عايش... ولكن !!!!
هقولك يا مصرى يادوب كلمتين
عشان تبقى عصرى احلف اليمين
انك مهما تسمع هتفضل متين
وانك مهما شوفت ماتسأل ده ليه
لو شوفت فاسد أكيد يبقى بيه
ولو جاتلك مصيبة ! , يعني حصل ايه ؟

علشان تفضل كويس اسمع وقول آمين
وبلاش تبقى مشاكس وتعمل أمين
او تبقى معارض وتعمل حزين

هتاخد فوق دماغك وهنعملك كمين
هتسألنى ده ليه؟
هقولك روتين

اربط حزامك وشد اللجام
وادفع من غير ما تسال
دول يبقوا كام؟!!!
فلوسك معانا دايمًا امان
هاتها في رشوة او بحجة سلام
هنبعتها سويسرا او حتى لليابان

بلاش جبنه رومى
بلاش الحمااام
وكلك اكله بلدى
وادخل ونام
خليك دايما مغمض
تنسى الالام

مش انته اللى مصرى يبقى حلال
تموت كل يوم تحت الجبال
وتسكن فى عشه تحت التلال
اصلك بتحلم وحلمك خيال
تعيش مصر يمكن بدون احتلال؟!!
ده حلمك بعيد وصعب المنال

هنسيبك تقول اللى نفسك تقوله
تكتب وتقرا .. يمكن تنوله ..
بس الاكيد اننا ع البوفيه
حالفين مهما عشت لايمكن تطوله

طبعا هتسأل ايه البوفيه؟!!!

هقولك يا سيدى وفتح عنيك
وطرطأ ودانك وانسى اللى فيك
اسرق ولادك واهلك وناسك
وقول يلا نفسى وزود فى مالك

هتبقى بكرش ويقولولك يا بيه
ولو حد شوفته هيموت علشان جنيه
دوس فوق رقابته وطلع عنيه
ساعتها هتبقى معانا ع البوفيه


عرفت يا سيدي.؟
ايه البوفيه !!!؟

74 تعليقات
  1. كيارا Says:

    مبروك الاستايل

    هحجز واقرا وارجع


  2. يارب حد يتعظ 

    تحياتي


  3. كيارا
    الله يبارك فيكى
    مستنيكى
    ***************
    حسن حنفى
    يارب يا ابو على
    شكرا لمرورك


  4. كيارا Says:

    ممممممممممممم

    واااااااااقع جسدته مش عارفه اقولك ايه


    وصلت الرساله :(


  5. كيارا
    اتمنى انى اكون قدرت اجسده كويس
    عموما كويس ان رسالتى وصلتك
    نورتينى


  6. fire bird Says:

    اولا مبروك على الشكل الجديد

    ---------------------------------

    ثانيا

    حلوة القصيدة

    واللون ده كمان

    انا بحبه جدا

    والرسالة وصلت كمان

    واحنا حلفنا اليمين من زمان!!!!!!!!!!!!


  7. غير معرف Says:

    السلام عليكم
    قولنا اليمين بس ان شاء هسيبة
    وعارفين كمان مكان البوفية
    بس مش هنروح
    ليه بأة
    اولا طبعا احنا مش هنعمل كدة
    وبعدين ثانيا
    لان الى عندهم كرش اصلا مش عايزين حد يكون عندو كرش هو كمان
    فاهم
    نيرة احمد محمود


  8. بجد والله القصيدة حلوة قوى وفكرتنى جدا بالفاجومى
    انا حلفت اليمين عايز بقى اروح على البوفية
    تحياتى


  9. fire bird
    كويس ان الاستايل عجبك
    وكويس انك طلعتى حالفه اليمين من زمان
    نورتينى
    **************
    غير معرف
    نيره
    ايوه فاهم كلامك
    ربنا يعيننا ويقوينا عليهم
    الظاهر انك هتبقى زائر دائم :))
    نورتينى


  10. قلب مصرى
    انا بحب الفاجومى جدا
    ده شرف جامد جدا ليا ان حاجه اكون كاتبها وتفكرك بالفاجومى
    سعدت بمرورك


