عايش... ولكن !!!!
اولا عقبالكوا كده فرح اخويا 14/8 الجاى وطبعا الدعوه عامه هههههههه
ثانيا نرجع لموضوعنا بقا
الشق الاول من الموضوع النجار
امبارح كان النجار جاى يثبت المطبخ ويشوف المكتبه وشوية حركات كده
المهم هو رغاى شويه وانا اللى كنت قاعد معاه فقعد ماسك ودنى وهاتك يا رغى ههههههههه
وده جزء من الحوار اللى بينى وبينه

النجار: يا بيه الشقه معمول فيها شغل جامد وبجد اتصرف عليها كتير
انا: اه والله تعبنا فيها بس الحمد لله جه بفايده
النجار: انت عارف بقا المطبخ ده يعيش معاك طول العمر
انا : يارب ياخويا حد يكره ههه
........ وبعد شوية كلام دخل فى موضوع التعليم والحساب وكده
النجار: تعرف يا بيه انا مكنتش بعرف اقرا ولا اكتب
انا: يا راجل دانت بتسجل يعنى ارقام وحاجات كده
النجار : والله يا بيه انا مكنتش بعرف اكتب اسمى حتى لغاية ما دخلت نحو الاميه
انا : والله كويس انك عملت حاجه زى دى غيرك بيتكسفوا يعملوها
النجار: يا بيه انا صممت على الموضوع ده لسبب واحد
انا : ايه هوه؟
النجار : انا كنت قاعد مع واحد قريبى فلاح ولقيته جايبلى فاس(الفأس علشان لو واحد مش فاهم ههه) جيت امسكها لقيتها الخشبه بتاعتها منحوته قولتله ايه ده الخشبه مالها عامله ليه كده قالى مهو ايدى من كتر ما مسكتها نحتتها ... فقولت لنفسى يعنى الصبر على الحاجه بينحتها وانا مش عارف اصبر على كام حرف اتعلمهم علشان اعرف اقرا واكتب ... والله لاروح نحو الاميه .. ومن يومها وانا قولت هروح واخدت نحو الاميه
انا :( بعد ما ركزت فى كلامه شويه وبجد عجبنى اوى الكلمتين اللى قالهم دول وتحليله لكلام قريبه الفلاح) لا بجد احلى حاجه عملتها اهو حتى هتفيدك فى شغلك
النجار: امال يا بيه اهو ع الاقل بقيت بعرف اكتب اسمى وامضى
وفضل يكلمنى شوية وانا بسمع من هنا واخرج من هنا هههههههه ولقيته قلب على السيراميك
النجار: تعرف يا بيه انا كنت بركب بردوا مطبخ عند واحد زبون ولقيته بيسألنى ايه رأيك فى السيراميك ... تعرف قولتله ايه؟
انا : قولتله ايه؟
النجار: قولتله هتشيله وتعمله من جديد قالى لا قولتله يبقى جميل زى الفل
انا : بعد شوية ضحك قولتله ليه يعنى قولتله كده
النجار: اصل يا بيه هقوله البلاطه دى كانت المفروض تتعمل كذا وفى الاخر ملوش لازمه اللى اتعمل اتعمل ... انا بتدايق من اللى يجى يسأل فى حاجه اتعملت خلاص ويجى واحد يقوله دى وحشه طيب هو بيقوله كده ليه .. بيدايقه يعنى .. مهو خلاص اللى اتعمل اتعمل نزعل الراجل من الشغل اللى اتعمل ليه
انا : ههههه نظريه بردو
وقعد يلوك فى اى كلام لغاية ما خلص والحمد لله انه خلص لان ودنى كانت خلاص صفرت من كتر كلامه بس والله كان مسلى اكتر من كيس لب ههههههههههههههههه

