عايش... ولكن !!!!
ايوه بالظبط كده احنا اللى عبينا الهوا فى قزايز واللى ما يشترى يتفرج كله قشطه وكلوا عادى اهم حاجه تقدر تجيب الفلوس منين؟!!!
حرام ... عادى حلال ... خير وبركه ضحك ع الدقون ... وماله اهم حاجه تقنع الزبون
طيب وتقنعه ازاى بقا
اقولك يا سيدى
ليا ابن اختى صغير هو يادوب بيتكلم كل ما يشوفنى يقولى " يا خالو عايز سفن اب صفيح من اللى بتلسع " شوفوا الواد وبجاحته مش بيطلب الحاجه الساقعه عاديه ده عايزها كانز كمان تناكه بقا طالع لخاله ههههههه المهم تخيلوا تأثير الاعلان ايه علينا احنا كمشاهدين علم الطفل الصغير ان السفن اب دى بتلسع وهى ولا بتلسع ولا حاجه فكرنى بنفسى لما كنت اشوف اى اعلان اجيب الحاجه بتاعته واستنى يحصلى زى ما بيحصل فى الاعلان
المهم نرجع لموضوعنا
كترت جدااا المسابقات اللى بتعبى الهوا فى قزايز بقا اليومين دول واتصل تكسب 5 الاف جنيه والالافات بتترمى ع الناس زى الرز وكأن السماء تمطر ذهبا شويه المفتش حولومبو وشويه عبد السميع الفظيع وتقلب على كل قناه تلاقى مسابقه شكل واتصل بالارقام دى تكسب 5 الاف جنيه والجنيه ينطح جنيه واتصل اكتر فرصتك فى الخساره اكتر واكتر وما شاء الله علينا شعب جميل جدااااا اول ما يسمع كده يا سلام ايه ده ايه يعنى كرت بعشره ولا 20 ولا حتى 50 اكسب 5000 يا بلاش واحمر على ابوه يا بطيخ
وطبعا انتشار المسابقات دى دليل على نجاحها فى لم الغله الكتير على قفا الشعب الفقير واحنا مبنضربش حد على ايده هما اللى بيتصلوا .
يا جماعه الفلوس مبتحسش بقيمتها الا لما تتعب فيها وبلاش نكدب على نفسنا ونقول اننا مش حابين ان كل واحد فينا يكسب 100000 جنيه مش 5000 بس ولكن مكسب بعرقك احسن من حاجه فى الهوا يا صابت يا 20 عور ولا ايه
ولو قلبت شويه كمان فى القنوات تلاقى بقا حبيبنا اللى مبيعرفش يجمع كلمتين على بعض نحنوح فرج يا سلام واحد ملوش فى اى حاجه ومش عارف ايه اللى خلاه معلق وبعديها يدخل سينما كمان لا بجد ده كتير ولا اعلانه بقا .... مقولكوش كمية الضحك اللى بضحكها لما بشوفه ..... هااااااااى بقولك انته ههههههه واتصلوا بيه علشان الرشاقه واللياقه علشان تعيشوا حياه سعيده ... يا شيخ صلى ع النبى
احنا بجد سعب طيب واقل حاجه بتقنعنا واقل حاجه تفرحنا واقل حاجه تبكينا واكتر حاجه اثبتتلى ده يوم وفاة حفيد الرئيس لقيت كم المعارضين للحكومه كان بتنزل دمعه من عينه على هذا الطفل الصغير صحيح احنا شعب طيب

وعلى رأى المثل
أكل فول و أخرج قفاي عرض و طول و لا آكل كباب ووقفة الديانة ورا الباب
36 تعليقات
  1. gogo!sf Says:

    ونقول اوووووووووول تعليق

    بعد عودت الاستاذ علاء

    حمد الله على السلامه يا باشا

    ومبروك التغير الجميل ده

    انا هروح اقرا وارجع تانى


  2. هههههههههههههههههههههههههه

    والله عندك حق بس تعرف انا بتخنق جدا من الحوارات دي لدرجه اني مش بطيق اتفرج خالص شغاله قناة فتافيت والشغل وسلامو عليكو


  3. nody Says:

    هوا ايه الى عبناه فى قزايز

    دا احنا دهناه دوكو ونقشنا عليه صوره حمبوزوا لاوى بوزوا


  4. Mo7ammed Says:

    "احنا بجد سعب طيب "