  11. تابعوا الجديد Says:

    مشكلة الصباغ والدكتور زعبولا
    بنظرة حيادية لصديق كليهما
    مدون يدعى محمد الجوهري
    http://goharyblog.blogspot.com/
    شوفوها ضروري


  12. تابعوا الجديد Says:

    مشكلة الصباغ والدكتور زعبولا
    بنظرة حيادية لصديق كليهما
    مدون يدعى محمد الجوهري
    http://goharyblog.blogspot.com/
    شوفوها ضروري


  13. elsha3er Says:

    بص يا سيدى القصيدة جميلة وفكرتها حلوة بس انت محتاج ترتيب افكار انا محستش بحلاوة القصيدة الا من اول عايز تعرف اية البوفية اناشاعر زيك وبقلككدة مش تكبر لا عشان تفيد وتستفيد وبعدين احنا مدرسة واحدة واستاذواحد هو نجم


    احمد الشاعر


  14. engy Says:

    كل سنه وانت طيب ومبروك على الشكل الجديد
    الجميل ده
    كلام بجد حلو فعلا
    اصلك بتحلم وحلمك خيال
    تعيش مصر يمكن بدون احتلال؟!!
    ده حلمك بعيد وصعب المنال
    عجبتنى اوى لانها فعلا مؤثره جدا
    ربنا معاك ومعانا
    ان شاء الله


  15. تابعوا الجديد
    بطل الفرقعه اللى بتعملها دى
    وبطل الهبل ده


  16. الشاعر
    شكرا يا زميلى ع النصيحه
    واتمنى دوام التواصل بيننا
    ************************
    engy
    وانتى بألف صحه وسلامه
    يارب يكون الاستايل الجديد عجبكوا
    فعلا مؤثره
    شكرا لمرورك


  17. الرسالة وصلت
    بس ان شاء الله نقدر نعمل حاجة ونغير الواقع اللي احنا عايشين فيه دة مش معقولة هيفضل للابد يعني


  18. princess Says:

    ايه ده مهندس ايه بس هههه
    كنت مخبى فين يااستاذ علاء الكلام ده:)
    على فكرة احنا مغمضين طول عمرنا بس مش عارفة ليه الالم بيزيد:((
    حلو الديكور بتاع المدونة ههههه
    شغل مهندسين جامد:)
    تحياتى


  19. بجد شعرك جميل جداااااااااااااا يا عايش

    بجد المفروض يتنشر لك

    تسلم ايدك ومستنيين جديدك


  20. طبعا اسلوبك وطريقتك جميلة جدا جدا
    لكن انا مش معاك فى الكلمات نفسها
    يعنى المفروض منياسش بسرعة ونحاول مرة واتنين وعشرة
    ولو ياسنا دلوقتى امال اهالينا يعملوا ايه
    انا شايفة اننا المفروض نتمسك بهدف ونحاول اننا نحققه وانا عارفة انك ممكن تقول انى بتكلم ببساطة ومش مقدرة ظروف البلد
    هقولك لا
    انا عارفة الظروف كويس قوى
    وعشان عارفة الظروف
    بجد نفسى اننا منياسش واكيد هنوصل للى احنا عايزينه
    ممكن بعد سنة بعد اتنين بعد عشرة ممكن بعد ما نموت
    المهم نكون حقننا اللى احنا عايزينه ومش شرط ان احنا اللى نستفيد منه ممكن اخواتنا ممكن الجيل اللى بعدنا
    يعنى مش لازم نعمل عشانا وبس
    ارجو انك تكون فهمتنى


  21. واقعى اوى كلامك..واقعى لدرجة مؤلمة بجد
    بس انا متفقة مع اللى رد قبلى اذا كانوا اللى قبلنا خربوها فده مش معناه اننا نكمل عليها..اكيد فينا اللى يقدر يعمل حاجة و يصحى النايمين و انا شخصيا مقتنعة انه جوه كل واحد فينا بس مستنى زقة


