عايش... ولكن !!!!
امبارح الساعه العاشره صباحا اخدت شنطتى انا واخويا بهاء وخلاص مسافرين للغردقه .... خرجت ومشتاق للغردقه لانى مروحتهاش من الصيف اللى قبل اللى فات ركبت طبعا اول ميكروباس رايح القاهره ويارتنى اخدت تانى واحد :)
السواق طلع اغلس سواق شفته ... قدام كل بلد يقف يدور على واحد وانا بقا من جوايا عمال اقول يارب اكرم ب4 ولا 5 علشان نخلص :) لغاية ما جه وقف قدام بلد ع الطريق وربنا رزقه بعسكرى مرور ركب معاه ..... وطبعا ما ادراكوا يعنى ايه .... يعنى 5 جنيه ضاعت ع السواق ههههه اصله مش هيدفع طبعا قولت يلا بركة دعايا :))
المهم وصلت والحمد لله والمفروض انى كنت هسافر من شكرة اسمها الجونه قرب مبنى الاذاعه تقريبا المهم انا نزلت عند مبنى الازاعه انا واخويا ولسه هبتدى ادردش معاه لقيت واحد بيقولنا تيجو تصوروا معانا يا شباب :)) انا قولتله نعم ووش رافع حاجبه :) قالى احناقناة النيل للدراما وشاورلى على الكاميرا وانا بقا قولت فى نفسى ايه الحلاوه دى والله وهتطلع فى التلفزيون يا واد يا بشمهندس يا علاء ...( ايه كل اليا دى ههه ) المهم قولتله وماله نصور ... طيب هنصور ايه ... قالى بنتكلم عن عفاف شعيب علشان مستضيفنها انهارده
هههههههههه ومقلكوش بقا انا كان نفسى اضحك فى وشه وماسك نفسى بالعافيه ههه اصلى مش فاكر مثلت ايه قبل كده ... المهم لقيته كمل كلامه وقال يعنى مثلا دورها فى رافت الهجان .... (وانا بردو نفسى افتكر كان دورها ايه فى رأفت الهجان ههه) سألت اخويا بقا بعد ما مشى ... قالى كانت اخت رأفت ومثلت فى مسلسل الشيخ الشعراوى وكان ليها دور ام مشهور اوى فى مسلسل كده مش فاكر اسمه دلوقت
المهم انا وقفت قدام الكاميرا وقلت الكلمتين اللى فيهم النصيب ومشيت
روحت بقا عند الشركه اللى هنسافر منها ... كان معاد الرحله الساعه اتنين الا ربع والساعه كانت واحده ونص فضلت قاعد لغاية اتنين ونص وكل شويه نسأل يا جدعان الرحله كانت اتنين الا ربع الساعه دلوقت اتنين ونص يعنى ساعه الا ربع تأخير ... مينفعش كده
رد واحد جنبى بيقولى ياعم انت فى مصر
قولتله تصدق نسيت ... معلش عندى دى هههه
خمس دقايق وقالوا يلا يا جماعه الاتوبيس وصل
طلعنا بره الشركه واقفين كلنا مستنين جناب الاتوبيس انه يجى
لقيت واحده كده عندها حوالى 45 سنه عامله شعرها ديل حصان ههه وشايله ( مخله ) او شنطه قماش بس مبهدله للى مش عارف " المخله " المهم جايه نحيتى وبتقولى "هات نص جنيه" بصيتلها وفطست من الضحك ههههههههه نعم يا حاجه قالتلى نص جنيه اركب بيه مواصله قلتلها اشمعنه نص جنيه يعنى مينفعش جنيه قالتلى اللى تجيبه قلت يعنى المينيمم اتشارش نص جنيه ولا ايه ههههه ماشى يا ستى جنيه اهو وخلى الباقى علشانك حلاوة انى مسافر هههههههه عادى بقا بحب يتضحك عليا بمزاجى هههه
ركبت الباس وطبعا كان فى اجانب ومزز كتير بس مشدنيش حاجه غير واحده دخلت الباس لابسه احمر ومظبطه نفسها اوىىىىىى اول ما دخلت لقيت السواق قالها تعالى اقعدى هنا قولت فى بالى ياعم مهو الباس لسه فاضى اشمعنه يعنى هنا :)
