عايش... ولكن !!!!
بعد تفكير طوييل
وارجع وابعد
بعد ما لقيت كتاباتى اللى بتتنشر هنا بتتسرق
بعد ما لقيت ان المدونات اللى قضيت 4سنين او يمكن اكتر بقت مليانه بالهليسه والحراميه وغيرو وغيرو
بعد ان ضاق عليا هذا العالم التدوينى
افضل الرجوع الى عالمى الصغير مع قلمى واجندتى واصدقائى ومعارفى
اعلنها انى قد قررت الرحيل عن المدونه بعد هذه السلسله من الغيابات

بعد تفكير هو الاطول فى حياتى ليس حبا فيها اكتر من انى كنت افكر فى اصدقائى هنا احبائى هنا
ولكنى اخيرا اخذت قرارى
واترك لكم شيئا لنتواصل به لمن اراد التحدث معى
elasmar2010@yahoo.com ده الميل اللى مشترك بيه على الفيس بوك اذا حد حب يضيفنى لنبقى اصدقاء هناك كما كنا هنا

او ده البروفيل على طول
http://www.facebook.com/profile.php?id=100001325595980
وممكن تضيفونى ع الميل نفسو او نفس الميل هوت

الى كل اصدقائى حبايبى اصحابى ارجو ان محدش يزعل منى

استودعكم الله الذى لا تضيع ودائعه
عايش... ولكن !!!!
اولا ... الحمد لله رجعت من الغردقه من كام يوم بس بصراحه مكنش ليا نفس اكتب خالص وكنت هقفل المدونه من الاساس بس الحمد لله عدت على خير :)))
ثانيا ... انهارده عيد ميلادى ... كل سنه وانا طيب ويارب السنه الجايه اتخرج واخد تاجيل جيش ياااااااااااااااااارب :)
اخيرا انا بشكر كلى حد كلمنى وقالى كل سنه وانت طيب وبشكر كل اللى سال عليا
عايش... ولكن !!!!
بكره ان شاء الله هروح الغردقه كام يوم كده استجمام بقا :) وبلاش قر وحسد انا شايف عينكوا بتدق شرار ههههه هروح اغلص على اخويا شويه هناك مش كتير يعنى كام يوم كده فى السريع وراجعلكوا على طول اوعوا حد يروح هنا ولا هنا انا مراقبكوا
يلا شاوفكوا على خير
سلام
عايش... ولكن !!!!
الحمد لله نتيجتى ظهرت ونجحت وبقيت فى بكالريوس هندسه :)
طبعا لو حد قرا بوستى اللى نزلته امبارح بالليل انا بقوله اعتبر انك مقريتهوش لان انا كنت بجد فى حاله مش طبيعيه والحاجه الوحيده اللى غيرت مودى موضوع النتيجه
المهم بقا محدش يقولى بقا مبروك والكلام الفاضى ده
انا عايز فلوس وحاجه ساقعه وعزومات :))
ومحدش يستهبل فيها ويقولى انت اللى ناجح والمفروض تشربنا
انا هقضى الناس دى كلها فلوس منين
ههههههههههههه
لا طبعا اللى نفسه فى حاجه ساقعه يجيلى وانا اغديه واشربه صندوق ساقع :)
يلا اعدوا بالعافيه هههههه :))
عايش... ولكن !!!!
تحديث
لكل اصحابى اللى كانوا عندى على الاكونت اللى راح على الفيس بوك ضيفونى ع الاكونت الجديد من هنا
او من على اليمين اضغط على صورة الفيس بوك
من امبارح وانا بسمع اغنية انا مش خرونج :))))
قولولى ليه
يا جدعان قولوا
ايوه كده اقولكوا
اصلى الاكونت بتاعى بتاع الفيس بوك اتعمله بلووك ههههه وضاعت فلوسك يا صابر
ده اكتر من الفلوس :( ده اكونت عشره ولا الفارم فيل راحت هيا كمان بعد ما كنت وصلت لمستوى مش هعرف اجيبع تانى
واللى قاهرنى اصلا مش ده كله
اللى قاهرنى ان لما بعتلهم استفسر ليه الاكونت اتقفل تخيلوا الرد ايه بقا
تم تعطيل الحساب الخاص بك لأنه تم تحديد السلوك الخاص بك على الموقع ومضايقة أو تهديد لأشخاص آخرين ..
شوفوا بقا الحته الجايه دى
ارسال رسائل غير مرغوب فيها
وطلب اخرين للزواج او لاغراض تجاريه :)) شوفتوا الخيبه التقيله
ال ايه انا ببعت تهديدات ووببعت رسايل غير مرغوب فيها هههه ليه ببعت رسايل اباحيه و كمان بطلب ناس للزواج كتكم نيله لا مش نيله واحد 60 الف نيله هههههههه حلو حوار طلب الزواج ده بضحك عليه من امبارح والله :)
وفى اخر الرساله كاتبين انه قرار نهائى وغر قابل للطعن :)) تقولش المحكمه الدستوريه العليا

عايش... ولكن !!!!

أيها الشعب الجعان

مساء اللطافه

بكل الشفافه

اقدم اليك آخر بيان

تحب الكنافه

اجبلك كمان؟!