  22. انت هتكفر
    طبعا هنحاول نغير بس ياريت نقدر
    شكرا لمرورك


  23. princess
    احنا مغمضين طول عمرنا بس لازم نصحى بقا
    لانها كده هتخرب خلاص
    نورتينى
    **********************
    احمد نور الدين
    شكرا لمجاملتك دى
    يتنشرلى مره واحده ههههه
    ده حلمك بعيد وصعب المنال :)
    نورتنى


  24. كوارث Says:

    الله ينور يا علاء
    عارف رايي طبعًا
    بس اللى انا عايز اقوله ان كلامك مش سخرية !!
    اعتقد انه جد جدا
    لان ده الحل
    وده الطريق اللى المفروض يختاره الىل عايز يعيش هنا
    والا يموت !


  25. ندا منير
    انا مبدعيش لليأس بس انا بوصف واقع
    صحيح هو واقع اليم
    بس ده الواقع
    واحنا كلنا نفسنا يتغير
    وادينا بنحاول
    سعدت بمرورك
    ******************
    banouta masreya
    انا معاكى ان كل واحد مننا جواه الشخص اللى بتقولى عليه
    بس فين المقومات وفين القائد اللى يقدر يقودنا وياخدنا لبر الامان
    للاسف الخراب كل يوم بيكتر ومحدش عارف هنوصل لفين
    وصعب جدا نوقفه
    ادينا بنحاول
    سعدت بمرورك


  26. كوارث
    انت كده فهمتنى
    علشان تعيش هنا يبقى يا تكون معاهم يا اما هتتفرم
    موضوع انك تقدر تبقى ضدهم وتقدر تغير صعب جدا
    بس بردو بنحاول

    بدل تبقى وغد واسأل واخد بالك يا طرووق :)


  27. هو زنبه فعلا انه مصرى ؟


  28. نيجار Says:

    جميله والله ياعلاء
    أستاذ ورئيس قسم كمان
    بس برضه أنا نفسي في حاجه زي بخشوان بجد مميزه جداً ومن أجمل البوستات إللي قرأتهافي كل المدونات ،
    وبالنسبه لصديقاتي طبعاً فاكرني بهتش بس والله العظيم أنا بتكلم بجد .
    تحياتي


  29. NilE_QueeN Says:

    اصلك بتحلم وحلمك خيال
    تعيش مصر يمكن بدون احتلال؟

    احنا فعلا محتلين


  30. صوت من مصر
    هو ذنبه انه مصرى ده صحيح ذنبه
    اسعدنى مرورك
    *************
    نيجار
    شكرا بس انا بحب التغيير شويه يعنى مش كله هيبقى بخشوان :)
    عموما اكيد هتلاقى احسن قريب ان شاء الله
    سعدت بمرورك


  31. Nile_queeN
    ايوه عندك حق صحيح احنا محتلين
    اسعدتنى زيارتك


  32. السلام عليكم ورحمه الله وبركاته
    احييك على القصيده دى
    مع ان دا وقاعنا فعلا بس كل واحد عليه نفسه
    كل واحد يكون كويس فى مكانه ويتقى الله
    والبلد دى اكيد هتتغير
    هى الحكومه دى ايه مش منا باس زينا
    لو كان من الاول اتربوا صح كان كل واحد مسؤل عرف اى اللى عليه وعمله
    البدايه فى البيت لاى اصلاح عاوز تعمله
    او عاوز اللبد تكون كويسه ابدا من الطفل الصغير
    ومش تقول نستلم ونعمل زى الناس اللى بنتقدها دى
    سلام


  33. جنّي Says:

    السلام عليكم


    تقبال الله منا ومنكم الصيام والقيام ايمانا واحتسابا لوجه الله الكريم

    وعفا الله عنا وعنكم في ليلة القدر


  34. ماشى عشان خاطر استاذ علاء ..استاذ ايه ضيعت تعبه فى ثانويه عامه...
    باشمهندس علاء باشمهندس علاء
    انا اليى استاذه
    هقولك تحفه تحفه تحفه
    وتقولى اول مره اكتب سياسى ده وطنى وطنى وبيطنطن كمان
    انتى مبدع وواضح انك عبقرى فى الشعر والهندسه واشياء اخرى
    برافو عليك واستمر من ابداع لابداع
    وعيد سعيد عليك ربنا يسعدك ويوفقك
    شرفتنى معرفتك جدا ومجرد زيارتى لمدونتك بتسعدنى جدا جدا
    اختك الصغيره محاسن..


