عايش... ولكن !!!!
بعد غياب مؤقت
وحشتونى جدا
الفتره اللى فاتت كنت فكرت فى عمل مدونه اسلاميه
طبعا المعظم هيقولى ايه ياعم علاء اللى دخلك فى الحاره السد دى
ومين انت علشان تقولى مدونه اسلاميه
انا نفسى قولت الكلام ده لنفسى
فقولت يبقى معايا شريك فى المدونه علشان اقدر اجمع اكبر قدر من وجهات النظر
فقولت تكون بنت معايا وبعد ما اخترت احدى صديقاتى اللى شوفتها مناسبه
وفاتحتها فى الموضوع ده
وبعد موافقتها ... لقيتها اتراجعت لاسباب خاصه بيها
وبعد رفضها .. بدأت افكر فى الموضوع من جهه تانيه
انا مين علشان اتكلم فى الدين ؟ََ!!
وازاى انا بتتريق على الشيوخ اللى طالعين اليومين دول على الفضائيات وبيفتوا فى كل حاجه
وبيحللوا اللى على مزاجهم
وبدات اتراجع عن الموضوع كله
وبعد تفكير شويه قولت مدونه اسلاميه!! ايه يمنع
وبعدين اكتر الشباب وانا واحد منهم ساعات بيتكسف يسأل فى حاجات مش عارفها او حاجات هو متلغبط فيها
لمجرد انه شايف انه خلاص كبر على الموضوع ده
ووصلت انى اعمل المدونه من غير فتاوى
امال اسلاميه ازاى؟!! اقولكوا
المدونه هتبقى عباره عن مكان كويس اننا نقدر نتكلم فى اللى يخص الدين واللى عاوز يسأل عن اى شىء
وكمان موضوعاتها هتبقى اسلاميه بحته يعنى نقدر نساعد بعض اننا نفهم ديننا اكتر ونتقرب من ربنا اكتر
بس الموضوع ده عاوز واحد يكون خريج ازهر او شيخ
وده اللى فكرت فيه
وقررت ان اللى هيرد على الاستفسارات احد شيوخ الازهر وامام احد المساجد
وطبعا كل رد ان شاء الله هيبقى معاه اللى يأكده من السنه او القرآن
ورقم الصفحه لو من احد كتب الأئمه
مش عارف ان كانت المدونه هتاخد استحسان وقبول لدى المدونين ولا لا
علشان كده قولت يبقى فى استفتاء على الموضوع ده
وياريت اللى يعلق يدينى رأيه فى الموضوع ده وطبعا يضع رأيه فى الاستفتاء اللى اعلى الصفحه ع الشمال
ويارب ينول رضا الجميع
24 تعليقات
  1. Geo Amr Says:

    فكرة الدونة جميلة جدا وايه المشكلة لما تعمل مدونة اسلامية انا مع فى عمل مدونة اسلامية بس اهم حاجة تكون الفتوى والمعلومات تكون صح وربنا يجزايك خير


  2. moory-mero Says:

    السلام عليكم ورحمة الله وبركاته

    علاء ويلكم باك ليك وحشه يا جدع يارب يكون غيابك خير وتكون موفق بامتحاناتك

    انا موافقة شور على المدونة وربنا يوفقك يارب ماانت قلتلي عليها ليه كنت عايز تتراجع احنا فعلا موش خبراء في الدين لكن موش يمنع اننا نقرب منه ونتوغل فيه على الاقل عشان نفهم موش عيب ولا غلط
    وربنا يهدينا لما يحبه ويرضاه

    معاااااااااااااااااااك فيها وموافقة أكيييييييد
    في رعاية الله


  3. فكرة جميلة ومفيش مانع طالما هتستعين بمتخصص ازهرى موثوق فى كلامه
    بس انا لسه مش فاهمة هتكون للفتوة بس
    ولا للموضوعات الاسلامية ولا ايه ؟
    ودورك هيكون فيها ايه ؟

    ربنا يوفقكم

    سالى


  4. اولا بحييك على اختييارك للقسم او الجزء دة بالذات هوة مش سهل وعاوز منك مسؤلية جامدة وربنا يوفقك وتكون احلى مدونة مضومنا وشكلا وكل حاجة

    تحياتى


  5. حمد الله على السلامة

    نورت عالم التدوين

    مدونة اسلامية شىء جميل ومفيد لكن خليك بعيد عن الفتوة دة راى

    يعنى ممكن تكتب وتختار مواضيع اسلامية وقصص لاانبياء وصحابة رسول الله علية الصلاة والسلام