بصفتى مواطن صالح امين

وعايش حياتى برغم التخين

احب اقولك يادوب كلمتين



بحبك يا شعبى .. لانك جبان

وجبنك ده زاد كتير عن زمان

وحبه حبه .. وشويه كمان

تلاقى الشعوب اتقلبت فران

بحبك يا شعبى لانك جعان



بحبك يا شعبى .. لانك حريص

ووسط الزيطه .. دايما تهيص

تجمعك جماعه تلمك فى كيس

وتفرقك بسرعه عصاية بوليس

بحبك يا شعب يحب التهييس



بحبك يا شعب عايشها بمراره

بحبك وحبك زى لبانة سماره

تمضغ كأنك بتمضغ حجاره

بحبك لانك بختك مميل

ووسط فقرك تجبلك موبيل

غاوى تقلد كأنك لسه عيل



بحبك يا شعبى وبقولها بصراحه

بحبك لانك عايشها بسماحه

سايبها كأنك فاتحها سياحه

ولو قلنا كلمه تقلبها مناحه

اقولك بلاش وخدلك اسطباحه



صباح الصباح يا شعب القمار

صباح اللطافه صباح الهزار

مقضيها كرومبو ولعبة الحمار

احبك اقولك يا مصر عمااار



بحبك يا بلدى وغيرك مفيش

وأهلك وناسك ولو شعرهم كنيش

بحبك يا شعب يموت ع الحشيش

ولو خيرونى لغيرك اعيش

اموت لاجلك انته واقولك كمان

بحبك يا شعبى الفقير الجعان

مساء اللطافه

مساء الايافه

مساء الهيافه

يا شعبى الفقير الجبان
عايش... ولكن !!!!
هنا القاهره
هنا تلاقى جميع العجايب
هنا اللى عاشق
هنا اللى دايب
ولو كنت حاضر
او حتى غايب
هتعرف كلامى
لانه تاريخ

جرب بنفسك
وقلب وشوف
جوه الدفاتر
جوه الكشوف
تلاقى فراعنه
تلاقى الهرم
تلاقى اللى باعنا
كيانه اتهدم
محدش سامعنا
كأنه العدم
لكن تاريخنا
يخلينا احنا
نقول يا ندم

هنا القاهره
هنا تلاقى اللى عايش حياتو
وغيره تلاقى اللى مستنى مماتو
وكاره مراتو وكاره حماتو
تجيبه يمينو تجيبه شمالو
هو خلاص مدفون مكانو
تقوله كلمه .. تلاقى كلامو
كنا وكانو
وكلتم ودانا
وكلنا ودانو
ومهما حاولتوا وروحتوا وجيتوا
هيا كده ... وبلاش لغبطه
كلاب متحنطه
ماضى جميل
وحاضر كله شخبطه
ولا اقولك !!! بلاش لغبطه


هنا القاهره
هنا الشوارع
هنا الحارات
هنا شباب
خريجى جامعات
حبه ع القهاوى
والباقى ع الكافيهات
اللى مدروش
وعايشها فى سكات
واللى يحارب
علشان شوية قرشينات


هنا القاهره
هنا الاعلام هنا الصحافه
هنا الناس اخر ايافه
هنا الحياه تعيشها بلطافه
هنا تلاقى جميع الفنون
هنا الاغانى على كل لون
اللى طيب واللى حنون
واللى يغنى ساعات مجنون
ولا خرونج وال ايه لون

هنا القاهره
هنا المعارضه والاخوان
هنا نوابنا فى البرلمان
كل يوم استجواب وبيان
والموضوع فى الاخر فاكس
اصل صاحبنا غاوى يعاكس
يمكن يستضيفوه فى اى لقاء
بفضل يرغى فى اى كلام
وعامل نفسه ال علام
واهو كلمتين والسلام
واسمه بيدافع عن الجعانين
طيب انت فين وهما فين
دانت عايش فى المهندسين
انت يابنى ابن مين؟!!!

هنا القاهره
هنا السياده
برغم اللى فات .. هنا الرياده
برغم الجزيره... هنا القياده
واللى كارهنا .. يشربها ساده
ده مصيرنا ... وبقت عاده
نسكت .. وغيرنا يتمادى
بس عادى .. ميعرفوش
كله فى الاخر فشوش
وهنعتبرها غلطه عابره
هنا القاهره
هنا الساهره




عايش... ولكن !!!!
بعد غياب طوييييييييييييييل ايوه كان طويل جدااا عليا بصراحه ودلوقت كمان بكتب فقط محاولة منى لتغيير الروتين وكسر حاجز الملل اللى ملازمنى بقاله فتره طويييييييله وايضا لانكم وحشتونى .... افكار مبعثره وكلمات لا استطيع جمع شتاتها ... بين السياسه والحاجز النفسى اللى عملتهولى وكرهتنى فى حياتى وبين الفراااااااااغ الممل وبين قلمى الذى لم اعد استطيع ان اكتب به بيتا واحد من اشعارى .... يبقى لى سؤال واحد ..... هل سأعود... الغريب انى اعلم الاجابه ... نعم ... لانها لحظات مرت عليا كثيرا ولكنها طالت هذه المره وكثرت الاسباب
عموما اعلن عودتى لعالم التدوين ... حتى وان كانت عوده باهته ولكنها مجرد عوده
عايش... ولكن !!!!
انا دايما كده واللى متابعين مدونتى من زماان يعرفونى :)) دايما تلاقينى بغيب وارجع تانى
عموما انا هبعد عن التدوين فتره اتمنى متكونش طويله
وياريت تعذرونى انى مكنتش برد على تعليقاتكم ولا بعمل تعليقات عندكوا بس بجد والله انا قريت بستاتكوا كلها بس بجد فى صدة نفس رهيبه من التدوين عموما علشان كده مكنتش بعلق عند حد
اتمنى تعذرونى ولو غيابى طال متقلقوش لنا لقاء ان شاء الله
على فكره انا هتابعكوا بردو ولو قدرت اعلق هعلق مقدرتش فلى عذرى
اشوفكوا على خييييير
سلاااااااام
عايش... ولكن !!!!

