عايش... ولكن !!!!
اولا عقبالكوا كده فرح اخويا 14/8 الجاى وطبعا الدعوه عامه هههههههه
ثانيا نرجع لموضوعنا بقا
الشق الاول من الموضوع النجار
امبارح كان النجار جاى يثبت المطبخ ويشوف المكتبه وشوية حركات كده
المهم هو رغاى شويه وانا اللى كنت قاعد معاه فقعد ماسك ودنى وهاتك يا رغى ههههههههه
وده جزء من الحوار اللى بينى وبينه

النجار: يا بيه الشقه معمول فيها شغل جامد وبجد اتصرف عليها كتير
انا: اه والله تعبنا فيها بس الحمد لله جه بفايده
النجار: انت عارف بقا المطبخ ده يعيش معاك طول العمر
انا : يارب ياخويا حد يكره ههه
........ وبعد شوية كلام دخل فى موضوع التعليم والحساب وكده
النجار: تعرف يا بيه انا مكنتش بعرف اقرا ولا اكتب
انا: يا راجل دانت بتسجل يعنى ارقام وحاجات كده
النجار : والله يا بيه انا مكنتش بعرف اكتب اسمى حتى لغاية ما دخلت نحو الاميه
انا : والله كويس انك عملت حاجه زى دى غيرك بيتكسفوا يعملوها
النجار: يا بيه انا صممت على الموضوع ده لسبب واحد
انا : ايه هوه؟
النجار : انا كنت قاعد مع واحد قريبى فلاح ولقيته جايبلى فاس(الفأس علشان لو واحد مش فاهم ههه) جيت امسكها لقيتها الخشبه بتاعتها منحوته قولتله ايه ده الخشبه مالها عامله ليه كده قالى مهو ايدى من كتر ما مسكتها نحتتها ... فقولت لنفسى يعنى الصبر على الحاجه بينحتها وانا مش عارف اصبر على كام حرف اتعلمهم علشان اعرف اقرا واكتب ... والله لاروح نحو الاميه .. ومن يومها وانا قولت هروح واخدت نحو الاميه
انا :( بعد ما ركزت فى كلامه شويه وبجد عجبنى اوى الكلمتين اللى قالهم دول وتحليله لكلام قريبه الفلاح) لا بجد احلى حاجه عملتها اهو حتى هتفيدك فى شغلك
النجار: امال يا بيه اهو ع الاقل بقيت بعرف اكتب اسمى وامضى
وفضل يكلمنى شوية وانا بسمع من هنا واخرج من هنا هههههههه ولقيته قلب على السيراميك
النجار: تعرف يا بيه انا كنت بركب بردوا مطبخ عند واحد زبون ولقيته بيسألنى ايه رأيك فى السيراميك ... تعرف قولتله ايه؟
انا : قولتله ايه؟
النجار: قولتله هتشيله وتعمله من جديد قالى لا قولتله يبقى جميل زى الفل
انا : بعد شوية ضحك قولتله ليه يعنى قولتله كده
النجار: اصل يا بيه هقوله البلاطه دى كانت المفروض تتعمل كذا وفى الاخر ملوش لازمه اللى اتعمل اتعمل ... انا بتدايق من اللى يجى يسأل فى حاجه اتعملت خلاص ويجى واحد يقوله دى وحشه طيب هو بيقوله كده ليه .. بيدايقه يعنى .. مهو خلاص اللى اتعمل اتعمل نزعل الراجل من الشغل اللى اتعمل ليه
انا : ههههه نظريه بردو
وقعد يلوك فى اى كلام لغاية ما خلص والحمد لله انه خلص لان ودنى كانت خلاص صفرت من كتر كلامه بس والله كان مسلى اكتر من كيس لب ههههههههههههههههه

نيجى للشق التانى بقا الحلاق
انا على غير العاده روحت احلق عند حلاق عجيب كده بس قولت اغير وشوفوا بقا التغيير ودانى لفين
كنت رياح احلق الساعه 12 بالليل وانا بحلق دخل زبون وده الحوار بينه وبين مصطفى ( الحلاق)
الزبون: ازيك يا درش
مصطفى: اهلا ازيك يا باشا
الزبون : ايه لسه قدامك كتير
مصطفى : اه لسه قدامى اتنين غير الزبون اللى معايا
الزبون: يعنى ايه مش هلحق احلق
مصطفى : وانت مستعجل ليه ماتقعد
الزبون: انا لسه جاى من السفر وانت عارف بقا انى بقالى كتير بعيد عن المدام وعاوز اعمل حاجه انهارده
مصطفى: ياعم وهو لازم يعنى تحلق دقنك انهارده ماتدخل كده وايه يعنى
الزبون: لا ياعم انا معودها على حاجه ومعودها على النضافه مينفعش ادخل عليها كده
مصطفى: ياعم مانت ممكن تيجى تدخل عليها تلاقى الحاره سد هههههه ابقى ادخل بقا من الحاره التانيه ( وفضل يضحك شويه)
الزبون :( بدون ادنى مبالاه ) خلاص بقا هنام انا بره الاوضه انهارده ... سلام
مصطفى : سلام
انا بقا قعدت دماغى تروح وتيجى تلف وتدور وعاوز اكلم الحلاق ومتردد وبعدين قولت الساكت عن الحق شيطان اخرس كلمته شويه وده كان الحوار