    صدقينى هتكون مدونة ناجحة

    تحياتى


  6. لا حاجة جميلة بجد
    بس ياريت اللى يجاوب يكون حد موثوق منه اوى اوى
    ويكوت بعيد عن التطرف الدينى
    تحياتى لك وفقك الله


  7. RaRa Says:

    علاء حمد لله على السلامة
    طبعا فكرة جميلة اوووووووووووى
    وانا فكرت انى اعمل مدونة دينية لكن فكرت فى نفس تفكيرك
    ربنا يوفقك فيها واكيد ان شاء الله هتكون مدونة رائعة
    واحنا معاك ان شاء الله ربنا يوفقك فيها ودايما


  8. ياااه..على الصدفة...تصدق لسة فيه حد مقترح عليا اقتراح زي ده...بصراحة عجبني اقتراحه..بس رديت عليه نفس الرد..احنا مين عشان نتكلم في الدين...وساعتها قالي ان الكلام هيبقى عام...وفجأة لقيتك بتقول نفس الكلام...بصراحة انا لسة بفكر..بس بيتهيالي ان الموضوع صعب...وفيه مسأولية كبيرة اوي..ومع ذلك هو ممكن..بس من ير مسالة الفتاوى دي...لاني مش شايفة انها ممكن تكون ايجابية اوي يعني...وعموما ربنا يكرمك لانك فكرت في فكرة زي دي...وان شاءالله يوفقك للاختيار الصح....


  9. موجة Says:

    عايش ولكن
    ♥ ♥ ♥ ♥ ♥
    علاء باشا
    صباح الفل يا برنس
    منورني يا باشا و الله
    كنت مسافر فين بقى يا شقي؟؟؟؟
    ههههههههه
    زيارتك اسعدتني و تعليقك نورني بجد أحنا بنحب عبد الناصر جدا لنه حقيقي ما يتعوضش وعندك حق في حكاية المعزة دي ههههههههه
    لان علاء لو اتنحى كلناحنقوله لآآآآ
    أما أبو علاء فممكن نقوله براحتك
    ههههههههههههه

    بص يا سيدي

    فيما يتعلق بالمدونة الاسلامية فالفكرة كويسة مع اني مش باحبذ تعدد المدونات للمدون الواحد فامدونة ممكن تكون متنوعة .. أما و ان المدونة الاسلامية ستكون متخصصة بحيث يرد فيها احد الشيوخ على اسئلة ولافه فلا مانع يا علاء .. و لكن فلتكن مشتركة اقترح عليك ان تكون مشتركة بعدد يتجاوز الخمسة و الستة كمان .. فلنأخذ من كل رجل قبيلة .. قصدي من كل قبيلة رجل هههههههههه فيتفرق الدم بين القبائل .. فاهمني يا برنس

    خالص تحياتي
    أحمد


  10. عجبتني الفكره جدا

    وليه لا طالما انه هيكون فتوي من

    القران ومن السنه وكمان شيخ اللي

    هيقول الفتوي دي ...

    رغم ان الصوره مش مكتمله عندي

    يعني معرفش اذا كانت هتبقي مجرد

    فتاوي ولا في مواضيع ولا ايه بظبط

    بس

    حساها فكره حلوه و اتمني انها تتنفذ


  11. اسعدنى المرور بمدونتك وأتمنى لك التقدم والمزيد من الاهداف النبيلة


    كما أدعوك لزيارة مدونتى والتى محتواها


    تعالوا نسافر المسافات الى زمن من المحبة لاينتهى


    كما أدعوك لقرأة قصتى


    (بكل لغات العالم أحبك)


  12. Unknown Says:

    الفكرة حلوة وموافقة عليها و كويس ان اللى هيرد هيكون حد موثوق فيه ...... حلوة الفكرة برافو عليك


  13. فكرة جميلة على فكرة
    لان هيبقى فيها نقاش حلو
    بين وجة نظرنا ووجة نظر الدين
    وياريت يبقى فى وجة نظر حد من الابهات او الامهات كمان
    لان هو دة مجتمعنا
    الى احنا ضايعين بينة