معندكش اخوات بلاستيك؟!!!
ده كان سؤالها
واحده صحبتى ... وبعد ما ازبهليت وشعر دقنى وقف وحاجبى الشمال اترفع
كان ردى
لا عندى المونيا وصاج ينفع ؟!! :)
ضحكت وبعدين قالتلى بجد اصل السؤال ده سمعته من واحده بتقوله لواحد
هو يعنى ايه اخوات بلاستيك يا علاء ؟؟!!!
فطست من الضحك وبعدين بصيتلها وهرشت فى عرق الهيافه بقا :))) اخوات بلاستيك ... اخوات بلاستيك ... الكلمه دى قديمه وبسمعها كتير بس دايما بتتقال فى مواقف معينه ... هو ايه اصل الموضوع ؟؟؟
قالتلى ... بص يا سيدى
انا :-بصيت مش شايف اى حاجه:))
هيا :- ياد يا قليل الادب اصبر
انا :- صبرنا يا مسهل يارب
هيا :- انا كنت ماشيه فى الشارع وبعدين واحد عاكسنى
انا :- ومين اللى انطس فى نظره وامه داعيه عليه ده
هيا :- اهو واحد اهبل ... وفعلا امه داعيه عليه ... لقيته بيقولى ايه يا جميل .. والنعمه ولا فاتن حمامه .. طبعا انت عارف ايه اللى حصله
انا :- هو بيقولك فاتن حمامه .. قليل الادب ..طب كان قال هيفا ارحم من الاسم ده :)) ... ده عيل وسخ :))
بس ممكن اقولك عملتى فيه ايه ... قلمين والتالت على قفاه هههه ولميتى عليه الشارع
هيا :- لا كنت رحيمه بيه شويه لانه جاب واحده انا بحبها ... المهم انا لفيتله وبالشنطه على راسه ولسه هفتح صوتى عليه لقيت اللى بيقولى دانتى طلعتى ولا عيشه الكيلانى :) ... وطلع جرى
انا :- الواد طلع عنده نظر هههه
هيا :-بقا كده ... ماشى ياعم هانى سلامه
انا :- لا انا علاء محمود يا اخه ههه لا هانى سلامه ولا غيرو
هيا :- المهم مكملتلكش ... انا كلمت طريقى بقا ماشيه وولقيت واحده بقا يا علاء مقولكش موزه :))
انا :- يخرب عقلك انا عارفك زوقك حلو :)))
هيا :- اه بجد كانت مزه قوى وانا طبعا كعادتى قعدت اتفرج على لبسها علشان اشوفلى حتتين زيهم من العتبه ولا سوق التلات ... المهم فى واحد ماشى وراها ومش سايبها كل شويه يقف قدامها وهيا متعبروش وبعدين انا قربت منها علشان اسمعه بيقول ايه :)
على ما قربت لقيتها هيا بقا اللى بترد عليه بتقوله :- خلاص بقا عيب كده معندكش اخوات بلاستيك :)) وضحكت
ومقولكش بقا يا لول انا سمعت الكلمه وقولت اشوف الواد عمل ايه اتاريه خلاص بعد ما سمع الكلمه نزل رغى معاها وعرف انها على رأى الاستاذ عمرو دياب :)) ضحكت يعنى قلبها مال
انما هو مين الصح يا لول ؟؟!
انا :-عاوزه ايه يا حاجه !!
هيا :- بقولك مين اللى صح فينا ؟
انا :- مهو مقدرش ازعل البت انتى بتقولى انها مزززه هتزعل هيا منى كده هههه :)
هو حاجه تشقلب الدماغ بصراحه بس انا كنت اعرف واحده من سنتين لما قابلتها فى الجامعه لقيتها بتعيط وبتقولى انا فى واحد فضل ماشى ورايا وحتى المواصلات ركب ورايا لغاية الجامعه ونازل معاكسه وكلام مش حلو وانت عارف انى مبحبش ده اكيد فى حاجه غلط
وتانى يوم لقيتها مغيره كل لبسها وجايه تقولى انا خلاص غيرت لبسى لان اكيد لبسى كان فيه حاجه شدته
تفتكرى الموضوع هو كده ؟!!
هيا :- تنحت وبان عليها مظاهر الغباء ... وبعدين قالتلى هو انت عايزنى اغير لبسى
انا :- عيب حد يسمع يفهم غلط :) انا مبقولش كده يا ذكيه هانم انا بقول ان مش دايما يكون العيب في البنت مهو ممكن يكون العيب فى الشخص ده
يعنى مثلا المدرس اللى بيعاكس طالبه عنده ... والراجل اللى عدى ال60 وبيبصبص للى رايحه واللى جايه ... والشاب اللى بيقف على باب الميكروباس يتحرش باللى داخلين و.... و ...
هو كل دول ذنبهم ايه ... علشان فى البطاقه مكتوب انثى ؟!!!! ايوه فى البطاقه لان مبقاش موضوع المعاكسه بيقف على بنت جميله وبس لا بقا كلووووووووو وحش وحلو ... وعلى رأى واحد معرفه ... انا بحب اكلم الوحشه علشان اديلها امل فى بكره :)))
هيا :- طلعت قرون الاستشعار ... تصدق بدأت افهم ... دانت بتتكلم ولا كانك بتدافع عننا
انا :- لا طبعا دانتوا جبابره :)) انتوا اعوز بالله ... ان كيدهن عظيم .... مهو بردو الشباب تعبان يا جدعان يعمل ايه الشاب اللى بيصحى من النوم وهو لسه بياخد تمطيعته الصباحيه يلاقى التلفزيون شغال على كليب لهيفا ولا فيلم من انتاج السبكى ولا اى واحده من الممثلات الشريفات العفيفات
يعمل ايه الشاب لما يخرج علشان يركب اى مواصله علشان يروح جامعته ولا شغله يلاقى واحده قاعده جنبه لابسه بدى استومك ولا حتى مش ااستومك ومبينه نص صدرها وبناطيل استرتش وحجاب مبين تلت تربع شعرها لو اصلا فى حجاب ... عاوزين من الشاب ده ايييييييييييييه ....
عاوزين ايه من شاب لما بيرجع لدينه علشان يبعده عن وساوس الشيطان والافكار دى كلها يلاقى فى 50 الف شيخ على كل قناه وكل شيخ على خلاف مع التانى والشيخ اللى بيحلل البوس واللى بيكفر اللى بيعمل فرح فيه مزيكا واللى واللى
عاوزييييييييين اييييييييييه
هيا :- بس بس خلاص اييييييييه ماسوره وانفتحت
انا :- لسه مكملتش عاوزين ايييييييييييييييه يا .........
هيا :- خلاص بقا ياعم الامور خلصنا
انا :- عم الامور ... احترم الاجرام اللى احنا فيه يابو موته :)
عموما الموضوع مش شايفله حل فى ظل التخبطات فى كل حاجه عندنا غير ان كل واحد يراعى ربنا فى دينه وفى اهله وفى معارفه