انا: انت كنت بتتكلم بجد يا مصطفى ولا ايه
مصطفى : بتكلم بجد فى ايه يا بيه
انا : فى موضوع الحاره التانيه
مصطفى : ايه يا بيه وماله هى مش حلاله يبقى اى حاره وخلاص
انا : (الدم نفض فى عروقى ) دانت بتتكلم جد بقا ...... يا اسطى ما ينفعش حراااااااااااام
مصطفى : يا باشا حرام ليه بقولك حلاله
انا : انت مش مسلم بردوا
مصطفى : اه الحمد لله
انا : ولو حتى مش مسلم بس مينفعش ده اللى يعمل كده يقى خرج عن ملة الاسلام
مصطفى : ازاى يا بيه
انا : مسمعتش الايه ... بسم الله الرحمن الرحيم ( نساؤكم حرث لكم آتوهم انى شئتم )
مصطفى : مالها دى يا بيه
انا : دى معناها فى اغلب التفسيرات عن مكان الجماع اللى هو القبل وليس الدبر وفى حديث عن الرسول صلى الله عليه وسلم فيما معناه ... من آتى امرأة فى دبرها فقد خرج عن ملة محمد ... شايف لدرجة ايه يعنى محرم لدرجه متتوصفش
مصطفى : انا اول مره اعرف الكلام ده
انا : واديك عرفت وابقى اسال فى الموضوع ده لو متعرفش ده ليه اضرار عليك وعلى مراتك ده غير الى قولتلك عليه

وبعد كده سكتت وهو سكت وانا محبيتش اتكلم اكتر من كده علشان ميزهقش منى ولانى وصلتله اللى انا كنت عايز اوصله
بس تفتكروا ان وصل بينا الجهل والتخلف للحد ده
حتى ديننا مبقيناش نعرف فيه
وغير ده وده الاكتر فظاعه ان واحد بيتكلم عن زوجته مع حلاق وبالشكل ده وعادى خالص مفيش اى اهتمام
انا بجد مش عارف اقول ايه
بس ياريتنا نستغفر ربنا يمكن يقبل مننا وندعيلهم ربنا يغفرلهم ويهديهم
عايش... ولكن !!!!

متقوليش قلبك الطيب ده يظلم .... متقوليش
ايوه عارف ان حبك ليا ده عمره...... مايتنسيش
ايوه كل كلامى ليكى ويا نظره من عنيكى متساويش
ايوه قلبى لما قالك لازم نفترق علشان نعيش
كان كلامى ده كله جد وصدقينى مترجعيش

حبنا كان حب مليان بالعذاب
حبنا كان لازم ينتهى بالانسحاب
كل حرف كتبته فيه كأنى بكتب مليون كتاب
كل دمعه من عيونى زى الندى وقت الضباب
كانت بنزل من على خدودى وفى الاخر يغطيها التراب

بكره شمسه ويا ضله تملى كل الكون بحاله
وانتى نفسك لما تنسى هتقولى حب وراح لحاله
ايوه قلبى كان انانى لما قولت خلاص هنبعد... طب وماله؟!!

خوفى من بكره عليكى ويا حبى وعشقى ليكى
خلانى ادوس على قلبى وابعد
واجرح قلبى اللى شاريكى

كنا لازم قبل ما نبتدى نفس البدايه
نقعد نفكر.... هو ايه اصل الحكايه؟!!!
اصل كل شىء ابتدى لازم يكون له نهايه
ايوه قربت النهايه بس ده اخر الروايه
حبنا مستحيل يعيش .... متنكريش
ومتقوليش...قلبك الطيب ظلم...انا اللى ظلمت
علشان نعيش
عايش... ولكن !!!!




نتيجة الثاويه قربت

وياعينى ع المدرسين اللى ركبهم بقت بتخبط على الجيران

اصل مفيش طالب متوقع انه يجيب درجه كويسه

وربنا يستر على الطلبه شكل يوم النتيجه ده هيبقى مجزره

اصلى مجرب الشعور ده والحكايه مش سهله





على رأى شعبولا

خلاص هبطل غنا

واسرح ببيض وصميط

مهو اصل الغنا

دلوقت بقا تنطيط

هههههههههههه

بجد بقت حاجه تنرفذ جدا

وبقت هيصه كده وكل اللى معاه فلوس يطلع يقول اى كلمتين ويبقى سوبر استار



وبعد تفكير عميق

وبعد ان اجتمعت كل الاراء على ان الحكومه لن تقدم استقالتها

فعليكم ايها الشعب

اما ان ترضوا بما فى ايديكم وكفايه عليكم الصحه والستر

وان كانوا موجودين

يا اما تقدموا استقالتكم من هذه البلد

وسيبوها لينا احنا وريحونا من وجع الدماغ

يا اما تعيشوا فيها صم وبكم لا بتشوفوا حاجه ولا بتسمعوا حاجه

وخليكوا طيبين وحلويين علشان تاكلوا شيكولاته فى العيد الصغير

انا استغربت جدا لما سمعت عن القطه اللى فى امريكا
طلعت على شجره ومعرفتش تنزل
قلبوا الدنيا علشان ينزلوها وجابوا الصحافه والاعلام
قولت سبحانك يارب بيعاملوا القطه اذاى وهما نفسهم بيعاملوا البنى ادمين اذاى
ويبعتوا مبعوث مش عارف منين علشان يشوف بيعاملوا الحيوانات اذاى
طيب ما تشوفوا البنى ادمين بيتعاملوا هنا اذاى الاول










عايش... ولكن !!!!
بسم الله الرحمن الرحيم
من منطلق ان الدال على الخير كفاعله
ادعوكم جميعا الى زيارة المدونه الاسلاميه التى تحدثنا عنها فى البوست اللى قبل اللى فات
وياريت اى حد يقرا البوست يعمل تنويه عن المدونه دى على البلوج الخاص بيه
فالدال على الخير كفاعله
ده لينك المدونه
http://allahom-ehdna.blogspot.com/

ويارب تعجبكوا وتزوروها دايما