نيجى للشق التانى بقا الحلاق
انا على غير العاده روحت احلق عند حلاق عجيب كده بس قولت اغير وشوفوا بقا التغيير ودانى لفين
كنت رياح احلق الساعه 12 بالليل وانا بحلق دخل زبون وده الحوار بينه وبين مصطفى ( الحلاق)
الزبون: ازيك يا درش
مصطفى: اهلا ازيك يا باشا
الزبون : ايه لسه قدامك كتير
مصطفى : اه لسه قدامى اتنين غير الزبون اللى معايا
الزبون: يعنى ايه مش هلحق احلق
مصطفى : وانت مستعجل ليه ماتقعد
الزبون: انا لسه جاى من السفر وانت عارف بقا انى بقالى كتير بعيد عن المدام وعاوز اعمل حاجه انهارده
مصطفى: ياعم وهو لازم يعنى تحلق دقنك انهارده ماتدخل كده وايه يعنى
الزبون: لا ياعم انا معودها على حاجه ومعودها على النضافه مينفعش ادخل عليها كده
مصطفى: ياعم مانت ممكن تيجى تدخل عليها تلاقى الحاره سد هههههه ابقى ادخل بقا من الحاره التانيه ( وفضل يضحك شويه)
الزبون :( بدون ادنى مبالاه ) خلاص بقا هنام انا بره الاوضه انهارده ... سلام
مصطفى : سلام
انا بقا قعدت دماغى تروح وتيجى تلف وتدور وعاوز اكلم الحلاق ومتردد وبعدين قولت الساكت عن الحق شيطان اخرس كلمته شويه وده كان الحوار

انا: انت كنت بتتكلم بجد يا مصطفى ولا ايه
مصطفى : بتكلم بجد فى ايه يا بيه
انا : فى موضوع الحاره التانيه
مصطفى : ايه يا بيه وماله هى مش حلاله يبقى اى حاره وخلاص
انا : (الدم نفض فى عروقى ) دانت بتتكلم جد بقا ...... يا اسطى ما ينفعش حراااااااااااام
مصطفى : يا باشا حرام ليه بقولك حلاله
انا : انت مش مسلم بردوا
مصطفى : اه الحمد لله
انا : ولو حتى مش مسلم بس مينفعش ده اللى يعمل كده يقى خرج عن ملة الاسلام
مصطفى : ازاى يا بيه
انا : مسمعتش الايه ... بسم الله الرحمن الرحيم ( نساؤكم حرث لكم آتوهم انى شئتم )
مصطفى : مالها دى يا بيه
انا : دى معناها فى اغلب التفسيرات عن مكان الجماع اللى هو القبل وليس الدبر وفى حديث عن الرسول صلى الله عليه وسلم فيما معناه ... من آتى امرأة فى دبرها فقد خرج عن ملة محمد ... شايف لدرجة ايه يعنى محرم لدرجه متتوصفش
مصطفى : انا اول مره اعرف الكلام ده
انا : واديك عرفت وابقى اسال فى الموضوع ده لو متعرفش ده ليه اضرار عليك وعلى مراتك ده غير الى قولتلك عليه

وبعد كده سكتت وهو سكت وانا محبيتش اتكلم اكتر من كده علشان ميزهقش منى ولانى وصلتله اللى انا كنت عايز اوصله
بس تفتكروا ان وصل بينا الجهل والتخلف للحد ده
حتى ديننا مبقيناش نعرف فيه
وغير ده وده الاكتر فظاعه ان واحد بيتكلم عن زوجته مع حلاق وبالشكل ده وعادى خالص مفيش اى اهتمام
انا بجد مش عارف اقول ايه
بس ياريتنا نستغفر ربنا يمكن يقبل مننا وندعيلهم ربنا يغفرلهم ويهديهم
26 تعليقات
  1. انا اول مره اعملها واعلق على نفسى
    بس حبيت اوضح حاجه
    الموضوع ممكن يكون جىء شويه بالزات فى الجزء الاخير بس بجد انا كنت لازم اتكلم فيه لانى لاحظت ان فى ناس كتير بقت واخده الموضوع عادى
    واسف لو كان كلامى ضايق حد


  2. fire bird Says:

    أولا لاحرج فى الدين

    يمكن كلام النجار مبلوع وواقعى

    ==========================
    فى الجزء التانى
    انا مش بعتب على الحلاق
    انابحتقر المتخلف اللى يتكلم بالطريقة دى عن مراته او يسمح لاى مخلوق يتكلم عليها كده

    المفروض ان اى شىء بين الزوج وزوجته دا منطقة محرمة على اى حد غيرهم

    وحسابه عند ربنا عسير جدا
    ========================
    انا دلوقتى فعلا اقتنعت ان الرجالة قربوا ينقرضوا

    الرجالة كانت زمان لما كان الراجل لايذكر اسم زوجته قدام الغرباء حفاظا عليه قبل ان يكون حفاظا عليها

    ===============================
    لكن دلوقتى
    الدنيا بقت سبهللة على الاخر
    ومفيش احترام لاى حرمات
    كل الدنيا مفتوحة على بعضها
    يعنى ياعالم ايه اللى ممكن يحصل بعد كده
    ===================================
    بصراحة
    ربنا يرحمنا برحمته


  3. nody_1987 Says:

    يا نهار اسود
    هو والحلاق
    وادامك
    وعلى مراته
    تصدق بالله دا عيب عليهم كلمه ذكر الى مكتوبه فى البطاقه
    وكمان ناس جاهله
    يعنى غباء وحقاره وجهل
    ماتروحش عند الحلاق ده تانى


    وبعدين اخدتنا فى الغلبه
    وقلت الفرح الدعوه عامه
    ماقلتش فين
    ماهو مش معقول اروح طلخا وادور فى قاعه قاعه على اخو عايش ولكن
    هههههههههه مبروك لاخوك
    وعقبالك ياهندسه


  4. mero-moory Says:

    السلام عليكم ورحمة الله وبركاته

    موش هعرف أرد في الموضوع ده عشان إنت عارف رأيي بس حبيت أوضح نقطتين بالنسبة لقصة النجار ده عجبتني جدا المقولة اللي قالها بجد رااااااااائعه وأول مرة أسمعها

    النقطة التانية بالنسبة لجزء في رد فاير بيرد ملحوظة هي المفروض لا حياء في العلم وليست لا حرج في الدين
    لأن ديننا أهم ما يميزه حاجتين التسامح والحياء
    والله نفسه حيي ويحب الشخص الحيي يعني ذوي صفات الخجل والحياء
    لكن العلم مباح فيه كل شيء وليس فيه حرج

    لكن مقولة لا حياء في الدين دي غلط

    ميرسي على موضوعك يا علاء موش ليا تعليق أكتر من إن ربنا يرحمنا برحمته وللأسف الرجالة نسبه كبيرة بقوا اسم ع الفاضي وموش عارفين يعني ايه كلمة ذكر راجل مسلم موحد

    ربنا يرحمنا ويهدينا لما يحبه الله ويرضاه
    في رعاية الله


  5. enjy Says:

    تصدق بالله؟؟؟
    انا عمرى ما جيت هنا الا واستفدت ولقيت كلام عليه القيمة..........
    النجار دة اتعلم ازاى ولسة بيقول نحو الامية؟؟؟
    الحلاق مش جاهل بس على فكرة الحلاق و زبونه ماعندهومش نخوة....... اللى يقبل يقول كدة سيبك من جهل الدين والدنيا وكل دة لكن دة فقد نخوته و انسانيته.......انا لله وانا اليه راجعون


  6. نونو Says:

    عاااااااارف انا بصراحة
    النجاااار عاااادى
    لكن الحلاق فين الرجولة
    فين النخوة هو اللى بيجرى فى دمهم اية دى مراتة يا نهار
    الله يرحمك يارجولة
    اقراوا الفاتحة عليييها
    خلاص الجهل انتشر للدرجة ربك اللى بيسترر
    الف مبروووك لاخوك وعقبالك


  7. kochia Says:

    الناس فاكرة انها نباهة وشطارة ورجولة انها تتكلم كدة
    فاهمين كل حاجة غلط
    مش بتنظر بقي للصح والحرام والعيب والتقاليد
    وبتكلم عن نقطة انهم يحكوا ويتناقشوا كدة عن بيتوهم وزوجاتهم قدام حتي الناس بلا حياء ولا خجل
    غريبة اوي

    اما موضوع ( نساؤكم حرث لكم آتوهم انى شئتم )
    مش عارفة مين اللي يتحاسب علي الجهل ده
    زمان كانت الناس بتسال الشيوخ لانها مش بتقرا
    دلوقتي معظم الناس بتقرا والتليفزيون مش سايب حاجة
    واعتقد ان بعض الجهلاء كهذا الحلاق قرر انه ميسمعش الا اللي يعجبه
    او قرر انه لا يفهم الا اللي يفيده
    وده حال ناس كتير للاسف

    اما النجار
    عجبني بس قريبه اللي دوب الفاس
    تحياتي


  8. fire bird
    مش كل الرجاله كده بس انا بس كان سؤالى وصلنا خلاص للدرجه دى من التخلف وعدم معرفه اى شىء حتى عن ديننا
    يلا ربنا يرحمنا برحمته
    شكرا لزيارتك الرقيقه
    ..........................
    nody
    انا قولت الدعوه عامه
    وانا مش من المنصوره نفسها انا من ميت غمر لو تعرفيها والميل بتاعى على البروفيل اللى هينوى يحضر يعرفنى وانا ابعتله عربيه مخصوص تجيبه ههههههه