وعلى رأى المثل
اكفى القدره على فمها ... يندلق الفول منها

عايش... ولكن !!!!

video
عايش... ولكن !!!!
وانا عمال اقلب فى الاخبار قريت خبرين بجد لما خلصتهم مكنش فى كومنت عندى غير
زغرتى يا انشراح ... ماللى راح راح

الخبر الاول
عن القذافى بيه قصدى باشا يوووه قصدى السيد العقيق مشمر الفذاقى
اخينا علشان واحد من ولاده كان بيهيص شويه فى سويسرا زمااان سنه 2008 والبوليس السويسرى اشتبه فيه فقبضوا عليه وبعدين افرجوا عنه
يعنى موضوع ملوش لازمه اوى يعنى او ع الاقل خاص بيه هو وعيلته يقوم يطلع فى خطابه الاخير يقول بالفم المليان انه بيدعوا للجهاد ضد سويسرا لأنها دوله كافره تهدم بيوت الله
هو سويسرا كانت زمان مسلمه وبتبنى مساجد لما كان ولادك بيزوروها وبتودوا فلوسكوا هناك ودلوقت بقت كافره وبتهدم بيوت ربنا بجد عجبا لكم يا قادتنا
وكمان كمل كلامه بيقول بقا
أي مسلم يشتري بضائع سويسرا، هذا كافر.. بلغوا المسلمين في كل مكان من العالم الإسلامي.. أي مسلم في أي مكان من العالم يتعامل مع سويسرا كافر ضد الإسلام .. ضد محمد .. ضد الله .. ضد القرآن."

وأضاف الزعيم الليبي في تصريحات نقلتها وكالة الأنباء الليبية الرسمية "سويسرا الكافرة الفاجرة التي تدمر بيوت الله، هذه التي يجب أن يُعلن عليها الجهاد بكل الوسائل.. قاطعوا سويسرا، قاطعوا بضائعها، قاطعوا طائراتها، قاطعوا سفنها، قاطعوا سفاراتها."

ومضى القذافي يقول "أي مسلم يجب أن يقاطع هؤلاء، يجب أن تتحرك جموع المسلمين إلى كل مطار في العالم الإسلامي وتمنع هبوط أي طائرة سويسرية، وتتحرك إلى الموانئ وتمنع أي سفينة سويسرية، وتفتش على المتاجر والأسواق وتمنع أي بضاعة سويسرية."

يلا يا جماعه بسرعه بقا احسن عمو القذافى حكم علينا بالكفر .... وخلوا بالكوا ده راجل واصل وايده طارشه

سؤال على الهامش
هو احنا ليه بناخد الدين ستار لافعالنا كل ما ناخد قرار يبقى باسم الدين ؟؟؟
ده لينك الخبر
http://arabic.cnn.com/2010/middle_east/2/27/jihad.swiss/

*****************
الخبر التانى بقا
ألقت أجهزة الأمن المصرية القبض على تشكيل عصابي بتهمة إنشاء مواقع إباحية عالمية وتصنيع أفلام جنسية ، منها أفلام لمشاهير من الوسط الفنى عبر "القص واللزق"
شوفتوا احنا شاطرين فى ايه يا ولاد
بقينا بنعرف نقص ونلزق ونركب صورة واحده على جسم واحده تانيه اهو وكمان ايه عالميه دى اكتر حاجه شدتنى فى الخبر :))
السؤال بقا ... محنا شاطرين اهو امال بيقولوا علينا عالم تالت ليه ؟! :))))))
وخدوا دى كمان
تبين من تحقيقات النيابة أن زعيم التشكيل حاصل على الإعدادية ومقيم بالمنصورة وأنه وزميليه من المنصورة وبورسعيد أنشأوا مواقع دولية منذ ٥ سنوات.
شوفتوا حاصل ع الاعداديه :))) امال لو كان كمل كان عمل ايه
اللى كايدنى بقا وحازز فى قلبى من جوه ان الواد ده من المنصوره يعنى بلديات :))) علشان كده زعلان انى متعرفتش عليه كنت اخدتلى منه سيديهايتين قبل ما يتقبض عليه ههههههههه :))
وبيتهئلى ان معظمكم عارف ان المباحث برضوا من حوالى 6 شهور تقريبا قبضت على تشكيل بيسرق بنوك امريكيه بردو مصر
بعد هذا الخبر افتكرت كلمة محمد هنيدى .... المصرى معروف بجبروته
بالمناسبه بقا

