عايش... ولكن !!!!

أيها الشعب الجعان

مساء اللطافه

بكل الشفافه

اقدم اليك آخر بيان

تحب الكنافه

اجبلك كمان؟!



بصفتى مواطن صالح امين

وعايش حياتى برغم التخين

احب اقولك يادوب كلمتين



بحبك يا شعبى .. لانك جبان

وجبنك ده زاد كتير عن زمان

وحبه حبه .. وشويه كمان

تلاقى الشعوب اتقلبت فران

بحبك يا شعبى لانك جعان



بحبك يا شعبى .. لانك حريص

ووسط الزيطه .. دايما تهيص

تجمعك جماعه تلمك فى كيس

وتفرقك بسرعه عصاية بوليس

بحبك يا شعب يحب التهييس



بحبك يا شعب عايشها بمراره

بحبك وحبك زى لبانة سماره

تمضغ كأنك بتمضغ حجاره

بحبك لانك بختك مميل

ووسط فقرك تجبلك موبيل

غاوى تقلد كأنك لسه عيل



بحبك يا شعبى وبقولها بصراحه

بحبك لانك عايشها بسماحه

سايبها كأنك فاتحها سياحه

ولو قلنا كلمه تقلبها مناحه

اقولك بلاش وخدلك اسطباحه



صباح الصباح يا شعب القمار

صباح اللطافه صباح الهزار

مقضيها كرومبو ولعبة الحمار

احبك اقولك يا مصر عمااار



بحبك يا بلدى وغيرك مفيش

وأهلك وناسك ولو شعرهم كنيش

بحبك يا شعب يموت ع الحشيش

ولو خيرونى لغيرك اعيش

اموت لاجلك انته واقولك كمان

بحبك يا شعبى الفقير الجعان

مساء اللطافه

مساء الايافه

مساء الهيافه

يا شعبى الفقير الجبان
15 تعليقات
  1. ساسو Says:

    مساء الفل
    بجد مدونتك رقيقه جدا
    وبصراحه دمك زي العسل
    وأه والله معاك حق في كل كلمه
    هو دا بقي حال الدنيا
    انت قولت اللي جوه قلوبنا كلنا
    بجد يسلم قلمك الجميل

    دمت متألق


  2. جامدة جدااا

    وبتقولها من الاخر وصريحه اوي وواضحة جدا

    بس عارف احنا شعب بيتضحك عليه بكلمتين


  3. ساسو
    مساء العسل
    شكرا انتى ارق
    ربنا يخليكى ويارب دايما اقدر اقول اللى جوانا كلنا
    نورتينى


  4. كيارا
    ازيك يا كيتى اخبارك ايه
    ايوه بالظبط احنا شعب غلباااااااااااان


  5. ehabafndy Says:

    الظاهر كده إنك قريت كتاب شخصية مصر لجمال حمدان و لخصته فى كلمتين


  6. SAYED SAAD Says:

    وشعبك كمان بيحبك
    كون بخير


  7. SAYED SAAD Says:

    وشعبك كمان بيحبك
    كون بخير


  8. الله عليك

    حلوة اوى اوى بجد

    تجننننننننننننننننن


    بحبك يا شعبى .. لانك حريص

    ووسط الزيطه .. دايما تهيص

    تجمعك جماعه تلمك فى كيس

    وتفرقك بسرعه عصاية بوليس

    بحبك يا شعب يحب التهييس

    هههههههههههههههه دى سكر بجد

    وحقيقى جدا جدا كلامك

    اهو ده الهم اللى يضحك ويبكى

    مساءك سكر



  9. والله انا كمان بحبه


  10. اصحى يا نايم ووحد الدايم

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

    لمزيد من المعلومات

    http://dndanh111.blogspot.com/2010/06/blog-post_14.html

    جعله الله في ميزان حسناتكم .. آمين


  11. بغض النظر عن الحشيش والقمار
    الكلام جميل ودمه خفيف ..... وواقعى
    تسلم الايادى


  12. Rosie Says:

    أنا كنت عاملة ادور على اسم الشاعر اللى انت ناقل عنه و بعدين طلعت أنت اللى كاتبها..بجد حلوة أوى فوق الوصف بغض النظر أنها تودى أبو زعبل عدل..لكن حلوة و ربنا معاك...