكن !!!!
ااول تاااج فى حياتى التدوينيه برغم داخل على سنتين تدوين
طبعا بشكر اللى اهدتلى اول تاج وهيا oRiGiNaL HeArT نبتدى بقا عدوا معايا 1.........2..........3 هههه


بدأت تدون من امتي ؟ و دخلت العالم ده ازاي ؟
انا عملت المدونه فى يناير 2007 لكن بدأت ادون فيها فى فبراير 2007 دخلت بقا ازاى ... دخلت برجليا اليمين طبعا وبارادتى ههههههه..... انا كنت دايما الاقى اخويا الكبير بيفتح صفحه كده عليها صور ليه وحاجات بيكتبها عليها فكنت مفكر انه موقع هو عامله فجيت فى مره فتحته لقيت انى ممكن اعمل الصفحه دى ومشيت وراها لغاية ما عملتها وسيبتها فاضيه فتره وبعدين عرفت ان فى حاجه اسمها مدونات وتدوين وحاجات كده فبدأت اكتب شوية بشويه فيها يعنى كل شهر مره وممكن كل شهرين ومكنتش بتابع مدونات خالص لغاية ما قولت اقلب شويه فى المدونات لقيت العالم نفسه شدنى وبدأت ادخل شويه بشويه فى عالم التدوين وادينى معاكوا ههههه

ايه كان انطباعك في البداية ؟

انطباعى زى ما قولت كنت فى الاول اهى صفحه مرميه بحط عليها شوية حاجات للزكرى وخلاص ههههههههه بس بعد ما دخلت فى عالم التدوين وبدأت اقرا مدوناتكوا لقيت انه عالم مختلف خالص واتشديت ليه

مين اكتر واحد بتهتم بتعليقه علي بوستك الجديد ؟
كنت الاول ممكن ابقى مستنى تعليق من حد معين يعنى علشان اشوف رايه ايه لكن بعد كده لقيت ان كل واحد او واحده ووجهة نظرهم فى اللى انا كاتبه مهمه بالنسبالى جدا لانى بتعلم من كل تعليق وبحاول انى استفيد منكوا

ايه أهم حاجة اتعلمتها من عالم التدوين ؟

اتعلمت حاجات كتير ممكن اقولكوا منها شوية حاجات لانى مش هقدر احصر كل الى اتعلمته يعنى مثلا اتعلمت انى اقرا كل حاجه للاخر ههههههه اصل اقولكوا على سر ههههههه ولا هتفضحونى ههههههه انا الاول كنت لما ادخل عند حد فى مدونته كنت اقرا كلمتين فى اول الموضوع وكلمتين فى نصه وكلمتين فى اخره واعرف مجمل الموضوع ايه وكده قشطه جدا وكول يا مان وادخل اديله كلمتين زى الفل وعلى كده لكن بعد فتره قولت طيب وانا بتعب نفسى ليه واروح ازور حد فى مدونته واقوله الكلمتين دول طيب هو معقول مستنى منى ده طيب ما تحاول تقرى الموضوع كله يمكن تستفيد وبالفعل بدأت اقرى كل موضوع لاخره وبجد لقيت ان كده بستفيد اوى صحيح ساعات بتطلع مواضيع ملهاش لازمه بس المعظم بيبقى يفيدنى جدا ده غير انى اتعملت انى اتقبل النقد وحاول احسن من نفسى وبصراحه لما بكتب حاجه خاصه بيا بحب اوى اللى يدخل يقولى لو كانت كده تبقى احلى يعنى بحس انه كده يفيدنى اكتر ومحدش طبعا بيتعلم بالساهل

