عايش... ولكن !!!!



كان ياما كان يحكى انه فى سالف العصر والاوان زار المدعو علاء صديقته المدونهfire bird
فوجدها قد دبسته فى تاج طويل عريض .... وربنا يسترها معانا بقا ويعديه على خير

أذكر ستة أسرار قد لا يكتشفها من يقابلك لأول مره!!!؟
1-عقلانى
مبقولش اى كلام وخلاص كل كلمه بتخرج منى بفكر فيها قبل ما اقولها
2- طيب وشرير
بتعامل مع الكل بحسن نيه الى ان اتأكد من سوء نيته المعامله بتتغير تماما وتلاقى واحد تانى غيرى
3-واقعى
مبحبش اعيش فى الخيال كتير برغم انى بعيشه فى كتاباتى
4- فضولى
بحب اجرب اى حاجه واعرف حاجات كتير عن كل شىء ومبقتنعش الا لما بجرب
5- بحب الضحك زى عنيا
بحب اضحك كتير حتى لما اكون متضايق بحاول اضحك علشان اخبى الى جوايا
6- كتوووم جدا
صعب انى اقول اللى جوايا لأى حد بسهوله حتى لو متضايق من حاجه مبشكيش


سبع حاجات نفسى أعملهم!!!
1- اقرب من ربنا
2- احفظ القران
3- الاقى مصر بتتقدم مش برتج لورا
4- ابقى مشهور
5- احب (اصعب حاجه ممكن تحصلى ) بجد
6- يكون معايا عربيه اخر موديل
7- ابقى رجل اعمال ( انا حققت نص الحلم وبقيت رجل لسه مستنى الاعمال ) ههههه



سبع حاجات معرفتش أعملهم!!!

ده سؤال غلس اوىىىىى
1- معرفتش اخد الكليه فى 5 سنين زى ما هى هههه
2- معرفتش احب حد كان بيحبنى
3- معرفتش ارجع فى حاجات كدبت فيها(بس خلاص بسبب ده مبقتش بكدب ) " رب ضارة نافعه
4-معرفتش اعيش لنفسى دايما بفكر فى غيرى قبلى
5- معرفتش اعلم نفسى انى مخرجش عن شعورى لما اتنرفز
6- معرفتش اجمع بين كل حاجه انا عايزها حاجات كتير موصلتلهاش
7- مقدرتش اعرف انا ميييييين؟!!!؟
8- معرفتش انى اكره حد
يلا اى خدمه 8 اهو مش 7 بس ههههه


سبع حاجات دايما بقولهم !!!؟
1-ايه الاخبار
2- ماشى؟
3- وكده
4- فاهمنى
5- قشطه
6- ياراجل
7- كبر الجمجمه


سبع مشكلات فى حياتك ممكن تحلهم بالفلوس!!!
كل مشكله قابلتنى او هتقابلنى عايزه الفلوس علشان تتحل


سبع أماكن بتحبها!!!
1- بحب اسكندريه عامة
2- فندق انتركونتينتال ابو سومه بحب القعده هناك بالليل
3- بلكونة غرفتى
4- اى مكان بيطل ع النيل
5- اى مكان بيجمعنى انا واصحابى
6- الكعبه الشريفه
7- مش فاكر بقا كفايه كده بس انا اى مكان بحس فيه بطمأنينه بحبه اوى


سبع أشخاص بحبهم غير بابا وماما واخواتى!!!

دول كتير اوى بصراحه بس ممكن اذكر منهم البعض
يعنى بعيدا بقا عن بابا وماما واخواتى
محمد وميزو وسامبو واحمد وايمن و... و... وكمان ميرو وشيمو.... (اصحابى كتير بصراحه)
ولو قعدت اعد فى اللى بحبهم مش بس اصحابى يبقى مش هلاقى حد يقرا البوست ههه اصله هيبقى طويل اوى لانى مش بعرف اكره حد


سبع حاجات بحبهم قوى!!!
1- الشعر العامى
2- بعض الشعر الفصحى ( قليل بصراحه )
3- اى حاجه بينى وبينها عشره زى جهاز الكمبيوتر والموبيل مثلا
4- الاطفال بس لما بيرخموا ببقى هاين عليا اولع فيهم
5- اى اغنيه لعمرو دياب
6- اغانى افينيسيس وسيلين ديو وباك استريت وبعض الاغانى الراب
7- المدونه دى