هيا الرحله باينه من اولها ... طلعنا من هنا والسواق بقا ماشى على اقل من مهله ونازل رغى وضحك مع الاموره والظاهر ان فى واحده ورا شافتهم فغارت منها قامت سايبه كرسيها وراحت قعدت قدام على السلم جنبهم ههههه وهاتك يا هأهأه هههههه واانا قاعد مطأطأ ودنى هههه مش فضول منى بس لان كلامهم كان اصلا مخلى الباس كله واخد باله حتى الحاج الى كان قصادى كل شويه يبصلى ويضحك ع اللى بيحصل وكان المدام بتاعته وبنته معاه وتحسوا من نظرته انه بيقول ليا ههههه ( ناس هايصه وناس لايصه ) هههه
على ما وصلنا لنص الطريق كان الناس اتخنقوا من السواق وكانت هتحصل خناقه ومكنتش هوصل الغردقه ( شكل حد فيكوا كان باصصلى فى السفريه دى ) هههه
والسواق اصلا كان جته وضخم وعليه شنب يقف عليه صقرين مش صقر واحد بس
انا كنت صورته مش فاكر لسه صورته موجوده ولا لا لان الموبيل مش معايا دلوقت
وبعد ما الواحد ورم من القعده ( 7 ساعات ) وصلنا الغردقه وانا نازل من الاتوبيس كنت سامع الاغنيه بتاعة ( حمدلله ع السلامه يا جاى من السفر ) عماله ترن فى ودنى ههههه 7 ساعات بقا
روحت مقتوووول يادوب اتعشيت ونمت
انهارده بقا صحيت فطرت مع اخويا وهو راح شغله ويالهوى ع اللى حصلى
نايم ع السرير مش لاقى حاجه اعملها قولت افتح التلفزيون مع انى كنت حالف ما اشوفه تانى من ايام اخر مره ما كنت حاكيلكوا ع المسابقات
اخويا عنده 320 قناه اول ما فتحت لقيت قناه بتاعة مسابقات فى وشى يالهوىىىىىىىىى انتوا تانى هو انتوا ورايا ورايا
حل اللغز تكسب 100 الف دولار .. يا نهار ابيض يعنى اكتر من نص مليون دولار
طب اللغز ايه ياست الكتكوته ... اللغز يا سيدى ( كيلو الزيت فيه كام نقطه ) فطست على نفسى من الضحك .... طبعا سبع نقط يا ست الكتكوته ... ومعانا اتصال ونقول صباح الخير يلا جاوب ع السؤال ... بسم الله انا مسكت قزازة زيت وفضيتها فى كيس وقعدت انقط منها لغاية ما وصلت ل الف وخمسية نقطه .......
يالهوىىىىىىىىىى الله يخربيت اللى بتفج ع التلفزيون ياجدع
طفيته وقعدت شويه مش لاقى حاجه اعملها ... فتحته تانى وقعدت اقلب فى 300 وشويه قناه اللى موجودين مش لاقى ولا قناه عدله اتفرج عليها ...... خدوا بقا تقليب فى التلفزيون حوالى 4 ساعات لغاية ما ايديا وجعتنى من التقليب
قولت اقوم اشوف حاجه اكلها
يادى النيله مش بعرف اطبخ حاجه
مسكت التليفون وكلمت امى .... ايوه يا حاجه فى نص فرخه هنا فاضله من امبارح اعملها ازاى دى ... يعنى انتوا اصلا كنتوا مسوينها .... اه ..... طيب اعمل اللى هقولك عليه
وعملت والحمد لله كلت وكله تمام وعملت الشاى وكمان جبت ساقع يعنى كله قشطه ههه ..." مش عايز نق عليا زى المره اللى فاتت "
من ساعه ونص تقريبا بقا لقيت اخويا بيتصل بيا وبيقولى انا فى المطعم تعالى علشان تتعشى معايا .... قشطه يلا انا مسافة السكه روحت واتعشيت بقا بردو فراخ يادى النيله يكلى هريش من كتر الفراخ اللى باكلها
ماصدقت لقيت نت كافى فى طريقى وانا راجع قولت اجى امسى عليكوا علشان واحشينى
واعزرونى بقا اليومين دول مش هقدر اتابعكوا لكن اول ما ارجع هشوف كل البوستات اللى فاتتنى والجديد كمان
وعلى رأى المثل
اضحك و انشرح و اوعى صابعك ينجرح
42 تعليقات
  1. mero-moory Says:

    السلام عليكم ورحمة الله وبركاته

    وحياة ربنا انت رايق يا لولو
    ويابختك بجد ياريتني زيك :(
    عشان محتاجه ده جدا وموش طايلاه ولا عارفه اعيش في راحة بال وضحك :(

    يلا تيجي بالسلامه ان شاء الله

    في رعاية الله


  2. gogo!sf Says:

    علاء ازيك

    رحله سعيده ان شاء الله

    ياعم بدال ما تقعد اربع ساعات تقلب فى القنوات انزل الدهار فى شارع البازارات اتمشى شويه هتلاقيه كله موزز ولا انزل ميدان السقاله اقعد على قهوه من اللى هناك ولا اقولك ارمى نفسك فى البحر واخلص بقى

    يعنى بذمتك انت فى الغردقه مش عارف تروح فين ولا تتسلى ازاى انت شكلك كده بتغزى العين
    متخفش يا عم انا مش هحسدك انا بس هأر عليك

    ربنا يجعلها رحله سعيده وترجع بألف سلامه ان شاء الله

    جوجو


  3. (Joudy) Says:

    فعلا صدق اللى قال ناس هايصة وناس لايصىة من غير نق مبروك عليك السفرية وحياتك تصيف لنا معاك


  4. ههههههه
    حمدا لله على السلامة
    تنورنا فى أى وقت ياباشا


  5. fL0weR-giRL Says:

    السلام عليك
    هههههههههههههههه
    بجد لو انا في المواقف دي كنت مت علي نفسي من الضحك

    وياريت تقلنا البرنامج الساعه كام عشان نتفرج عليه ههههههههه

    ربنا يجيبك بالسلامه ونقلك حمدلله ع السلامه يا جاي من السفر بردوا هتبقي 7 ساعات راجع

    *_*
    ******** تقبل مروري **********888


  6. ازيك

    مش فاكرعفاف شعيب؟؟
    المسلسل اللى كنت ناسيه هو الشهد والدموع اللى كان اسمها زينب فيه :)

    عامل ايه؟


  7. في حد يروح الغردقة و يقعد في البيت يتفرج على التليفزيون
    حاجة فريبة فعلا
    امال انت رايح اصلا ليه
    اجازة سعيدة و عقبالي لما اطلع المصيف


  8. السلام عليكم
    ههههههههه

    ايه الجمال ده كله

    بجد والله انت عسل قووى ياعلاء
    ربنا يروق بالك يارب ويسعدك
    ورحلة سعيده ان شاء الله

    وترجع لينا بالسلالامه
    تحياتى
    انوسه


  9. Ramy Wasel Says:

    ماشيه معاك يا عم

    ابقى قولى على ميعاد الاوتوبيس ده
    علشان اقعد ورا السواق
    الواحد يلقط رزقه برضه

    كل تصييف وانت طيب
    وترجع بالسلامه


  10. مممممممممممممممم

    حلو البوست

    عجبني اسلوبك

    تلقائيتك مميزة

    ترجع بالسلامة


  11. انت عجيب مش عجبي

    تسافر الغردقه علشان تنام و تتفرج ع التلفزيون و تطبخ

    يا اخي كل ده ممكن تعمله في بلدكم
    بلا سفر بلا سواقين يحرقوا الدم

    منتظر البقيه و انت بتنضف الشقة و بتنشر الغسيل

    تحياتي


  12. nody Says:

    يا خساره انا شقت البرنامج بتاع عفاف شعيب امبارح بس ماكملتوش

    وبعدين يعنى انت جاى تحنسنا بالغردقه وتقول ماتنقوش
    ده اسمه كلام؟؟؟


  13. هههههههههههههههههههههه ياحيني دا من قري علي فكرا ههههههههههههههههههه

    ال بيتفرج علي تليفزيون وهو في الغردقة ومسافر ومتحمل عناء السفر عشان تتفرج علي التليفزيون فعلا وعجبي


  14. معلش يا جماعه مش هقدر ارد عليكوا كلكوا لضيق وقتى

    بس اشكركوا كلكوا
    وبلاش نق
    وعلى فكره انا مش نايم وبتفرج ع التلفزيون بس يعنى
    بس انا بقول دول المواقف اللى اتعجبت منها فى اليوم
    ولانى لسه مروحتش البحر
    انا بس بخرج بالليل زى دلوقت اتعشى برا والفلف شويه وبدون تفاصيل بقا علشان محدش ينق :)


  15. لا انا هننننننننننننق ههههههههه


  16. بقولك ايه يا كيارا
    ربنا يكفينا شرك هههههههههههه
    ومن شر حاسد اذا حسد
    هههههه



  17. وهو انا اقدر
    خلاث نقى براحتك
    وانا هقرا قرآن فى سرى هههههههههههه


  18. هههههههههههههههه ايوان تدا انا بنق اهو واقرا اي سورة الا اللي انت عارفها عشان النق يوصل في محله انا بقول اهو