    هههههه
    حلوة سعب دى ياعمونا
    بس سيبك انت من البوست وكل حاجة

    جبت الكانز لأبن اختك ؟
    "سفن اب صفيح من اللى بتلسع"
    ههههههه
    فعلا شكله طالعلك ياعم

    وووومع اول زيارة..زى الفل ياجميل

    مع السلامة


  5. بجد اتحفتنا
    بيقولك مين سرق تكتك ام قويق
    دى بتلسع


  6. Sweet Violet Says:

    ههههههههههه

    حلو موووت المثل ده ^_^

    بس هو عموما مش الشعب المصرى بس اللى بيتصل على فكرة

    و الدليل على كده تلاقى الاول المسابقة كانت ارقام مصر و فجأة ارقام دول تانية تتضاف

    المشكلة بقى ان الكل بيقول ان ده نصب لكن بردو تلاقى ناس بتتصل

    اما موضوع شعب طيب صدقت فعلا احنا شعب العاطفة هى اللى بتحركه


  7. gogo!sf Says:

    يا سلام يا علاء والله بتقول حكم

    بس اول مرة اسمع المثل الغريب ده بجد

    بس انت عندك حق فعلاالشعب المصرى ده اطيب واهبل منه مافيش
    كل اما يشوف مسابقه يتصل والمصيبه ان مافيش حد بيكسب غيرهما هما من اتصالات الملايين على 0900

    وبعدين احنا لو بطلنا نتصل 0900

    مش هيلاقو حاجه يعملوها تكسبهم فلوس


    موضوع فعلا مهم جدا والمفروض ان الناس تسيطر على نفسها شويه فى موضوع الاتصال بالمسابقات دى

    ودلوقتى معانا جوجو وكسبت القناه مليون جنيه بسبب اتصلها المتكرر

    تحياتى لك علاء

    جوجو


  8. kmt Says:

    السلام عليكم ورحمة الله وبركاته

    باشمهندس علاء محمود

    شرفني مرورك بالمدونه

    اما بالنسبة للموضوع
    فأنا لسه معلقه عليه النهارده

    عارف
    عامل زي الموضه اللي طلعت ايام ماكان نظيف وزير الاتصالات

    الموضه بتاع زيرو تسعمية

    وبعدين انقرضت
    واذ فجاءة تلاقي كلالمصريين عباقرة في فنون الجرافيك

    فعلا
    عجبي

    تحياتي
    الى اللقاء


  9. ميرام Says:

    ههههه
    (:
    المرة دي انت ظلمت الاعلان
    (: عشان السفن الجديد بيلسع فعلا (:
    ههههههه
    بالنسبة للمسابقات
    بجد كنت بقعد اضحك واقول اكيد مفيش حد أهبل بيتصل لحد ماكنت عند واحدة صاحبتي ..
    وقاعدين بنتفرج على الاعلان بتاع mbc action الهامر
    ولقيتها بتقول ياخسارة كان عندي امل المرة دي
    (:
    (:
    طبعا اذبهليت وقلتلها أكسب !
    المره دي !
    يعني كان في مرات ..!!
    قالتلي انا مش بفوت ولا مسابقة ..
    (:(: ومرة كسبت من مزيكا كرت شحن
    انفجرت ضحك بجدددد
    وقلت
    رزق الهبل على المجانين
    (:


  10. عجبى
    على اللى بيتفننوا فى السرقه والنصب




    تحياتى


  11. dina Says:

    انا كنت لسا بفكر فى الموضوع دا....ان بتوع الدعاية و الاعلانات دول اخرهم فين...من حقهم يستغلوا فقر الشعب و احتياجه؟؟.....معتقدش بصراحة و فعلا الاعلانات تعملك من البحر طحينة اصلا و الواقع و السلعة اللى بيقدموها ولا ليها دعوة بالاعلان


  12. كل ده استغلال لمشاعر الناس ورغبتهم فى تحقيق اهم احلامهم وهى عدم الخوف من بكرة علاوة على ان مهما كان دخلك ما بقاش فيه حاجة بتكفى امام جنون الاسعار وارتفاعها الدائم
    بس طبعا كل ده عبط الحداية مابترميش كتاكيت
    شكرا ... ارجو قبول مرورى


  13. التمبلت خرافه هقرا وارجع


  14. والله ناقشت بوست كان نفسي اتكلم فيه اوي

    بجد وصلنا لدرجه رهيبه مش عارفه ليه بجد وصلنا لكدا

    حاجه تخنق بجد


  15. Bola 7elmi Says:

    احم احم ..
    اسمع بقى .. هقولك حاجه م الآخر كدا وعلى بلاطه .. أنا داخله على طمع .. يعني أنا ليا فـ اللي بيلسع دا .. وبحبو جدا .. و عاوزا زي بن اختك :|

    وعن قصة المسابقات .. بجد موضوع بقى بايخ أوووي وممل جدا .. ومستفز .

