عايش... ولكن !!!!
هنا القاهره
هنا تلاقى جميع العجايب
هنا اللى عاشق
هنا اللى دايب
ولو كنت حاضر
او حتى غايب
هتعرف كلامى
لانه تاريخ

جرب بنفسك
وقلب وشوف
جوه الدفاتر
جوه الكشوف
تلاقى فراعنه
تلاقى الهرم
تلاقى اللى باعنا
كيانه اتهدم
محدش سامعنا
كأنه العدم
لكن تاريخنا
يخلينا احنا
نقول يا ندم

هنا القاهره
هنا تلاقى اللى عايش حياتو
وغيره تلاقى اللى مستنى مماتو
وكاره مراتو وكاره حماتو
تجيبه يمينو تجيبه شمالو
هو خلاص مدفون مكانو
تقوله كلمه .. تلاقى كلامو
كنا وكانو
وكلتم ودانا
وكلنا ودانو
ومهما حاولتوا وروحتوا وجيتوا
هيا كده ... وبلاش لغبطه
كلاب متحنطه
ماضى جميل
وحاضر كله شخبطه
ولا اقولك !!! بلاش لغبطه


هنا القاهره
هنا الشوارع
هنا الحارات
هنا شباب
خريجى جامعات
حبه ع القهاوى
والباقى ع الكافيهات
اللى مدروش
وعايشها فى سكات
واللى يحارب
علشان شوية قرشينات


هنا القاهره
هنا الاعلام هنا الصحافه
هنا الناس اخر ايافه
هنا الحياه تعيشها بلطافه
هنا تلاقى جميع الفنون
هنا الاغانى على كل لون
اللى طيب واللى حنون
واللى يغنى ساعات مجنون
ولا خرونج وال ايه لون

هنا القاهره
هنا المعارضه والاخوان
هنا نوابنا فى البرلمان
كل يوم استجواب وبيان
والموضوع فى الاخر فاكس
اصل صاحبنا غاوى يعاكس
يمكن يستضيفوه فى اى لقاء
بفضل يرغى فى اى كلام
وعامل نفسه ال علام
واهو كلمتين والسلام
واسمه بيدافع عن الجعانين
طيب انت فين وهما فين
دانت عايش فى المهندسين
انت يابنى ابن مين؟!!!

هنا القاهره
هنا السياده
برغم اللى فات .. هنا الرياده
برغم الجزيره... هنا القياده
واللى كارهنا .. يشربها ساده
ده مصيرنا ... وبقت عاده
نسكت .. وغيرنا يتمادى
بس عادى .. ميعرفوش
كله فى الاخر فشوش
وهنعتبرها غلطه عابره
هنا القاهره
هنا الساهره




17 تعليقات

  1. اهوه لازم استقبلك فى اول بوست بعد رجوعك ياعلاء

    اقرء بقه واجى


  2. وكاه مراتو وكاره حماتو

    صلح الكلمه دى

    وكاره مراتو وكاره حماتو

    ههههههههه رخمه


  3. مبروووووووك عليكى اول تعليق :)


  4. ماااااااااشى يا دوللللى :)) فى اى ملاحظات اخرى :))


  5. ههههههههههههه

    حقيقيه لكن فيها نوع من الكوميديه

    لو لاقيت كل ده
    يبقا انتا اكيد اكيد فى مصر

    جميله اوى اوى يامان

    ايوه كده ارجع واشجينا

    خالص تحياتى


  6. ههههههههههههههههه

    علاء ازيك

    اه مبروك عليا اول تعليق

    لالالالالالالالالالالا

    مافيش اى ملاحظات كفايه كده ههههههههههه


  7. طيب اوك عموما انا صلحتها ومتشكرييييين
    انتى مختفيه فين بقالك يومين ؟!!!


  8. ارجع واشجيكوا :)))
    بس انا صوتى وحش اوى
    حتى اسمعى
    يا ليييييييييييييييييييييييييلى ياااااااااااااا عيييييييين :)))


  9. النت والله ياعلاء

    المهم اخبارك ايه

    لالالالالالالالالالا
    صوتك حلو مالكش دعوه


  10. هههههه يقطع النت ع النتوتى ع اللى بينتتوه
    طيب انتى مش اون لين ليه؟


  11. mrmr Says:

    عذرا
    لعدم التعليق
    فهذه دعوه خاصه
    http://jokes-egyptian.blogspot.com


  12. gogo!sf Says:

    حلوة اوى يا علاء

    على اد ما الحقيقه محزنه جدا

    على اد ما ضحكت على اللى كاره مراتو وحماتو اصلها اهم حاجه بصراحه

    بس على العموم

    هى دى مصر يا عبله

    وعمرها ما هتتغير ابدا

    الا فى حاله انى اكون رئيسه مراجيع العيد الكبير بعد عمراً طويل وعليك خير

    تسلم ايدك يا مان


  13. لكن تاريخنا
    يخلينا احنا
    نقول يا ندم


  14. ولانى من سكانها
    ابلغك اللى انت كتبته قليل جدا


  15. الله على الجمال


    وصفت كتير من معالمها


    حقا راقت لى مدونتك


    زر مدونتى ستروقك ايضا

    لانك ذو احساس مرهف