سبع مدونات بتحب تقرالهم!!!
ده بقا اغلس سؤال بصراحه
وبما انى مبحبش اهرب كتير من الاسئله وبحب اواجه اى سؤال يبقى هجاوب
بس هنبحبها شويه بدل 7 مدونات خليهم 15
هههههه بس بردو قليلين طيب هكتب بقا والعدد يجى زى ما يجى ولا اقولكوا بصوا على شمال المدونه هتلاقوا مدونات صديقه هما دول اكتر مدونات انا بحب ازورها
فى مدونات صحيح لسه مضيفتهاش لانى لسه عارفهم قريب بس لسه بعمل ليست بيهم وربنا يقوينا



تمرر الواجب/التاج لمين؟
لازم يعنى التدبيس ده
طيب بصوا انا عارف ان كتير مننا مشغول اللى يعرف يحل يحل واللى ميعرفش يخليه بعد رمضان بس هيحله هيحله مش عاوزين كسل

كاتب مصري
PrInCeSS BeRy
EMMY BABY
حسن حنفى
mero-moory
enjy
oRiGiNaL HeArT
عايزه اتطلق و
كاتب مصري
د/اجدع بنوته



54 تعليقات
  1. نسيت تقول كمان انك دبلوماسي :))

    جميله اجاباتك ...

    بس انت سؤال واعتبره تاج لوحده

    انت عايش ولكن ...

    لكن ايه :) ؟!

    اول رد لأول مرررررررررره

    لولولوليييييييييييي

    ----------

    ليكوريكا


  2. بجد اجابات متميزه

    ربنا يباركلك يارب

    انا ان شاء الله هحل التاج قريب

    البوست الجاي ان شاء الله

    يارب يحقق كل امانيك

    يارب


  3. EMMY BABY Says:

    ياخرااااااااابى ياعلاء

    حرام عليك

    والله انت عارف ساعة لما حليت التاجين كان نفسى ادبسك اوى اوى اوى بس افتكرت انك حلالهم قلت مصيرى هدبسك

    تروح انت اللى مدبسنى ماثى ماثى

    بس والله اجاباتك تظهر انك شخصية نقية اوى طيبة اوى

    اجاباتك جامدة وفى اسئلة عرفت تزوغ منها هههههههههههه زى 7 مدونات بتحبهم

    بس صفاتك حلوة ممكن توصل بيها ان شاء الله انك تكون راجل اعمال ناجح زى الكتمان والواقعية

    وكمان انت حاولت تكره معرفتش ده يزعلك مفروض تفرح

    ايه الرغى اللى برغيه ده طول عمرى رغاية

    ههههههههههههههه

    سلام

    تحياتى

    ايمى


  4. ليوريكا
    اه تصدق نسيت دى :))
    عايش ولكن
    مين فينا بقا دلوقت مش عايش ولكن؟
    شكرا لزيارتك
    ******************
    حسن حنفى
    شكرا يا ابوعلى انت زوق دايما
    هستنى حلك للتاج


  5. EMMY BABY
    ربنا يكرمك يا ايمى يلا معليش بقا تبقى فى ايدك وتقسم لغيرك ههههه
    ادينى مستنى الاعمال بقا علشان اكمل الموضوع وابقا رجل بأعمال :))
    هستنى حلك للتاج


  6. ايوه ياعم على الاجبات وعجبتنى جدا كلمه عقلانى ؟
    عموما تاج سعيد


  7. صوت من مصر
    عجبتك عقلانى طيب استنى الفهالك فى ورقه :))
    نورتنى


  8. Gelaan Says:

    اسم مدونتك تحفه
    بجد حلو جدا
    عايش ولكن
    زى مابيقول
    عاقل ولكن


    ***
    اجاباتك حلوة
    حاساها صريحه وفي مكانها
    شكلك مش بتحب تزعل حد خالص
    وعندك لازمات كلاميه كتيرة ماشاء الله
    هههههههه
    تقبل مرورى
    وفقك الله لما تحبه وترضاه
    سلاااااام
    ج
    ي
    لا
    ن


  9. princess Says:

    احم احم
    انا جيت ارد الزيارة وجيبالك بلح معاياهههههه اه بلح اللى لقيته
    اجابات جامدة
    وبعدين كده مش هعرف اسالك انت مين عشان انت نفسك مش عارف انت مين هههههه
    ولما بتبقى شرير بتبقى ازاى :)))
    تحياتى


  10. ليه هما سجارتين فرط ولا ايع يا بيس
    بس عموما
    نورت البلوج عندى بكلامك الجميل ؟