    بجد بجد بتمنالك اجازه سعيده


  19. يارب يا كيارا

    وعلى فكره انا نجحت وجبت جيد كمان :)

    ودلوقت مش بس جاى اتفسح ومصيف وبس ده هو اسبوع كده وهشوف شغل هنا لو لقيت ربنا يكرم اقضى بقيت الصيف هنا


  20. الف الف الف الف مليووووووون مبروك بجد

    وان شاء الله ربنا هيسرلك الامور ويرزقك كمان بشغل حلو:)


  21. يارب ياختى يارب
    ادعى من عندك احسن بيقولوا ان الدعا فى الغردقه مش بيستجاب ههههههههههههههههه


  22. ههههههههههههههههههههه انا بدعي اهو :)


  23. ياكيارا ادعى بزمه
    وارفعى ايدك كويس
    وافتحى الشباك اللى جنبك ده خلى صوتك يطلع برا
    :)


  24. هههههههههههههه افتح الشباك كدا انا مش مسئولة لو حد عاكس هقول علاء السبب انا مالي


  25. يا ستى
    انا محدش يعرفنى عندك
    ههههههههههه
    ومش هعلن مسئوليتى عن المعاكسه
    هههههههههه
    نداله بقا


  26. جبت النداله دي امتي عامة الحوار متسجل صوت وصورة ادي المسئولية رسمي اهىىىىىىىىىىىىىىى


  27. صوت وصوره كمان
    يادى النيله
    طيب هديكى اللى تطلبيه بس اوعى توصليه لعمو


  28. يلا اشوفك على خير يا كيارا لانى خارج
    يلا سلام


  29. ممممماشي يلا عندك واحد مثاثه بالبرتقال


    *********

    يلا سلاموز بقي اتفسح ياحم مين قدددددددددددددك


  30. Sweet Violet Says:

    هههههههههههههههههههه
    والله انت مشكلة بجد
    لالا بس السؤال طلع جامد مووووت
    بس ماقولتش الاجابة طلعت ايه ^_^

    رحلة سعيدة


  31. خلاص يا كيارا ليكى مثاثتين وكباية عرق سوس عندى :)

    سويت فيولت
    والله مش هتصدقى السوال لسه محدش عارف يجاوبه لدلوقت
    انا قولت الاجابه على فكره
    7 نقط
    النقط هنا نقط الحروف مش نقط الزيت


  32. يا عمنا ولا يهمك
    سافر انت بس واستمتع
    وباذن الله فى انتظارك وترجع لنا بالف سلامة


  33. انا كيت انور بس
    ههههههههههههه
    هقرا البوست بعدين ان شاء الله
    عشان انا وعدت حضرتك اني ازورك

    فاكرني ولا ايه؟؟؟


  34. حمد لله على سلامتك وترجع بمليون سلامه وحد ينقط قزازه الزيت بجد فى دى انت اللى تنقط ههههههه مستنين باقى اخبارك وكفايه فرجه على التليفزيون وبعدين حد يبقى مكانك ويسيب البحر والجو الجميل ويقعد يتفرج على تليفزيون ايه الكلام دا يا ابنى اجرى على البحر طبعا نسيبك بقى تبلبط براحتك سلام


  35. لااااااااااااااااااااااااااااا


    مش بحب العرق سوس عاااااااااااااااااا



    كدا هنخسروا بعض

    ال عرق سوس ال

    عااااااااااااااااااااااااااااااااااااااااااا


  36. shemo Says:

    السلام عليكم.......
    ازيك يا علاء ........ايووووووووه على الروقان بجد يا بختك مش بقر بجد بس الله يسهله ياعم ........معلش مجتش البوستين الى فاتوا بقالى كام يوم مش بخش البلوج.........بس كلمات البوست الى فات جامدة اوووى.......يارب ترجع بالسلامة ورحلة سعيدة وتنبسط وتتظبت من اتوبيسات الجونة وانت راجع ههههههههه دومت بخير .....فى رعاية الله.
    shemo


  37. Desert cat Says:

    التلفزيون نور بيك يا علاء
    المهم انك قولت كلمتين وبليت ريق المذيع
    اجازة سعيدة يا باشا


  38. Nora 7wades Says:

    تيجى بالسلامة ياسيـــدى


  39. mero-moory Says:

    السلام عليكم ورحمة الله وبركاته

    انا غابت ميرو :(
    واعرف صدفه من الردود انك نجحت :(
    طيب يا سيدي براحتك :(

    ومخامثاك وغور بقى :(

    في رعاية الله