ع الهامش
سؤال .... الناس للى اتقبض عليهم دول دماغم كويسه بدليل اللى بيعملوه تفتكروا هما لو لقوا حد استغل فكرهم صح كانوا هيبقوا كده ؟!!!
ده لينك الخبر التانى
http://www.egynews.net/wps/portal/news?params=85300

اخيرا تعقيبا منى على الخبر الاخير
اعتقد ان السينما بتاعتنا بقت مليانه بالافلام اللى واحده واحده بتدخل على الملابس الداخليه فانا شايف ان ده التطور الطبيعى للحاجه الساقعه


اخيرا بقا بجد
فى تصويت عالمي لأفضل رجل في التاريخ التصفيات النهائية بين 10 شخصيات منهم النبي (صلى الله عليه وسلم) التصويت مرة واحدة من الجهاز الواحد و ستعرض النتائج فى التلفاز تخيل لو النبي فاز...كم واحد سيسمع و يهتم و يعيد النظر في الاسلام؟ أذا اسلم احدهم سيكون في ميزان حسناتك انت!!!..نعم انت!!!.ألم تساعد في نشر الاٍسلام ؟ خش و صوّت و ادعو كل أصدقائك
اعتقد هتبقى شىء كويس مننا فى المولد النبوى الشريف
ده لينك الموقع
http://www.bestofmen.org/
ولو فى اى استفسار ابعتولى
عايش... ولكن !!!!
انا بجد بكتب البوست ده وانا ببكى ... ولأول مره بجد بحس انى دموعى سالت ومش عارف اتحكم فيها
على غير عادتى قعدت اقلب فى مدونات ومدونه تجيب التانيه ومش بعلق انا بس بقرا الافكار
لغاية ما لقيت مدونه عنوانها .... نقاب .. حجاب .. وشوية زباله تانيه
هو مش بنفس العنوان ده بالظبط لانها بالانجلش بس انا محبتش اعرفهالكوا علشان متتأذوش باللى انا شوفته فيها بجد والله من اكتر المناظر المؤذيه اللى شفتها ...
حقيقى يا جماعه بجد انا بعتذر
بعتذر لكل صحابى قضى حياته فى دفاعه عن الدين ده ومات فى سبيله وفى الاخر بنشتمه ونلعنه هو وجدوده
بعتذر لكل شيخ فاضل اتسب واتلعن سلسفيله وهو بيحاول يجمع المسلمين حول لا اله الا الله محمد رسول الله
بعتذر للامامان البخارى ومسلم اللى بجد بعد الكلام اللى قالوه عليكم اعتذارى ده مش هيكفى
صدقونى ميعرفوش ان صحيح البخارى ومسلم هو اصح كتب الحديث
بعتذر عن عدم مقدرتى انى اعمل شىء غير انى اعمل بوست ضعيف زى ده
بعتذر ليك يا حبيبى يا رسول الله عن المسلمين اللى بقوا كمان بيسبوك وبيسبوا اصحابك .... طيب من الدنمارك وقولنا ماشى جهله ميعرفوش انما تيجى من مسلم .... بجد انا نفسى وجعتنى اوىىى
بعتذر لربى العلى القدير
ربى
قد بلغت ذنوبى عنان السماء
ولولا انى اعلم انك الغفار
لاستحييت ان ارفع اليك يدى بالدعاء
يا غافر الذنب
يا قابل التوب
يا سامعا للنداء
تقبل منى توبتى
فأنت الغفور
وانت الرحيم
واليك وحدك الدعا .. والرجاء

اللهم لا تؤاخذنا بما فعل السفهاء منا
عايش... ولكن !!!!
تحديث
ده لينك برومو المهرجان على اليو تيوب لانه مشر راضى يتحمل هنا

افعص هنا

وده كمان مقال فى روز اليوسف عن الكتابين كتاب القصه القصيره وكتاب الشعر اللى انا مشترك فيه
http://www.rosaonline.net/Daily/News.asp?id=45849

من كام يوم جتلى دعوه من مجموعة بشر للتنميه الفنيه والثقافيه انى احضر حفل توزيع ختام مهرجان نشر جماعى اول ... ده لانى كنت مشترك فيه ببالرباعيات بتاعتى اللى كنت نشرتها هنا زماااااان
المهم انا مكدتش خبر وروحت ولما مسكت الكتاب ولقيت رباعياتى ضمن الاعمال اللى اختاروها للنشر فرحت جدااا
الاكتر من كده بقا اللى بجد فرحنى اكتر ان كان متقدم للمسابقه اكتر من 600 شخص بأكتر من 1000 عمل
وعلشان يبقى تقييمهم بين الاعمال الكتير دى تقييم صحيح اختاروا لجنة تحكيم كانت مكونه من مجموعة رائعه من المؤلفين زى مثلا

ا/بهاء جاهين

الشهادة الدراسية :

ليسانس اداب انجليزى 1978
ماجيستير اداب مقارن 1985

الدواوين الشعرية :

الرقص فى زحمة المرور 1986
ايام 1996
مكاشفات شخصية 2000
كوفية صوف للشتا 2003
الارتفاع المسموح متر 2004
حكاية المهلهل مع ملك الزمان 2005

الوظائف :