ايه أكتر حاجة كرهتها ؟

من ناحية كرهت فموصلتش لحد الكره بس فى حاجات ضايقتنى شويه يعنى ممكن اقولكوا كام حاجه
الناس اللى لما تقرا موضوع معين وعلشان عاوزه ترد رد مش كويس بدل ما ترد باسمها تلاقيها عامله رد مهزء شكلها ومكتوب مكان اسمها غير معروف ..... طيب مدام انت يعنى جرىء كده طيب مش تعرفنى انته مين علشان لو مش فاهم وجهة نظرى افهمك
وكمان بردو لما دخلت مره فى احدى المدونات بتاعة واحده عماله بتتكلم عن حاجات معجبتنيش قولتلها رأيي بصراحه قام رأيي معجبهاش قامت قالت كلام عليا ومش ده بقا اللى ضايقنى اللى ضايقنى اكتر ان فى بعض المدونين اللى بيزورونى كانوا بيزوروها وعاجبهم نظامها وجرحوا فيا وانا مقولتش لحد فيهم كلمه تضايقهم حتى ولا حتى صاحبة المدونه دى
وكمان انى ادخل الاقى تعليق من حد تلاقيه كاتبلك زى الفل وتمام وكلمتين فى الهجاص وخلاص .... هو اللى انا كنت بعمله زمان بيطلع عليا ولا ايه ههههههههههههههه اصل معنى الكلمتين دول انه مقراش الموضوع وحب يقولى انى جيتلك اهو ههههه زى ما كنت بعمل زمان انا توبت خلاص ومبقيتش بعمل كده ههههههههه ياريت بقا اللى لسه بيعمل كده ياخد بنصيحتى بجد هتتعلم كتير

حاسس ان التدوين له تأثير ؟
اكيد طبعا ومعتقدش انى لوحدى انا اللى حاسس ان التدوين له تأثير واللى مش حاسس بكده المفروض ميدونش لانه المفروض ميكملش فى حاجه مش مقتنع بيها التدوين عامة له كذا تأثير على الشخص اللى بيدون وعلى اللى بيقراله وحاليا بقا ليه تأثير على المجتمع او ع الاقل عامل شوية وش للناس اللى واكله البلد واهو زى ما بيقولوا العيار اللى مبيصبش يدوش ده غير انى معظم اللى عرفتهم فيه بجد ناس كويسه جدا وعقليات تستحق الاحترام

تهدى التاج لمين ؟
mero-moory
Angel
PrInCeSS BeRy
fire bird
سنووايت
كوارث
appy
نور الدين
Eng \ Ayman
وكل حد حابب انه يجاوب على التاج ده

27 تعليقات
  1. appy Says:

    نيهاهاها ولا اعرفك ولا شوفتك ولا قريت لك قبل كده
    ههههههههههههه
    انا ادبس لااااااااا كلا البته لن اقبل بهذا او ذاك يا ابنى انا فضيحه اساسا فى لسانى عاوزنى اعترف على نفسى زيك لااااااا
    بس بجد انت شجاع علشان اتكلمت بصراحه
    الله ينور عليك ويخفض فاتورة الكهرباء بتاعتكم هههههههههه


  2. صفاء Says:

    دة مش تاج يا ابنى انت فضحت نفسك
    طب كنت لم لسانك دة شويه وبلاش الفضايح بتاعه بدخل واقرى كلمتين والطلع اى تعليق واخرج دة انت هتاخد فى عضمك كلاااااام لما تشبع
    وكلام فى سرك انا من النوع اللى مش عامله مدونه عشان حد يدخلها او يسبلى تعليق بس انا بفضفض لنفسى وبكلم روحى حد بقى دخل وشاف العك دة وعجبه وسابلى كلميتن حلوين يبقى رضى ويشكر اوى على كدة
    تاج حلو وصريح
    تحياتى


  3. appy
    هههههههه هيا بقت كده بتبيعينى فى اول محطه
    ماشى نردهالك فى التيجان هههههههه
    ...........................
    صفاء
    انا اتكلمت عن حاجات كنت بعملها لكن حاليا خلاص الموضوع مبقاش كده خالص انا بقيت بقرا الموضوع من اول كلمه لاخر كلمه حتى لو كان طويل ولو مش هقدر اكمل قرايه هقول لصاحب المدونه انى مكملتش وهكمل بعدين اصل اموضوع مش مستاهل يعنى
    نورتينى يا صفاء