  9. مريم
    دايما منوره مدونتى كده
    انا عارف رأيك بس الباقى ميعرفوش رأيك ههههههه
    ربنا يرحمنا جميعا
    ..................
    انجى
    والله انتى بتدينى زياده عن حقى
    النجار يا ستى صعب يقول محو الاميه لانه بقاله 40 سنه بيقولها كده خلاص هيجى دلوقت ويغيرها هههه
    النخوه والرجوله هو ده الحد الفاصل اللى بقينا بندور عليه
    .......................
    نونو
    متشكر جدا وعقبالك انتى كمان
    مش هتحضرى الفرح بقا هههه
    .......................

    kochia
    كلامك بجد لخص شويه من اللى كنت عايز اقوله
    شكرا لزيارتك مدونتى المتواضعه وارجو تكرار الزياره


  10. السلام عليكم
    البوست بتاعك دا فتح كذا نقطة الواحد ممكن يعلق عليها بجد
    اولا لو جينا للنجار
    انا عجبنتى فلسفته فى التعليم وحتة انه يحط مناخيره فى كل حاجه ويعمل نفسه فاهم كل حاجه فدا شئ عادى جدا ومش جديد على الشعب المصرى.
    بص جرب تركب مع اى سواق تاكسى كدا بس ربنا مش يوقعك فى سواق زى اللى ركبت معاه لانك هتكره نفسك لو ركبت مع حد زيه هتلاقى السواق يكلمك فى كل حاجه فى البلد.

    ..........
    لو جينا لموضوع الحلاق ودا المصيبة الكبرى بقى
    اولا احب احييك بجد جدا على موقفك الجامد دا لانك مش كنت شيطان اخرس زى ما ناس كتير بتطنش وكمان انت كدا انرت دماغ واحد جاهل كان بيفعل فعلة تغضب الله وان شاء الله ربنا يجازيك خير عن كدا
    ثانيا
    انا بستغرب ان فى ناس كدا مش تعرف امر بسيط من امور الدين زى كدا المفروض اى مسلم يكون يعرفها واللى بستغربه اكتر مع انتشار السيل الفظيع مع القنوات الاسلامية وانتشار المساجد ان راجل زى دا مش عارف الحكم دا
    يعنى الحلاق دا على ابسط الافتراضات عمره ما راح صلى صلاة الجمعه يعنى هل عمره ما سمع الحكم دا.


    سلاموز


  11. Sara Says:

    تحياتي أولا واشكرك على زيارتك لمدونتي جدا

    بجد انا كان عاجبني المووضع اللى بتتكلم فيه جدا والهل والبوست كان حلو قوي لغاية ماالدم غلى في عروقي وبقيت مش طايقة نفسي
    وبصراحة بلومك كان أول حاجة تقولها للحلاق قبل ماتصححله المعلومة تقوله اذ ايه حرام برضه الراجل يتكلم عن اسرار بيته واسراره الخاصة كمان
    بجد مش تتخيل صدمتي واحد جاي يتكلم مع شخص غريب عنه وبعيد عنه كل البعد عن حاجات مينفعش يتكلم فيها مع حد اصلا غير لو كان متخصص او لعلاج مشكلة ما
    بجد والله مش فاهمة هو واخد لقب راجل على ايه وازاي يسمح لحد يقول عن مراته كده

    حسبي الله ونعم الوكيل


  12. اولا البوست جامد
    بجد
    بس حعلق اقول ايه
    يعنى ابلغ تعليق ممكن يطلع منى
    للحلاق
    (دااااام يووووووو)
    على رأى هيثم دبور
    و اقوله كمان
    على رأى احمد حلمى فى ظرف طارق
    (يا مان واطى انت)
    و اقول للنجار
    (القرع لما استوى قال للخيار يا لوبيا)
    و (الارض كروية)
    و كمان ضيف تعليق nody على تعليقى يبقى كده التعليق برضوا مش عاطى للموضوع حقه
    تحياتى
    اسلام


  13. السلام عليكم و رحمة الله و بركاته:
    علي فكرة فيه ناس كتيير للأسف زي النموذج ده و بيكلموا في حاجات أخطر من كده و كمان للأسف ممكن يكونوا ستات . علي الرغم من أن (الله تبارك و تعالي)حذر من ذلك و كذلك رسولنا الكريم (صلي الله عليه و سلم)، وربنا يجازيك خير أنك اتكلمت معاه ووضحتله.
    علي فكرة مدونتك الإسلامية حلوة بجد ...و ياريت تكتب فيها علي طول..ربنا يوفقك.