  35. ماشى عشان خاطر استاذ علاء ..استاذ ايه ضيعت تعبه فى ثانويه عامه...
    باشمهندس علاء باشمهندس علاء
    انا اليى استاذه
    هقولك تحفه تحفه تحفه
    وتقولى اول مره اكتب سياسى ده وطنى وطنى وبيطنطن كمان
    انتى مبدع وواضح انك عبقرى فى الشعر والهندسه واشياء اخرى
    برافو عليك واستمر من ابداع لابداع
    وعيد سعيد عليك ربنا يسعدك ويوفقك
    شرفتنى معرفتك جدا ومجرد زيارتى لمدونتك بتسعدنى جدا جدا
    اختك الصغيره محاسن..


  36. هايدى
    عندك حق لو كل واحد ابتدى بنفسه البلد كلها هتبقى زى الفل
    بس تقولى لمين ومين يسمع
    اسعدنى مرورك
    *******************
    جنى
    تقبل الله ومنا ومنكم صالح الاعمال


  37. عايزه اتطلق و
    ام بيرو
    والله بجد انتى مديانى اكتر من حقى اوى
    باشمهندس , استاذ , اسطى , كلها القاب لسواقين التاكسى ههههههه
    كل اللى تقوليه مقبول يا ام بيرو

    وبلاش بقا المجاملات الزياده عن اللزوم دى احسن اتغر ومعنتش اكلم حد بعد كده ههههه

    والله انا اسعد بمعرفتك يا ام بيرو
    سعيد جدا بزيارتك


  38. EMMY BABY Says:

    علاء

    سلام عليكم

    مبروك على النيولوك الحلو ده

    وبجد والله القصيدة تحفة انا كنت متوقعة مثلا فى الاخر هلاقى اسم شاعر كبير ودى قصيدته بس فوجئت ان انت اللى كاتبها

    بجد والله ليك مستقبل فظيع

    للاسف اكيد اكيد فى مصرر !!!1

    قصيدة محزنة على قد ماهى بتسخر من الاوضاع على ققد مابتقلب فى المواجع

    تحياتى

    ايمى


  39. كلنا عارفين نوصل ازاى للبوفيه بس احنا ان شاء الله مش هنوصل عشان لسه بنحب البلد دى
    ولو حتى حاولنا نوصل مش هنعرف


  40. enjy Says:

    اممممممممممم انا قريتها دى قبل كدة بس بقوللك تانى انها حلوة وتحفة وكويس جدا انها اول محاولة واكيد مش الاخيرة


  41. Son of Egypt Says:

    السلام عليكم ورحمة الله
    أولا انا بتشرف انى اكون من المعلقين على هذه القصيده
    وثانيا وده الأهم انى نادم جدا على اللى فاتنى من غير ما أشوفه واللى فاتنى من كتاباتك بس هى ملحوقه واللى جى اكيد احسن ودايما ازورك لأنى ببساطه سجلت عندك اول حضورى

    تحياتى لك اخى علاء ودمت متألقا دائما

    nageh


  42. EMMY BABY
    الله يبارك فيكى يا ايمى
    شاعر كبير مره واحده
    دنا كده هاخد مقلب فى نفسى بقا :)
    نورتينى يا ايمى
    *****************
    3ala asm masr
    هو احنا عارفين الطريق ومش عاوزين نوصل زى ما قولتى
    سعدت بمرورك


  43. enjy
    اه انتى قريتيها قبل كده بس لما بعتتهالك كانت لسه معدلتش فيها شوية حاجات دلوقت نشرتها بعد التعديل
    وبعدين تعالى هنا
    انتى فينك بقالك كتير مش ظاهره؟
    *****************