  4. هههههههههه
    كلمتين فى الاول وكلمتين فى النص
    وجاى على نفسك ليييييه
    ما كان كفاية العنوان
    هههههههه
    ..........
    بتدون من شهر فبراير 2007 ودة اول تاج ليك
    ياااااابختك-وش بيؤر-
    انا من شهر مايو 2008 وجاوبت اربع تاجات وعايا لسة تلاتة فى المحفظة والله اعلم بالبااقى
    ..........
    يعنى انا حاسة ان التدوين اثر فيك وف تفكيرك شوية
    انا معرفكش قبل كدة
    بس لما يعودك تقرا البوست لاخره وان مكنتش بتعمل كدة يبقى علمك الصبر وحب الاطلاع وكدة
    اجاباتك حلوة ومرسي على اهتمامك بالتاج
    :)


  5. EMMY BABY Says:

    ههههههههههههه

    مش عارفة ليه حاسة ان زرار الهاء معلق معاك
    ههههههههه

    لا متزعلش انا بهزر والله

    بجد عجبتنى اجابتك انا بحب الاجابات الصريحة جدا

    اورجانيل هارت انتى بعتى التاج ده للمدونين كلهم ولا ايه

    يابختك حليته ادعيلى احله ههههههه

    تحياتى

    ايمى


  6. fire bird Says:

    انا الاول كنت لما ادخل عند حد فى مدونته كنت اقرا كلمتين فى اول الموضوع وكلمتين فى نصه وكلمتين فى اخره واعرف مجمل الموضوع
    =================================
    تصدق انا عملت كده عندك دلوقتى
    ههههههههههههههههههه
    بحييك على الصراحة الجامدة دى

    دا انا على كده مش هصدق اى تعليق تسيبهولى

    هههههههههههه

    بس انت اتغيرت الحمد لله

    وشكرا على التاج

    هجاوبه فى شهر رمضان ان شاء الله

    ---------------
    ملحوظة( انا قريت البوست كله )


  7. هاى رمضان كريم كل سنة وانت طيب

    اخبارك اية يارب تكون تمام

    تاجك زى العثل وعرفتنا عنك كل حاجة مقلتش انت بتاكل اية لية هههههههههه

    بس اسئلة جامدة

    وميرسى بجد انك اهدتنى التاج ومعلش هتاخر عليك شوية بعد رمضان ان شاء الله اجاوبة علشان الفترة اللى جية مشغولة شوية اوعا تزعل بس اول ما هجاوبة باذن الله هاجيلك على طولللللللل

    وربنا يخليك تسلم


  8. enjy Says:

    ازييييييييييييييك والنعمة واحشنى اجاباتك جميلة بس ايه الضحكة الشريرة اللى كل شوية تضحكها دى؟؟؟؟
    بس اكتر حاجة عجبتنى لما فضحت نفسك والله جرىء يا واد لا الله ينور عليك


  9. التاج جميل اوى ع فكرة يخليك تراجع كل اللى عملتة واللى ايتفدتة وتقيم التجربة بواقعية مش مجرد ايام وبوستات وتعدى

    مستغربة اوى انو اول تاج فعلا

    سنتين يارااجل واول تاج لسة

    عموما عادى البلوجر الصح اللى يمشى ف طريقة التدوينى ولا يلتفت وراؤة

    منورنى دائما

    بيس


  10. اجاباتك جميله أوى

    وربنا يبارك فيك

    ويجعله فى مزان حسناتك

    تحياتى


  11. Amgad Says:

    لذيذ اوي موضوع كلمتين في الاول
    وكلمتين في النص
    وكلمتين في الاخر
    كلنا كنا كده
    بس علي فكرة في مواضيع اساسا
    من العنوان الواحد
    مش بيرضي يقراها
    خالص تحياتي