  14. بصراحه النجار رائع

    وان عصاية الفاس اتنحتت مع الصبر

    ما اروعه تعبير يعنى

    اما الحلاق .... ربنا يهديه ويهدينا جميعا


  15. دواير Says:

    أولا مبروك على الفرح وان شاء الله يتمم على خير..

    وثانيا عجبني اوي كلام النجار حلو جدا لما تلاقي الناس البسيطة دي بتتكلم بالحكمة دي .ده بيحسسك ان فعلا الانسان اتخلق على فطرة سليمة بس هو اللي بيبوظها.......

    اما الموضوع التاني فمتهيالي ده اكبر دليل على اننا مش بس ضيعنا دينا لا واخلاقنا كمان....


  16. وحشتنا بوستاتك


  17. appy Says:

    لااااااااا الحوار الاولانى فيه الحكمه بتاعت النجار واصرارة على التعليم عجبنى
    انما التانى ايه القرف ده ممكن حد يتكلم كده ولا ايه لا صعب اوى


  18. Cold air Says:

    علاء السلام عليكم يا هندسة
    أنا حازم شرف هندسة الزقازيق و بجد أنا فرحان أوي بالتعرف علي مدونتك الجامدة دي و بالنسبة للبوست انا هعلق علي حاجتين اتنين بس

    انتا في البوست ده اتعاملت مع أكثر الناس رغيا علي الإطلاق طبعا بعد النساء ^_^ وهما ( العمال-الحلاقين)

    و بالنسبة للنجار فربنا يصبرك علي كلامه
    و بالنسبة للحلاق هقولك نعيما بس

    مع تحياتي يا علاء و بجد عايزك تنورني


  19. ازيك يارب تكون تمام

    اولا البوست حلو جدا وابارك لاخوك وربنا يسعدة

    اما البوست مش جرىء ولا حاجة لانك بتوصف فى حقايق وبكل اسف فعلا حاجة تدايق ان زوج يتكلم عن زوجتة باى شكل من الاشكال لان الست دى امانة فى ايدة من كل حاجة لازم يصنها امال ازاى يكون رجل بس اللى بيعمل كدة مبيكنش .............


    وبصراحة دة اكتر جزء دايقنى فى البوست من الراجل دة بجد مفروض مقلش راجل بس للاسف دة اللى بيميزة عن الست اسم بس

    تحياتى لسردك الجميل


  20. maryooom Says:

    والله ياسيدي الناس اللي هما نجارين ونقاشين وبتوع سيراميك بيبقوا غلابة جداً اصل محسوبتك (متفتكرش إني في الصنعه) شغاله في شركة عقارات وبنعمل تشطيبات
    اما الموضوع التاني انا شايفه ان ناس كتير قالوا اللي كنت هاقوله بس بجد الراجل اللي يتكلم عن مراته مع ميستحقش يعيش


  21. almasry Says:

    لا ده الحلاق ده أى كلام فى واحده ست هتدخل جوزها حاره سد؟



    شرفتنى زيارتك


    تحيـــــــاتى
    المصــــــــرى


  22. بوست قوى جدا.. موضوع الفاس فية تامل عالى.. اما موضوع الحلاق فمتهيالى انة اصلا ما يصحش الكلام دة يتقال على الملا كدة.. وان كانت حلالة مااختلفناش بس برضة الحيااااء
    دمت بكل ود


  23. Desert cat Says:

    النجار ده دماغه حلوة اوى وشكله من الناس اللى بتعيش علشان تتعلم ومش بتخلى كلمة تعدى عليها غير لما تفكر فيها والناس حقيقى ربنا يكترهم فى المجتمع
    بالنسبة للحلاق ومصطفى فقمة فى قلة ادلاب ومصطفى اكتر لانه انسان مش امين على اهل بيته
    تحياتى


  24. totaaaa Says:

    انا عجبنى اوى النجار لانه رغم انه انسان بسيط اوى لكن قادر يبص للامور بنظرة منطقية جدا ممكن ماتلاقيهاش عند ناس كتير معاهم شهادات
    اما الحلاق ده بقا فانا ماعنديش تعليق عليه الصراحة بس اللى غايظنى الرجل اللى بيتكلم عن مراته وبيته كده عادى خالص ..حاجة تنرفز جدا

    ومبرووووك لاخوك عقبال مانفرح فيك قريبا
    (:
    سلام ياعلاء


  25. rara Says:

    فعلا فى ناس كدا
    سبحان الله ناس كتير بتاخد
    الكلام عادى ومتعرفش انه حرام
    ربنا يغفرلهم ويسامحهم