  11. ازيك؟
    بجد صريح اووي وجرئ
    وكمان عجبتني اجاباتك جدااااا
    بس ليه انت كاتب احب(دي اصعب حاجه ممكن تحصلي) عادي عادي يابني بتحصل كتيييييييير
    ههههههههههههه
    يلا ربنا يوفقك ويرزقك بالللي تستاهلك
    قول ااااااامين
    هههههههههههه
    أختك شيتوس


  12. MaGn0liA... Says:

    اجاباتك حلوه

    سلام


  13. كيارا Says:

    انا كنت جايه اطمن

    بس لاقيت تاج قلت بقي اقرأ

    ايه الاكابات الحلوه دي

    لالالالا برافو عليك بجد

    بجد اسئله كتير طحن


    كل سنه وانت طيب


  14. أول سؤال في التاج بتاعك جاوبته في تاج تاني في مدونة كأني أتكلم قبل كده دور وهتلاقي الباقي هأرد عليه بس استنى عليه شوية عقبال ما يجي العيد وآخد نفسي من الرواية الي بأكتبها وهأجاوبه بمخمخة كده
    كل ودي وشكرا ع التدبيسة دي


  15. حنين.. Says:

    السلام عليكم
    دى اول زياره ليا للمدونه
    وان شا ء الله مش الاخيره
    وعجبنى فى اجباباتك على التاج(سبع حاجات دايما بقولهم !!!؟.ههههههههههه لانى انا كمان كتير جدا بقول( وكده) وماشى, كتير اوى
    ويارب ان شاء الله تحفظ القران
    وانا عندى فكره لحفظ القران( ان شاء الله هحاول انفذها وانا نفعت معايا هبقى اقولها لحضرتك
    كمان قريت كتير فى المدونه الدنييه
    جعلها الله فى ميزان حسناتك
    جزاكم الله خيرا
    دمت سالم


  16. fire bird Says:

    ايه ده

    انا جيت متاخرة جدا!!!!

    يلا الحمد لله

    ايه يابنى ده

    انت فيك حاجات كتيرة شبهى

    سبحان الله

    يخلق من الشبه أربعين

    --------------------------

    على العموم يا علاء

    ربنا يحققلك كل أحلامك

    ويكملك الحلم رقم سبعة ده

    ههههههههه

    كويس انك قدرت تحقق الجزء الاول

    الجزء التانى ييجى مع الوقت

    يلا

    ربنا يوفقك ويوفقنا جميعا


  17. كم يسعدني مروري علي مدونتك الجميله

    امنياتك جميله وربنا يحققهالك كلها

    تقبل مروري

    مجنووون


  18. Desert cat Says:

    ياااااااااه التاج طويل اوى
    رقم 2 انا متفقه معاك فيها لانى كدا بتعامل مع الناس بحسن نية الى ان يثبت العكس .. ولحد ما يثبت العكس يبقى ربنا يستر بقى ومش تكون الخساير كتير
    تحياتى


  19. Habiba Says:

    ازيك ياعمو علاء
    تعرف اولا انا مبسوطه جدا لانى لقيت مدونتى فى قايمه برغم ان مش عارفاك بقالى كتير
    بجد اتبسطت جدا
    وثانيا بقى انا زيك ف حكايه حسن النيه دى وان كان مرة خالو قاللى
    دايما افرضى سوء النيه فى اللى قدامك
    لحد مايثبتلك العكس
    علشان لو طلع خاين ماتتالميش ولو تطلع كويس تفرح بيه
    كلام حلو بس مين يسمع؟ ههههههههه

    وفى حكايه العشره كمان بحب حاجاتى قوى خصوصا المكتب بتاعى
    اجاباتك وشخصيتك زى العسل ياعلاء
    تسلم يارب


  20. enjy Says:

    ايييييييييييييه دة يا عم علاء دة انت عسول خالص هو بصراحة انت باين من الاول انك عسول بس اجاباتك جميلة والله فعلا.......
    تصدق انا كنت جاية وبقول بعينك اجاوب على التاج بس اسئلته عجبتنى خالص والله مبتكر جدا و ظريف ان شاء الله هاجاوبه.......فين ياعم الهدية ايه الطناش دة؟؟؟
    كنت عاملة تورتة بالكنافة والقطايف محشية خشاف معزمتكش عليها عشان صعبت علية تاكل العك دة ماشى؟؟؟
    التورتة والبيبسى محفوظة يعنى انت بس اخطف رجلك لحد اسكندرية وكله هيبقى تمام التمام...