  12. السلام عليكم

    مدونتك عسولة قوى ولذيذة

    يلا ربنا يوفقك ياباشمهندس

    ههههههه بس انت كده كشفت نفسك يلا خير

    سلااااااااااااام


  13. ههههه
    المهم انك بطلت الحركات بتاعة انك تثبت حضور وبقيت تقرا الموضوع للاخر
    انا لو بدأت فى موضوع وفى اوله حسيت انى متفاعله معاه مش بكمل ولا بعلق اصلا
    مبروك سنتين تدوين عقبال الميه ان شاء الله

    تحياتى


  14. هااااااااااااااااى ازيك يا عثل

    انا قلتلك هاخد التاجج بس مش دلوقتى مش مش هدخل عندك تانى ههههههههه يا ساتر عالنية الوحشة يا ساتر بلاش النية دىىىىىىىىى


  15. اكتر حاجة لفتت نظرى صراحتك الشديدة و ان الكلام كانوا بيرشق كدا فى الواحد

    اللى عاجبنى اكتر و اكتر
    الهدوء العجيب فى اجاباتك

    مبسوطة جدا بزيارتك اللى خلتى ازورك

    تشااااااااااااووووووووووو


  16. Lady E Says:

    بجد المدونة جميلة جدا

    قرأت شوية فيها ولسه الباقي أكيد هقرأه

    مبروك عليك التاج والف مبروك لأخوك

    وكل سنة وانتا طيب


  17. بصراحة اجابتك فى صدق
    وشفافية جميلة
    ربنا يوفقك يارب


  18. رضوى Says:

    اجابات موفقة:)


  19. مدونه جميله

    وبوست اجمل

    واجباتك تنم عن شخصيتك الجميله

    الى الامام

    :)


  20. اولا
    عجبني اوي اللي اتعلمته من التدوين

    بس انت قابلت مشاكل كتير كده الحمد لله مقابلتاش

    بس ممكن انصحك نصيحه لو قريت حاجه معجبتكش قول رايك بس مش بطريقه تضايق صاحب لمدونه واعتبر نفسك مكانه

    والصح ان كلنا نحترم اراء بعض بس باحترام

    تحياتي


  21. Angel Says:

    كل رمضان و أرواحكم البيضاء بخير
    اللهم أجعل في قلوبنا نوراً يضيء ظلمة الليالي برضاك عنّا ,
    و أجعل في أجسادنا هِمَمٌ تحتوينا فترتقي بنا نحو عفوك ” آمين ”

    كل سنة وأنت طيب

    وشكراً على التاج وبإذن الله تعالى هنزله بس بعد رمضان لو تسمحلي؟

    أختك في الله
    Angel


  22. حبيبى اسف على التاخير
    تاجك جامد جدا واحلى حاجة عجبتنى فيه
    هو رايك فى الحاجات اللى بتضايقك لانها نفس الحاجات الى بتضايقنى ان حد يدخل بغير معروف يخبط او ان حد يقول تسلم ايدك بوست هايل انت كاتب رائع افهم على طول ساعتها انه مقراش ولا كلمة
    ..
    وطبعا ميرسى على التدبيسة ثصدى على التاج
    واعدك انى اعمله فى اقرب فرصة ان شاء الله
    تحياتى
    انت هايل انت فظيع انت جامد انت محصلتش ههههههه فاهمنى طبعا
    ..
    تحياتى
    نور الدين محمود


  23. mthlykaweyy Says:

    هاى ازيك

    انا كنت بمدونه تامر نبيل وشوفتك ودخلت بالصدفه اتفجاءت انك من المنصوره بلدى وانك كليتى هندسه
    وكمان بلوجك جميل وبقالك سنتين ومعرفكش ازاى انا بقالى سنه ونصف تقريبا بدون هنتظرك تزورنى بمدونتى

