عايش... ولكن !!!!
كلمه لفتت نظرى
وانا خارج مع اصحابى كعادتنا بالليل لفت نظرى كلمه لقيتها على محل ترزى (خياط) لقيته كاتب على المحل
انا فصلناه تفصيلا
بجد استغربت من الجمله
ايه جاب الاياه القرانيه للشغل بتاعك
وبعدين لو انت راجل تقى اوى كده
طيب ما تكنب الايه كامله
وياريت جت ع الترزيه بس
انا لقيت محل تانى بتاع مفاتيح كاتب
انا فتحنا لك فتحا مبينا
فكرونى بواحد كان الشيخ بيسأله انت مش بتصلى ليه
قاله مهو ربنا هو اللى امرنا اننا منصليش
الشيخ استغرب ازاى انت بتقلف جبت الكلام ده منين
قاله مهو من القران ياعم الشيخ
مش ربنا بيقول
يا ايها اللذين امنوا لا تقربوا الصلاة....؟
عجبى
طيب يا عم الفتك ماتكمل الايه
يا ايها الذين امنوا لا تقربوا الصلاة وانتم سكارى..... ............ الى اخر الايات الكريمه
اهو احنا بقينا كده بناخد اللى بيعجبنا
واللى ميعجبناش بنعمل نفسنا مش شايفينه
وبنفسر كل حاجه على مزاجنا
........... وعجبى .........
10 تعليقات
  1. فكرتني
    بالخضري اللى بيبيع طماطم متفعصة و بايظة و كاتب "كلوا من طيبات ما رزقناكم "

    و بتاع عصير القصب اللى كاتب "وسقاههم ربهم شراباً طهوراً "

    و البقال اللى معلق لوحة كبيرة فوق تلاجة اللبن كاتب عليها
    "لبناً سائغاً لذة للشاربين "


    جهل و تخلف

    و عجبي


  2. doha Says:

    هههههههههه
    اهو ده الهم اللى يضحك بجد
    صح والله
    انا بقيت اشوف الناس بتستخدم الايات القرانية
    فى غير محلها
    حاجة تقرف
    بجد
    جهل جهل جهل جهل
    وعلى رايك
    عجبى
    تحياتى ياصاحبى


  3. بص ما تقول جهل 0 أتكام من هنا لتانى يوم الكلام مش هيخلص0 جهل يعنى كل حاجة بايظة0بزمتك ايه يعنى الى نافع عندنا0الناس عقولها واكلاهاالبرومة على الاخر0فقف ياصديقى نحن فى زمن الدروشة الى على أصلها


  4. مدونه تحت العشرين
    دوحه
    وبينى وبينى
    منورين والله مدونتى المتواضعه
    تحت العشرين :: انا نسيت احط الباقيين دول كويس انك فكرتينى
    دوحه يلا على رايك جهل
    بينى وبينى مشوفتكيش من زمان عندى فى المدونه ياريت متقطعيش عنا نورك
    شكرا ليكوا


  5. معلش
    مش ذنبهم.. الذنب على غياب الثقافة الدينية والوعى الدينى

    كفاية عليهم المفتى وفتاواه الاخيرة

    بوست هادف وجميل,, ولو انى كان نفسى تكمل .. فيه آيات كتير اوى للأسف مفهومة خطأ وتستعمل فى الهدف الخطأ.

    ربنا يرحمنا جميعاً
    وجزاك الله خيراً لانك أخدت ثواب من كل قارئ للبوست الجميل ده

    كاميليا


  6. yomna Says:

    الموضوع ده فعلا بقى منتشر و بقت حاجة مش لطيفة خالص

    لا و الجديد بقى انك بتلاقي الايات دي على عربيات النقل التقيل...

    و الغريبة اكتر انك لما تدخل محل من المحلات دي اللي مفترض ان اصحابها ناس متدينة تلاقيهم بيبيعولك حاجات بايظة و صاحب المحل المتدين الورع لو اتكلمت معاه هيكشرلك عن انيابه و ساعتها مفيش مفر غير انك تدبس في الحاجة و تقوله روح يا شيخ منك لله


  7. موجة Says:

    هههههههه عندك حق .. وعجبي
    انتا فكرتني بمصنع اسمه السفينة .. من غير ذكر أسماء .. في اخر الدقهلية على حدود القليوبية .. من غير ذكر عناوين ههههههههه
    كاتب : فأما السفينة فكانت لمساكين هههههههه


  8. موجة Says:

    ايه ده يا علاء .. انتا من ميت غمر .. انا من دكرنس يا بيه .. بلديااااااااااات يعني ههههههههههه


  9. كاميليا
    يمنى
    موجه
    منورين مدونتى المتواضعه
    سوررى لانى مبقتش لاقى كلام اقوله لانى خلاص خلصت كل الكلام اللى يتقال فى البلد اللى من اصغر حاجه لاكبر حاجه بقت بتعجز الواحد عن كل حاجه
    انا بتكلم دلوقت كده لانى عرفت انهم احتمال يشيلوا الدعم
    هتلاقوا الكلام ده فى البوست الجاى
    شكرا لزيارتكم
    وتحياتى
    علاء