  21. علاااااااااااء

    هغنيلك اغنية

    حراااااااااااااام انا ما سويت لك شى

    هههههههههه

    اولا يا احلى اخ ميرسى على التاج الجامد اللى اسئلتة تحفة وجديدة وجامدة جدا وعلى فكرة فى صفات ليك قريبة منى كتير


    وانت حد طيب وجميل واخ عثل وان شاء الله اقرب وقت اجاوب التاج ربنا يخليك ليا


  22. gelaan
    متشكر على المجامله دى
    انتى حللتى التاج كله هههه
    اللهم امين
    نورتينى
    ***************
    princess
    حلو البلح
    طيب هاتى كام واحده كده افطر عليهم
    ربنا مايوريكى لما ببقى شرير بتحول ههههههه
    شكرا لمرورك


  23. صوت من مصر
    اه انت واخد بالك سجارتين فرط
    ربنا يكرمك يا باشا
    *******************
    شيتوس الاهلاويه اوى
    على فكره انا كمان اهلاوى اوىىى
    اللهم امين
    نورتينى


  24. MaGn0liA
    شكرا
    **************
    كيارا
    منورانى دايما والله
    شكرا لزيارتك


  25. كاتب مصرى
    اوكى عادى بس جاوب الباقى وانا مستنى لبعد العيد معاك
    *************
    حنين
    شكرا لمرورك ويارب نبقى دايما متواصلين يا حنين
    هستنى فكرتك لو نفعت
    علاء


  26. fure bird
    والله كويس لقيت ناس شبههى انا كنت مفكر انى فريد من نوعى هههه
    انا محتاج الدعائين دول اهم حاجه
    *********************
    مجنووون
    شكرا لمرورك
    ويارب تسعدك دايما


  27. Desert cat
    اها اهم حاجه الخساير متكونش كتير
    نورتينى
    *************
    Habiba
    يلا اى خدمه يا بيبه
    شكرا لمجاملتك ويارب دايما منورانى


  28. enjy
    انا جاى حالا اسكندريه
    حضرى التورته والبيبسى
    **************
    PrInCeSS BeRy
    ربنا يخليكى يلا يا بيرى وميحرمنيش منك ابدا والله دايما تدينى دفعه للأمام كده
    هستنى اجابتك للتاج
    سلام


  29. السلام عليكم

    الف الف مبرو ع التاج عقبالىىىىىىىىىىىى

    كل سنة وحضرتك طيب بس اية الاجابات الجمدة دى جامدة فحت ما شاء الله

    ارجوا تشريف مدونتى المتواضعة

    تحياتى


  30. canary Says:

    كل دة ؟؟
    لا وحبايبك واصحابك كتير كمان
    بسم اله ما شاء الله
    مش بنق انا بحسد بس زى ناس

    وواضح طبعا انك كتوم جدا
    ودة مش اول تاج ليك وانت كل مرة تقول وتبعبع وكل دة طبعا من طبع الكتمان يا عم الكتووووم اوى
    تحياتى


  31. ازيك يا بشمهندس
    مرسى ليك قوى على تشجيعك لينا
    وللاسف خصرنا الماتش التانى
    وفاضل فرصة واحدة انهاردة لو خصرنا هنخرج برة الدورة
    ..
    ادا هو انا جاية اتكلم على الماتش
    هههههههه
    التاج عجبنى قوى
    وفى صفات كتير قلتها عجبتنى انها تكون فى ولد
    عشان صعب تكون فى ولد
    وربنا يوفقك دايما


  32. جنّي Says:

    السلام عليكم

    كل عام وانتم بخير وصحة وعافية وعفو من الله وغفران ..

    جميل البوح بالاسرار وخد بالك احنا في رمضان ..


  33. Sourah Says:

    ازيك يا علاء

    عجبتني اجاباتك اوي ، وزعلانة من نفسي اوي ان دي اول مرة ادخل مدونتك ، لكن انشاء الله هتابعك ..

    انا لما فتحت صفحة الوضع الكامل ليك ، رجعتني بالظبط 10 سنسن لورا ، ايام الكلية و الصحبة الجميلة ..

    و اخبار الكلية ايه الوقتي ، و انت يا ترى في قسم ايه ..

    شد حيلك و ربنا معاك ..

    و اخر الكلام سلااااام !!..


  34. ماشى تدبيسه مقبوله يا بشمهندس ...
    بس انا هجاوب بقه اجابات مقولكش من عينة انه وحيثه ولولهه...
    بس انتا عارف الظروف طول روح كده شويه اخلص التاج اليى فى ايدى واستلم ده على طول طول من غير تلكيع..


