عايش... ولكن !!!!
مرت شهور على بعدنا وراجعه تقول انا زى مانا
لا فيوم نسيت انا حبنا ولا لحظه قلبى نسى وعدنا
دنا حبى ليك دايما فى بالى وسهرت الليالى فى بعدنا
من كلامها قلبى رجع يحن تانى لحبها
داقت مرار آل ايه وانا بقول ده قاسى قلبها
فاكرها نسيت حبنا وبحاول انسى عشقها
وبرغم فراقى ليها مقدرتش انسى فى بعدها
اول ما سمعت صوتها مبقتش مصدق انها
حسيت ساعتها انى ملاك طاير بعيد فوق السما
ولقيتنى بندم ع اللى ضاع من يوم بعادى وبعدها
ونبض قلبى صوته عالى لسه بينطق اسمها
ولقيتنى بقول باعلى صوت انى لسه بحبها
تحديث

مرت شهور على بعدنا وراجعه تقول انا زى مانا
لا فيوم نسيت انا حبنا ولا لحظه قلبى نسى وعدنا
دنا حبى ليك دايما فى بالى وسهرت الليالى فى بعدنا
كلامها ده نسانى حالى ... خلانى افكر من جديد
ازاى فى يوم انا كنت قاسى... واخترت انى اكون بعيد
داقت مرار آل ايه وانا ... بقول دى قلبها من حديد
فاكرها نسيت وعودها ليا فبعدت وقولت هعيش وحيد
اول ما سمعت صوتها ... حسيت كأن اليوم ده عيد
يادوب قالتلى الكلمتين ... لقيتنى توهت فى دنيا تانيه
لا منى ملاك ولا منى بشر.. احساس بجد غريب عجيب
بكلمه منها نسيت آلآمى ... نسيت كأنى مولود جديد
ولما كان الكل سكوت.... لسانى قالها بأعلى صوت
ياروحى وقلبى وكل ما ليا .. بعدك انتى مليش حبيب
****************************
.... وعجبى....
عايش... ولكن !!!!

بعد طول غياب ... رجعتلكوا ببوست اعتقد انه هيعجبكوا
الحب الاول (زى ما بيقولوا عليه)
بس انا بقول عليه الوهم الاوحد
طيب ليه الاسم الجامد ده ..... اقولكوا
وهم لانه مبيبقاش فى معظم الحالات حب بجد بيبقى الشخص واهم نفسه
واوحد لان معظم التجارب اللى بعده بتبقى حب صادق
طبعا فى كتير منكوا معترضين على اللى بقوله بس ياريت تكملوا معايا البوست وانا هشرحلكوا وجهة نظرى
مين مننا مكنش اول حب ليه فى فترة الثانويه ان مكانش قبلها؟؟؟؟!!!
هتقولولى وده صلته ايه بالموضوع ... اقولكوا ده هو صلب الموضوع
طيب ليه ياعم علاء؟؟ ...
الفتره ده فترة عدم اتزان بالنسبه لأى انسان مراهقه زى ما بيقولوا عليها
فان كانش اعجب بحد بيبقى زى ما بيقولوا كده عمال يدور على اللى تناسبه او اللى يناسبها
وبمجرد ما بيلاقى حد متوافق معاه بيبقى عاوز يجرب الشىء اللى بيسمع عنه ده اللى اسمه الحب
ده غير ان سننا مبيبقاش مساعد ان الواحد او الواحده تكون متانيه فى اختياراتها وتقدر تحكم صح
وطبعا اللى بياكد كلامى ده ان 99% من القصص الحب اللى مبتكملش بتبقى فى الفتره دى
ده ان مكانش كلها ... انا مش عاوز ابقى قاسى فى حكمى لانى بلاقى واحد فى المليون
هو اللى بيكمل فى القصص اللى بتبقى فى الفتره دى
طيب تيجوا اقولكوا رأى واحد من اعظم من قريت رواياته وقصصه فى الحب
الكاتب الكبير احسان عبد القدوس ,, له راى فى الموضوع ده بيقول
فى حياة كل انسان وهم كبير اسمه الحب الاول
صدمه طبعا للى كان بيعارضنى فى اول البوست
اكيد لانه كاتب مشهور ورأيه ليه وزنه
ده غير ان معظم رواياته وقصصه عن الحب
بس انا مقدرش انكر ان مش دايما القصص بتفشل بس انا بقول ان معظمها
وانا مش هتكلم فى موضوع الا لما اكون عارف انا بتكلم فى ايه
وعلى فكره انا بتكلم ومقتنع باللى بقوله لانى بتكلم عن تجربه شخصيه
ايوه اول حب ليه كنت واهم نفسى
المهم انا مبحبش بوستاتى تبقى طويله علشان اللى بيقراها ميملش بس انا قولت المختصر المفيد
كان عندى نصيحه بس لاى بنت وانا بقول اى بنت لان الشباب معظمهم بيعرفوا يعملوا اللى هقوله
متحاوليش تحكمى فى المواضيع اللى زى دى بقلبك بس
خلى الحكم الاول لعقلك
انا عارف ان المشاعر عند البنت بتتحكم اكتر بس لو حكمتى عقلك تقدرى تكسبى حاجات كتير اوى
بدل ما تخسرى كل حاجه
وعموما تحياتى لكل اللى قرا البوست ده
ومستنى ردودكوا
و.... عجبى ......