معيد بكلية الاداب سابقا
رئيس قسم صفحة ادب – جريدة الاهرام حاليا

**************************
*

ا/سالم الشهبانى

ـ تخرج في كلية الحقوق جامعة القاهرة
صدر له
ــــــــــــــــ
ـ ديوان " ولد خيبان " شعر بالعامية المصرية عام 2006
سلسلة الكتاب الأول المجلس الأعلى للثقافة
ـ ديوان " السنة 13 شهر " شعر بالعامية المصرية عام 2007
الهيئة العامة للكتاب ثم دار أكتب للنشر والتوزيع
ـ ديوان " القطة العميا " شعر بالعامية المصرية عام 2008 دار أكتب للنشر والتوزيع /جزء أول من مشروع عن الألعاب الشعبية للأطفال
ـ ديوان " الملح والبحر " شعر بالعامية المصرية عام 2009 دار أكتب للنشر والتوزيع
وله تحت الطبع
ــــــــــــــــــــــ
ـ ديوان " آدآن الهجر " شعر بالعامية المصرية
ـ ديوان "شبر شبرين " عن الألعاب الشعبية في وجه بحري
ـ ديوان "حديري بديري "عن الألعاب الشعبية في وجه قبلي
حصل علي
ـــــــ
جائزة التفرغ من وزارة الثقافة عام 2006 /2007/
الجائزة الأولي من معهد جوته الألماني في شعر الـslam عام 2007

ــ درست له بعض القصائد في كلية الآداب جامعة حلوان
ــ ترجمت له بعض القصائد إلي اللغة الروسية واللغة الإنجليزية
ــ حصل ديوان ( القطة العميا) علي المركز الأول في استفتاء أجرته جريدة
روزا ليوسف عن عام 2008
ــ تم ترشيح ديوان (السنة 13 شهر)من أهم خمسة دواوين عن عام 2007 في استفتاء أجرته قناة النيل الثقافية برنامج ( أوسكار النيل الثقافية)

ــ مثل مصر في المؤتمر الدولي للشباب العربي في الشعر والقصة
بسلطنة عٌمان عام 2006
ــ مثل مصر في مؤتمر الإخاء الشبابي بين مصر والسعودية
بالمملكة العربية السعودية عام 2009


***************************

ا/عبد الحسيب الخنانى

المؤهل الدراسى :
كلية اللغة العربية – جامعة الازهر – قسم الصحافة و الاعلام 1981
يعمل صحفيا بالاهرام منذ عام 1991
رئيس مناوب لقسم دنيا الثقافة بجريدة الاهرام

له 3 دواوين :
شاطىء العمر – مكتبة الاداب – 1997 قدمه الناقد الكبير الدكتور الطاهر مكى
سبحات حول الحمى – دار الصحوة – 2000
لكن حبك موطنى – هيئة الكتاب – 2006

و له 3 دواوين تحت الطبع :
لا تنتظر احدا
رفرفات المجىء
المدى الغائم

حصل على عدة جوائز فى مسابقات جامعة الازهر و المجلس الاعلى للشباب و الرياضة و فى عدة مناسبات كحفل المولد النبوى السنوى و العيد الالفى للازهر و جائزة الشعر التى اقامها نادى ابها الادبى السعودى عام 1996

عضو فى
ندوة شعراء العروبة
جمعية الفكر و الادب المعاصر
معجم البابطين للشعراء العرب المعاصرين

******************************************************

وبجد لما عرفت ان لجنة تحكيم مكونه من الاسماء دى اختارت عمل ليا انه يتنشر وكمان مش اى عمل ده عمل طويييل 44 رباعيه واخده لوحدها فى الكتاب تقريبا 7 صفحات كانت فرحتى ضعفين
وفرحتى ذادت اكتر كمان لما حضرت الحفل وقعدت استنى بداية الحفل وفى واحد جنبى لسه متعرفناش حتى ماسك كتاب الشعر " الارض بتتكلم" ولقيته بيبصلى وبيقولى
الكتاب ده انت قريته
قولتله لسه يادوب بتصفحه يعنى
قالى انا زيك كده لفلفت فيه شويه كده بس اكتر حاجه عجبتنى هيا الرباعيات اللى عندك صفحة 81
قولتله ياراجل بجد
قالى اللى كاتبها تحس انه بقول الكلام اللى احنا كلنا عايزين نقوله
قولتله انا اللى كاتبها
مكنش مصدق :))) مش عارف بقا انا مش باين عليا ولا ايه
بس طبعا صدق لما الحفل ابتدى وكرمونى مع بقية زملائى اللى مشتركين معايا فى الكتاب
المهم ان العبد الفقير الى الله بدأ يطلعله حاجه للنور وسط الضلمه اللى كانت مغيمه عليه
انا بجد من هذا المزنأ ببعت شكرى لمجموعة بشر للتمنية الفنيه والثقافيه اللى اتاحتلى انى اشارك فى الكتاب
وبشكر الاستاذ حسن فواز بالزات لانه شخصيه محترمه بجد
ويارب دايما من تقدم لتقدم


ده غلاف الكتابين
كتاب الشعر اسمه الارض بتتكلم
وكتاب القصه اسمه دون حذاء افضل

وبالمناسبه صور الحفل لسه منزلتهاش هنزلها قريب هنا




عايش... ولكن !!!!
وانا خارج امبارح كعادتى علشان اقضى سهرتى بره مع اصحابى قابلت ابن خالتى ودار بينا حوار صغير كده
ابن خالتى:- ازيك يا هندسه
انا :- اهو عادى يعنى ماشى الحال... انت رايح فين كده؟
ابن خالتى :- انا رايح الصيدليه شويه كده وهبقا اجيلكوا
انا:- طيب قشطه ابقا كلمنى بقا علشان تعرف احنا فين....... امال انت كنت جاى كده حاطط الهاند فرى فى ودنك كده شكلك مزاجك رايق اوى
ابن خالتى :- لا والله عادى يعنى بس واحد مزاجه اروق منى لقيته باعتلى اغنيه جديده مش عارف بتاعة مين بس ايه مقولكش كلمات ايه بقا لا تقولى اللى انت بتكتبه ولا الكلام الفارغ ده
انا:-طيب قشطه ابعتهالى
وقعد يبعتهالى لغاية ما وصلت النادى ومشى هو وانا دخلت النادى... المهم انى مكنتش لسه سمعتها