    تسلم الافكار الجامدة

    تحياتى
    اميرة الهدوء


  14. صباح الخير ياعلاء
    حمد الله علي سلامتك
    ....
    زي ما قلتلك ياعلاء حكاية المدونة الاسلامية بالشكل الي انت طرحته جميل وبدون ما نبين نفسنا شيوخ وبدون التطرق لاي فتاوي
    وياريت صاحبك الشيخ يشترك معاك منعا لحدوث اي حاجة مسيئة للدين
    وكمان لانك هتتكلم عن امور تهمنا اقصد الشباب وكده ومش هتظهر نفسك ملاك اقصد هتتكلم عنك وعننا بصورة تنفعنا
    انا بقلك وقلتلك انشيء المدونة دي
    وانا اسفة اني اعتذرت بس انا قلتلك اسبابي
    هستني ظهور المدونة دي قريب ان شاء الرحمن ولو عاوز اي مساعدة مش هتأخر ان شاء الله
    ........
    اعانك الله علي نيل رضاه
    ...
    دودو


  15. علاء فكرة هايلة وأن عندي الشيخ اللي ممكن يساعدك هو خريج أزهر ومدرس في جامعة الأزهر وكليات الحقوق وشخص معتدل وعضو رابطة العالم الإسلامي
    عموما مدونته اسمها اصحاب الجنة
    http://mohamed-shehatta.blogspot.com
    وأي استفسار ابعتلي رقمك وأنا أوصلك بيه
    جعل الله ما تفعله وما تقوله من خير في ميزان حسناتك يوم لا ينفع مال ولا بنون إلا من أتى الله بقلب سليم


  16. غير معرف Says:

    هيا الفكرة حلوةاوى وربنا يجزيك عنها خير بس شائكه جدا
    يعنى لازم المدونه تكسب ثقه الناس الاول خاصه لما تتكلم فى الدين لانك زى ماقلت كميه الفتاوى الى مغرقانا ومغرقانا فعلا كتيير جدا

    بس ربنا يكرم وتجيب حد موثوق فيه جدا
    وجزاك الله كل خير

    سلامى
    :))


  17. فكرة المدونة حلوة جدا

    ليه احنا بنخاف من الكلام فى الدين

    وبنفضل البعد عنه

    مع انه اكتر مكان ممكن الانسان يرتاح فيه

    احييك على الفكرة

    بجد حلوة جدا

    توكل على الله
    ..............

    تقبل مرورى
    ارق تحياتى


  18. ربنا يوفقك في تحقيق فكرتك

    بالشكل الصح باذن الله

    بس لازم تكون حذر جدا

    وتتأكد من مصدر اي حاجه هتتكتب فيها

    اللهم انا نعوذ بك ان نَضِلّ أو نُضَل

    ليكوريكا


  19. عجبانى الفكرة دى اوى , ويلا ربنا يوفقك , وفى ميزان حسناتك , يلا يفندم ابدأ واحنا معاك


  20. عايش ولكن

    فكرة جميلة جدا

    وياريت تعمل بيها لانك هتستفاد وهتفيد كتير
    ويارب يجعلها فى ميزان حسناتك

    وربنا يوفقك ويقدرك عليها يارب

    اتمنى لك التوفيق من الله
    تحياتى لك
    بنت النيل


  21. فكرة البوست اكتر من رائعة
    تحياتى


  22. moory-mero Says:

    السلام عليكم ورحمة الله وبركاته

    انت فين يا علاء بقالك فترة بعيد موش بشوفلك اي كتابات وحتى موش قلت قررت ايه في موضوع المدنة ابقى طمني
    يار بتكون بخير


  23. غير معرف Says:

    حلوه قولت أشوف بنت معايا عشان نعمل مدونة اسلاميه

    هههههههه


    ضحكتني والله

    قول مدونة دعاريه كدا


    انما اسلاميه


    لا اعتقد


  24. غير معرف Says:

    السلام عليكم ورحمة الله وبركاته
    أخي في الله مدونة رائعة وبارك الله فيك
    خطوة إيجابية أتمنى لك التوفيق من الله
    وأحب أعرفك أن بإستطاعة أي إنسان أن يعمل مدونة إسلامية ليكون داعية للحق
    ويدل الغير على الخير وليس بالضرورة أن يفتي في أمور فقهية وممكن من يوجه لك سؤال يحتاج فيها فتوة تتجه إلى علماء الدين
    وتحضر منه الفتوة
    أرجو أن يصبح شبابنا دعاة في يوم من الأيام ليفخر بهم الله يوم القيامةويكون
    نصرلنا لنقهر أعداء الدين

    داعية