    والراجل بتاع هاااي بقولك انتي هااي بقولك انت << بكرهو جدا


    أول مرور ليا << نورتي بولا
    واحتمال كبير أوووي ميكونش الاخير .. منا قلتلك اللي فيها .. داخله على طمع أنا , وهاجي أشرب سفن آب :|



    سلامي ليك :)


  16. دي سياسة الهاء ولعب بمشاعر الناس ال بتتعلق بأي امل

    وعشان نركز مع ال بيلسع وننسي ال بيضرب ع القفا :D

    موضوع جمييل اوي وبطل تتحجج وجيب للولد سفن اب صفيح من ال بيلسع ههههه

    تحياتي ,,


  17. gogo!sf
    الله يسلم قلبك يا جوجو منوره والله
    تروحى وترجعى بالسلامه :)


  18. M.a.r.y.o.o.o.m
    قناة فتافيت :) والله كويس يبقى انتى مش تبعنا بقا اوعى تقلبى من ع القناه دى احسن تلاقى نحنوح فرج فى وشك وانتى بتقلبى ويقولك هاااااى انتى :))))


  19. nody
    هههه حمبوزو لاوى بوزو :)) دحنا بقينا عارفين شوية اسامى تششششششل


  20. m07ammed
    اتريق اتريق تصدق انى شوفتها وكسلت اغيرها قولت محدش هيدقق بس يلا حسبنا الله ونعم الوكيل :)
    طبعا جبته هو بيسكت من غيره


  21. صوت من مصر
    اللى سرق تكتك ام وقويق امممممم تلاقيها هيا ام وقويق اللى سرقته وبتضحك علينا


  22. sweet violet
    عجبك المثل اوى استنى هلفه واعتهولك هههههه
    مصرى بقا ولا عرب كلهم بيلبسوا العمم


  23. gogo!sf
    حكم مره واحده :)
    مهو انا بتاع الجديد
    هههههه ياسيدى يعنى انتى كان معاكى مليون جنيه طيب ما تسلفينى 10 جنيه هههه


  24. kmt
    وعليكم السلام ورحمة الله وبركاته
    ده شرف ليا انى ازور مدونتك
    هههه عندك حق المصريين دايما بتوع الجديد :)


  25. ميرام
    امال مش بتلسعنى ليه :)
    ههههه انا متأكد ان الشعب معظمه بيتصل والا مكنتش المسابقات انتشرت بالطريقه دى واكبر دليل صاحبتك :)


  26. لاسع افندى
    صحيح عجبى


  27. dina
    انا مش معاكى انا شايف انهم عندهم حق بيخرجوا المنتج بالشكل اللى يجذبك ليه وده فى حد ذاته نجاح ليهم لكن العيب على جهل الشعب


  28. راسيوتن
    صح لكن كل شىء بالعقل وزى ما قلت الحدايه مش بترمى كتاكيت


  29. كيارا
    الحمد لله انه عجبك ده بعد عناء اخترته


  30. كيارا
    معلش بقا سبقتك :)
    تقدرى تقولى جهل او طمع او الاتنين


  31. bola 7elmi
    يا سلام بس كده دانتى بنت بلدى يعنى احلى كانز بيلسع يجيلك :)
    اه اهم حاجه الاستاذ نحنوح فرج ده بيهلكنى من الضحك
    ان شاء الله مش هيكون مرورك الاخير


  32. قلب ارهقته الاحلام
    حلو الضرب ع القفا :)
    هههههه انتوا كلكوا طمعانين فى السفن اب بتاعة الواد :)


  33. gogo!sf Says:

    اولا انت اللى عطلطنى انى اكون تانى تعليق كمان ومش هعديهالك

    وبعدين انا كسبت القناه مش كسبت منها ربنا المنتقم الجبار

    سلام

    جوجو


  34. ههههههههههههههههه

    كلامك جامد وكله نفسي أقوله والله

    أسلوبك جميل

    ربنا يهدي أصحاب الإعلانات الي بوظوا زوق الناس في كل حاجه من أول الكلام والتفكير لحد الألوان حتى ولا حول ولا قوة إلا بالله

    بالتوفيق يا معلم :)