دخلت النادى.. وجرى ع البوفيه .... مساء الفل ياعم صلاح القهوه بتاعتى والنبى وهتهالى بره فى الهوا
المهم طلعت بره وقولت اسمع الاغنيه لقيت الكلمات ايه بقا
***************
بتحبنى ... لا اشك .... مين دول اللى ع الفيس بوك
لو مشيلتيش العيال دى ... عليك هسك

واناااااااا ... انا مش خروووونج
انا كينج كونج
دنا وانا رابط ايدى
بلعب بينج بونج

مش ابن هانم ولا ابن لورد
اتفضلى هاتى الباس ورد
دنا ارجوز متربى فى سيرك
مش عيل كاورك
******************
شوفتوا الكلمات وصلت لفين بقا

المهم طبعا مسيبتهاش كده قعدت اسمعها لاصحابى وميتين ضحك عليها
ومره واحده سمعنا رزعة من ورانا .... " قفله ع الدش "
وبعدين شوية هيصه
فبسأل واحد صاحبى ... هو المدرسه اللى ورانا دى مسكونه وكمان الجن بتاعها مزاجو رايق قوى انه يلعب "ضمنو " وبيعمل كمان قفله ع الدش :)
قالى لا ده العادى مدرسين اخر زمن
قولتله نعم ؟!!! هيا المدارس بقت بتشتغل بعد العشا ولا ايه ... دى الساعه دلوقت 9ونص
قالى يابنى دول مدرسين مدرسة الاعدادى بيجوا هنا يسلوا وقتهم وكل واحد جايب النشاط بتاعه معاه
يعنى اللى بيلعب ضمنو جايب الضمنو والطربيزه معاه واللى بيحب الطاوله جايبها معاه واللى بقا غاوز دش اهو عنده غرفة الوسائط يخش يتفرج بقا براحته واللى غاوز كمبيوتر وجيمز اهو عنده بردو يعنى
ومنها بردو عمك عبده فراش المدرسه بيجى يسرفس عليهم وياخدله قرشين بردو

قولتله ... ودول بيمشوا الساعه كام بقا
قالى يعنى على 12 كده

قولت يا سلام هما دول المدرسين بجد .... انا خلاص نويت انقل نشاطى من هندسه للتدريس :)
قولت استنى بقا اتأكد من الحوار ده
طلعت وقفت بره الساعه 12 لقيتهم خارجين ومنهم مدرس معرفه اوى يعنى
روحت سلمت عليه ... وازيك يا استاذ متولى اخبارك ايه
الاستاذ متولى :- اهو تمام زى مانت شايف لسه مبهدل الاستاذ خالد 4 عشرات ضمنو ومغلبنيش غير واحده بس :)
انا :- اه انت هتعرفنى انت طول عمرك حريف ضمنو ... بس مش احرف منى :)
وقعدنا ندردش شويه لغاية ما خلعت منهم وروحت لاصحابى وكملت سهرتى بس بجد انا كنت فطسان ضحك ع الموضوع ده

مدرسه بالنهار وياريت بقا فى تعليم
وبالليل بتتقلب كافيتريا وغرزه للمدرسين
شىء جميل اوىىىىىى

وعلى رأى المثل
اقطع راس الكلب و ارميها و اللى فيه خصلة ما يخليها
عايش... ولكن !!!!


ع المحطه .. ع المحطه واللى شوفته ع المحطه
طلعت الخفه ام شنطه .. سلم الاتوبيس بنطه
حته ملعب والاكاده فى القوام والحسن بطه
هى دخلت درجه اولى .. والكراسى بقت منطه
سابوا تانيه وغلب تانيه .. والقطيع على اولى خطى
اللى يهبش فى الجونله ... واللى يعلى واللى يوطى
بص واحد من اللى هما .. دمهم فلفل وشطه
شاف صنايعى فى البريمو .. قاله خش هناك يا اسطه
تانيه انسب للى زيك .. دى الحقيقه بلاش مغالطه
السطى قال ياعم روق ... دى الحياه تحب المباسطه
وانت شايف مش مغمض حاجه ملبن .. حاجه اشطه
ولا يعنى الكون هيخرب .. لو فقير يلهطله لهطه
*****************************
عايش... ولكن !!!!
" بحبك .... والله بحبك ... عارفه انا من يوم ما عرفتك وانا اتغيرت .... مبقتش اشرب سجاير ولا بعرف بنات ولا حتى بحط جل على شعرى ... صدقينى .." وفجأه علاااااااااااااااااااااااااااااااااااء ( بوم بوم بوم " ده رزع ع الباب " بوم بوم بوم ) قوم يالا علشان تفطر

عايز ايييييييه يا محمد(اخويا )... اتهد بقا وانت ما بتجيش فى وقتك ابدا
منك لله يا شيخ طيب سيبنى اكمل الحلم ده الواحد كان ماشى كويس وعمال يكدب وزى الفل
فطار ايه بس دلوقت الواحد لو كان كمل الحلم كأنه فطر بالظبط ... هو حد عارف الحلم كان هيخلص على ايه :)))