    Son of Egypt
    متشكر جدا انا اللى ليا الشرف بزيارتك دى
    وعموما البوستات موجوده تقدر تشوفها
    وان شاء الله تتابع القادم
    سعدت بمرورك


  44. رسالتك وصلت

    بس هى رسالة بيتوجع أوى

    و مش عارفة إيه المفروض يحصل عشان بجد نعمل حاجة إيجابية

    حنستنى إيه.......اللى وصلنا ليه ده هو قمة المهذلة

    حسبى الله و نعم الوكيل


  45. انا ودماغى
    هنستنى ايه ؟؟!! سؤال بجد مش لاقيله اجابه ... اتمنى اننا نتحرك ومستناش مصايب اكتر
    شكرا لمرورك


  46. عرفنا يا سيدى ايه البوفيه
    .......
    اول زيارة لمدونة حضرتك وان شاء الله مش الاخيرة
    ربنا يباركلك


  47. ايمان عاطف
    كويس انك عرفتى
    كلنا عارفين :)
    شكرا لمرورك وان شاء الله يكون فى تواصل بينا دائم


  48. نيجار Says:

    والله ما عارفه أشكرك إزاي يا علاء
    تعبناك معانا أنا ومحاسن عقبال ما نتعبلك يوم فرحك
    عملت زي ما قلتلي بالظبط والحمد لله نجحت المحاوله فشكراً مره تانيه


  49. نيجار
    تشكرينى على ايه يا نجيار
    هو انا عملت حاجه
    داى حاجه بسيطه جدا
    ربنا يديم الموده بيننا
    ولو احتجتى اى شىء تانى انا فى الخدمه
    نورتينى


  50. حقيقي ، سعيدة جدا بالتعرف على هذه المدونة الرائعة

    والاستايل بتاعها كمان روعة

    __________

    سبحان الله

    الخاطرة فعلا تعبر عن الواقع بالظبط ولكن بأسلوب جميل مبدع

    بوركت موهبتكم


  51. بصراحة انت مبدع كاتبها بمهارة وفنية عالية قوي

    كنت سميها البوفيه افضل

    و

    الرسالة وصلت

    تحياتي


  52. بجد
    تحفففففففففففففففففففففففة

    طريقة الكتابه دى بتوصل المعنى جدا
    وانت ابدعت فيها

    حلوة اوى

    تحياتى


  53. مروه كمال
    انا اسعد بالتعرف على مدونتك
    ومتشكر ليكى
    اسعدنى مرورك
    ******************
    بنت الاسلام
    ششكرا ليكى ولكنى اخترت رساله الى كل مصرى دونا عن اسم البوفيه لانى كنت اريد منها رساله الى كل مصرى وليس لكى يعلموا البوفيه فمعظمنا يعلمه جيدا
    سعدت بمرورك


  54. شيماء طلعت
    متشكر جدا لزوقك
    فعلا طريقة الكتابه بتوصل المعلومه اسرع واسهل
    سعدت بمرورك


    ...............


  55. ما شاء الله

    كلمات معبرة

    واسلوب رائع

    جزاك الله خيرا

    اللهم اصلح احوالنا

    كل سنة وحضرتك طيب


  56. Eman Eltaher Says:

    هههههههههه
    لا بجد مكتوبة بسيطة و معبرة
    و لذيذة اوى كمان
    تضحك و تألم لما الواحد يتأمل معانيها

    للأمام

    للأمام دُر
    !!!!!!!

    :)


  57. Lady E Says:

    مبروك ع النيو لوك الجميل

    والرسالة وصلت وبتوصل كل يوم حتى واحنا في بيوتنا

    واعوذ بالله من البوفيه وناسه

    بجد تسلم ايدك واسلوبك بجد جميل جدا


  58. عايش ولكن
    عرفنا يا سيدنا معانى البوفية
    ونفسى اعرف المشى على شريط السجاد الاحمر ليه ، هل هو خوف عالجزم ولا خوف على الارض المباعة
    اشكرك على المرور والتعليق
    ارجو ان لاتحرم مدونتى الزيارة والتعليق
    عيد سعيد وكل سنة وانت والاهل بخير وسلامة