    بس متتاخرش
    تحياتى ومزيد من الاستمراريه


  24. انا مستغربه جدا

    سنتين ومحدش لسعك بتاج

    مبروك ياعم اولا

    رمضان كريم ثانيا

    ثالثا م الواضح ان تجربة التدوين مميزه عندنا كلنا

    وانا متضامنه معاك فيما تحب وتكرهه

    ماعدا حاجه واحده

    احيانا بيبقى ف بوستات تقراها

    بس مش عارف فعلا غير تقول جامد جدا

    ههههههههههههه بيبقى كلام ملوش حل يعنى

    تحياتى وعؤبال التاج القادم


  25. oRiGiNaL HeArT
    شوفتى بقالى سنتين وده اول تاج
    يعنى انتى دخلتى التاريخ من اوسع ابوابه هههه لانك اول واحده تدينى تاج
    منورانى دايما
    ..................
    EMMY BABY
    انا زرار الهاء معلق معايا طيب هههههههههههههههههه اهو علق اهو
    الصراحه مفيش احلى منها
    ..................
    fire bird
    متأكد انك قريت البوست كله هههههه
    ..................

    PrInCeSS BeRy
    انا باكل زيكوا بالظبط بشر عادى يعنى هههه
    نورتى المدونه
    ....................
    enjy
    معلش بقا يا انجى انا بحب الضحك زى عنيا وعلى فكره ضحكتى لازم تكون من قلبى ( يعنى مش شريره ولا حاجه )
    نورتينى
    ................
    دعاء مواجهات
    انا الحمد لله بتعلم كل يوم جديد وبحاول احسن من نفسى
    يارب نتواصل دايما
    ..................
    عبدالهادى_سارة
    امين يارب ويتقبل مننا جميعا
    شكرا لزيارتك
    .................
    Amgad
    موضوع لزيز صح ههه شكلك كنت بتعمل كده انته كمان ههه
    نورتنى
    ................
    ميرو انتكة
    شكرا للاطراء بتاعك ده ومتاخدوش بقا عليها انا اتغيرت خلاص :ي
    ..................
    رحــــيـل
    الله يبارك فيكى عقبالك ماتكملى مليون سنه تدوين :ي
    ...................
    د/مروة المعداوى .....قباحة سابقا
    انا بحب الصراحه مفيش احلى منها
    ويارب يديم الزيارات بينا
    نورتينى
    ......................
    Lady E
    الله يبارك فيكى عقبالك :ي
    يارب متكونش اخر زياره
    ....................
    نهر الحب
    متشكر جدا على المبالغه دى ويارب متكونش اخر الزيارات
    ..................
    رضوى
    اهو ده اللى كنت بقول عليه هههه ماشى هعديها المرادى
    ......................
    جوايا شئ نفسه يشوف النور
    حلوه اوى حكاية شخصيتك الجميله دى ههه
    منورانى دايما
    .......................
    نهر الحب
    انا الحمد لله بعمل كده مش بحاول اضايق اللى قدامى بس فى ناس بتفهم غلط
    شكرا ع النصيحه
    ويارب دايما نتواصل
    ......................
    angel
    كل سنه وانتى طيبه
    وان شاءالله نكون كلنا من عتقاء رمضان
    نورتينى
    ...............
    نور الدين
    طبعا فاهمك يا حبيب قلبى ههههه
    كويس انى لقيت حد ليه نفس الحاجات اللى بتدايقنى
    ...................
    mthlykaweyy
    مش عارف اقولك ايه بس كل ما احاول ادخل على اللينك بتاعك بلاقيه بيوجهنى لمدونة تامر نبيل مش عارف بقا هو ده كده ولا ايه
    .....................
    د/اجدع بنوته
    اقول ايه يعنى محدش كان واخد باله انى معنديش ولا تاج بس يلا اهى بدايه بقا

    انا كل ما ادخل عندك بقا هقولك جميل وجامد علشان اكرهك فى التعليقات هههههه وعلشان تجربى (بهزر طبعا)


  26. التاج يا سيدنا لصاحب نصيبه
    هيرجع وياخده لايمكن يسيبه