المهم بدأت اقوم ولسه بفرد ضهرى " آآآآآآخخخخ " لا متقلقوش بتتاوب بس وقولت اعمل التمطيعه الصباحيه
ايوه مهو دى هيا سر النشاط بتاع اليوم لو مااتعملتش هفضل طول اليوم مقلق كده واكيد فى حاجه وحشه هتحصلى
جيت اتمطع وبفرد دراعاتى كده ولسه هرجع لورا بقا ...
لالالالالالالالا دى مش تمطيعتى العاديه دى تمطيعتى وانا فى ابتدائى فى حاجه غلط استرها يارب
المهم نزلت علشان افطر
انا :-سلامو عليكوا صباح الفل يا حاجه ... صباح الفل يا بابا ...........
بابا وماما :- صباح النور يابنى اغسل وشك واقعد افطر
طيب
طسيت وشى بشوية ميه ولسه جاى اقعد " تتتررم انا بيييييييب تتتترتتم انا بييييييييييب "
بابا لماما .. عندك انابيب فاضيه يا ام بهاء
ماما:- ايوه طبعا والنبى يا علاء روح غيرها
انا :- طيب ...وانا عمال اقول فى بالى " انا من ساعة التمطيعه وانا عارف ان الصباح ده ازرق زى كالو الصباع "
انا :-هاتى يا حاجه الفلوس .... خد من ابوك
بابا :-هات يا بابا ... اصطبحنا وصبح الملك لله ع الصبح كده هات يا بابا
انا : - هو انا هاكلها دنا هغير الانبوبه بيهم ولو مش عايز بلاش :)
بابا :- 5 جنيه اهى يلا بس اوعى تجيبها منفسه
انا :- حاضر يابابا بس هى الانبوبه بتتغير ب5 جنيه
بابا :- روح بس يلا هى بخمسه جنيه
انا :- يارب قوينا ... ولفعت الانبوبه على كتفى ...." هيا الانابيب فين يا ام محمود "
ام محمود :- هناك عند عمك خالد بتاع الطعميه ... وعليها موووووت وضرب بالجزم
انا :- ربنا يسدها فى وشك يا ام حوده ... بتبشرينى
انا:- يادوب وصلت عند اول الشارع وشوفت المنظر .... وقفت وتنحت
ده ضرب بالجزم بجد يالهوى وبلغ وشباشب جلد كمان
المهم وصلت عند العربيه بتاعة الانابيب ولقيت خالتى واقفه هناك قومت رامى الانبوبه جنبها وقلتلها حافظى عليها زى ابنك خالد احسن حراميه الانابيب كتير الايام دى ولمى 8 معاكى ولمى منهم الفلوس بسرعه
وقمت شابط فى العربيه وطالع فوق جنب الراجل اللى بيوزع ... ورازعه سيجاره تمام ... وقلتله استنى شويه
انا :- بسسسسسسسس سكوووووووووووووت .... هناخد كل 10 انابيب مره واحده يعنى كل 10 يتجمعوا مع بعض ويلموا فلوسهم وهنخلص فى ثوانى النظام حلو يا جماعه
واحد معرفهوش :- نظام مين ياعم بلاش وجع دماغ
انا :- ورينى بقا هتاخد انابيب ازاى
محمد ( اللى بيوزع ):- ايوه اللى مش هيجمع 10 وبنظام مش هياخد انابيب

انا :- ( كنت عاوز اطلعله لسانى بس انا كنت فوق وكل عامة الشعب شايفنى ههه ) .... ها يا جماعه مين اللى جمع
.... طبعا اول واحده كانت خالتى مجمعه 10 انابيب وفلوسهم جاهزه وزى الفل هاتى يا خالتى 50 جنيه دول ؟
ماشى تمام ..... خد يا محمد هات 10 انابيب وانا هنزل استلم منك علشان الحريم دول
1-2-3-........-10 تمام يا محمد ... يلا ياخالتى وزعى الانابيب وسيبى انبوبتى معاكى دقيقتين بس
يلا يا جماعه اللى بعدو

انا :- اى خدمات يا محمد
محمد :- شكرا يا باشا مفيش واحده ال ام كمان
انا :- واحده ال ام ماشى يا حماده ... متغلاش عليك
يلا يا خالتى ارفعى معايا على كتفى .... يالهوىىىىى الحلم شكله تعب الواحد اوى :))))
خالتى :- بتقول ايه ....
انا :- لا مفيش يا خالتى عاوزه حاجه بقا انا همشى بقا احسن هيعملوا الفطار ومش لاقيين غاز .. سلام بقا
وانا فى طريقى للبيت ... ام محمود جارتنا شافتى
ام محمود :- ايه ده يا علاء انت جبت بسرعه كده ازاى
انا :- فى بالى ("ومن شر حاسد اذا حسد" يالهوى حتى فى دى قر وحسد)
مفيش يا ام محمود اصل اللى بيوزع كان زميل دراسه :))) ... سلامو عليكو

ولانى بكتب البوست ده وانا بنام .... يبقى على رأى المثل

مكتوب على ورق الخيار من سهر بالليل ينام بالنهار
عايش... ولكن !!!!
وبعد غيااااااااااب طوييييييييييييييييييل
اعود اليكم من جديد
" الله يلعن ام الامتحانات"
المهم انكوا واحشينى مووووووووت
وماصدقت رجعت
وبعتذر لكل الناس اللى كانت بتسال عليا هنا لانى بجد مكنتش بدخل نت الا قليل اوى ومكنتش بلحق ارد على حد

وبعتذر لكل اللى كانوا بيحاولوا يكلمونى ع الموبيل لانى موبيلى اتسرق من فتره ومكنتش رجعت الشريحه يادوب رجعتها من اسبوعين بس
"منه لله اللى شقط الموبيل كان لسه جديد مكملش معايا شهر "

يلا ما علينا ... كل ما افتكر الحوار ده افتكر المثل اللى بيقول

اللى تعمله النمله فى سنه ... ياخده الجمل فى خف رجله