  35. السلام عليكم ورحمة الله وبركاته..
    كل عام وانت بخير..

    متشكره جداً لزيارتك ليا وان شاء الله متكونش آخر زياره..وفى تبادل زيارات بإذن الله..


    انا قرأت الواجب بتاعك او التاج بتاعك..
    ماشاء الله عندك دبلوماسيه مطلقه..ده غير انك كتير حالم..طيب بتحب الناس..
    ويارب دايما وان شاء الله ميحصلش اى شئ يخليك تكرههم..

    دمت سالم..


  36. prince4ever Says:

    اول زياره ليا يا برنس
    مدونه لذيذه فعلا و مبروك عالتاج يا ريس
    تقبل تحياتي
    رامي..قصاصة ورق


  37. Eng \ Ayman Says:

    طب سؤال مهم

    ايه ال 7 حاجات الاهم فى الدنيا


  38. مدوتنك جميب اوي
    عاشقة القمر من السودان
    مبروك عليك تاج


  39. M.K Says:

    السلام عليكم...
    اجاباتك تدل على شخصيه جميله وطيبه...
    تقبل مروري..
    دمت بخير..


  40. ربنا يحقق امنياتك يارب
    اسرارك ما بقتش اسرار بس قربتنا من شخصيتك اكتر
    ربنا يبارك فيك
    تحياتي


  41. ازيك يا عايش ..
    انافاكره الهديه بس صبرا شويه وهاجوبها
    وانتا طبيعى مقدر طبعا..
    الف شكر وهديه مقبوله كمان مره.



  42. mero-moory Says:

    السلام عليكم ورحمة الله و بركاته

    علاااااااااااااااء مبارك ليك التاج ايه يا واد الاجابات دي يخرب عقلك استاذ ورئيس قسم متقولش امين شرطة اسم الله ولا دبلوماسي اه يا دبلوماسي هههههههههه
    وبرده تاني مرة تدبسني في واحد هو انا لسه خلثت اللي عندي

    حلام والله تده ماي ماثي :(

    اتلقى بقى وعدك
    عندي ليك تاج يا قطقوطة (ايموشن بيطلع لسانه لالالالا ههههههه)

    في رعاية الله


  43. Amany Says:

    عجبتنى المدونه
    بسيطه وجميله وردودك تلقائيه
    اتمنالك التوفيق


  44. حلوة اوى فكرة السلطانية دى قصدى التاج يعنى .. بس مش عارفة ليه معتبرينها تدبيسة هو التاج ده فيه مرض معدى ولا حاجة ههههههههههه .. عجبنى اوى اجاباتك خصوصا بئا اجابتك على اول سؤال ..


  45. engy Says:

    مدونه حلوه اوى باهنيك بجد عليها
    ربنا معاك


  46. ما شاء الله
    مدونة جميلة
    شكرا لك اخى
    و تحياااااااتى

    رمضان
    كريم


  47. شخصية خفية جدا
    مقدرتش تاخدها فى 5 سنين زى مهى يا فاشل يا فاشل
    بتضيقأك يا فاشل
    طب يا فاشل يا فاشل
    ههههههههههههههههههههههه
    لا بجد عسل دمت يبنى ويارب يارب تحقق كل اللى انتا مش عارف تحققه
    واذا كان عا الفلوس اخلى بابا الباشا يسلفك او امممممممممممم تشتغل عندنا
    ههههههههههههههههههههههه
    تحياتى ورمضان كريم يا علاء باشا


  48. بجد اجابات جميله اوى

    وتحس فيها لاصدق بل وتراة عيانا بيانا

    ربنا يحققلك كل امانيك يارب

    وتعمل كا حاجة كان نفسك فيها
    ياارب

    سلاام


  49. أحيك علي صدقك و صراحتك مع نفسك
    ميه ميه :)


  50. EMMY BABY Says:

    ايه يا علاء فينك مش ظاهر خالص على الساحة التدوينية اتمنى يكون خير

    اومال لو بقيت رجل اعمال مش هنشوفك خالص

    تحياتى

    ايمى


  51. مش لاقيه اسم
    الله يبارك فيكى عقبال ما تتدبسى فى واحد منهم
    هزورك حالا ان شاء الله
    ******************
    canary
    ايه رايك مش كتوم انا بردو
    لا بجد انا بحب اللى يعرفنى يبقى عارف عنى حاجات كتير وبحاول اعرفكوا عليا
    نورتونى


  52. شكرا للجميع انى بجد مش قادر ارد على حد تعباااااااااان