  59. هههههههههههههههههههههههه
    جميل قوى الشعر ده بجد والله
    احييك عليه
    وبكره هجيبلك عيش وحلاوه
    ههههههههههههههههههههه
    لا لا لا بعد الشر هجيبلك عيش وجبنه


  60. اختكم فى الله
    شكرا ليكى
    وانتى طيبه ويارب عيد سعيد علينا كلنا
    اسعدنى مرورك
    *******************
    Eman Eltaher
    ايوه بالظبط بسيطه ومعبره دى اهم حاجه انا عاوز اوصل ليها
    نورتينى


  61. lady
    الله يبارك فيكى
    ربنا يبعدنا عن البوفيه زى ما قلتى
    اسعدنى مرورك
    ***************
    Beram ElMasry
    لا يا سيدى المشى على السجاد الاحر ده ( تناكه )
    ان شاء الله هيكون فى تواصل بينا دايما
    وانت طيب يارب
    نورتنى


  62. بنت مصريه
    متشكر جدا لزوقك
    بس ليه تقوليها كده فى وشى هتخلينى مكتبش كده تانى :)
    عموما ربنا يستر
    اسعدنى مرورك


  63. نيجار Says:

    بص يا علاء أنا مش قصدي زي بخشوان بالظبط أنا قصدي طريقة الكتابه لإنها مميزه جداً وما أعتقدش حد هيعرف يعملها زيك وبالتالي هتبقى متميز في النوعيه دي وياسيدي مره قصه بالطريقه دي ومره شعر بس بالنسبه لي الطريقه دي مميزه جداً وبحبها جداً
    ربنا يوفقك يا علاء


  64. ahmed_k Says:

    أيه الجمال ده
    الله ينور عليك كلماتك بسيطه
    ولهنها من نوع السهل الممتنع
    ربنا يزيدك إبداع و فن
    دي أول زياره لي هنا ويسعدني
    يا صديقي أن أنضم لكوكبة قرائك
    ومحبي أشعارك

    وكل عام وحضرتك بخير


  65. ما بيحصل له كتير وبرضه صابر يعنى يعمل ايه


  66. نيجار
    خلاص انا موافق ان شاء الله ابقى اعمل زى ما قولتى كده
    بس على فكره انتى لو بصيتى ع المدونه بتاعتى كلمها على بعضها كده مش كلها شعر وقصص كل حاجه موجوده لانى مش مقيد نفسى فى حاجه معينه
    عموما شكرا يا نيجار ع النصيحه
    *************************

    ahmed_k
    وعليك يا احمد
    متشكر جدا لزوقك وكلامك الحلو ده كله مستاهلش انا كل ده
    اسعدنى مرورك

    ***************
    ¨¨¨°~*§¦§ Appy §¦§*~°¨¨¨
    مش هيعمل حاجه
    هنسمى اى مصرى يتولد صابر علشان يبقى اسم على مسمى :)
    اسعدنى مرورك
    ************************


  67. كل عام وحضرتكم بخير
    عيدكم مبارك

    تحياتى لحضرتك


  68. هههههههههههههههههههههههه
    جامد اوى الشعر السياسى
    ده انت بتوصف حال البلد بالفعل
    والف مبروك على استايلك
    ومنتظره تشريفك


  69. Desert cat Says:

    كل سنة وانت طيب علاء
    عيد سعيد


  70. ريمان Says:

    السلام عليكم

    عرفت بس الوقتى معنى البوفيه

    هههههه

    بجد بوست رائع اوى واحييك على اسلوبك

    بجد اسلوبك رائع ودمه خفيف

    وكل سنه وانت طيب

    اه من حق

    استايل المدونه تحفه جدااا


  71. dina seliman Says:

    عيد سعيد عليك
    وكل سنه وانت بالف خير
    وان شاء الله السنه الجايه احسن


  72. انت رائع والله العظيم رائع مش لوحدى قرات الرسالة والله قراتها على بابا كمان تسلم اخى الكريم وفى انتظار جديدك وتقبلنى زلئرا دائما لمدونتك الرائعة