عايش... ولكن !!!!

تحديث
دعواتكوا لعمرو الليثى لانه عمل حادثه انهارده وهو بيصور اخر حلقه من برنامجه واحد من الناس وهو فى المستشفى ربنا يقومه بالسلامه
من اسبوعين كده لقيت الست الوالده بتصحينى .... قوم يابنى علشان تفطر المهم على ما قومت وقعدت بقا افرد فى ضهرى واصحصح وعلى ما اخدتلى دش فى السريع كده ملقيتش حد فى البيت .... قولت يلا يا فتاح يا عليم يا رزاق يا كريم يا ترا فى فطار ايه انهارده لفيت المطبخ وفتحت التلاجه وكالعاده لقيت الفطار بتاعى متحضر وربنا يباركلنا فى الحاجه بقا :) المهم خدت الفطار ولانى من هواة انى افطر وانا بتفرج ع التلفزيون فأخدت الريموت وقعدت اقلب وطبعا تلفزيوناتنا ما شاء الله عليها بقت حاجه تخنق متلاقيش حاجه تتفرج عليها تفتح نفسك ع الفطار كلها يا اما افلام تجبلك شلل نصفى وانت قاعد مكانك يا اما برامج كلها مشاكل والواحد اصلا اللى فيه مكفيه
المهم فى الاخر رسيت على برنامج واحد من الناس بتاع عمرو الليثى كان مستضيف تامر حسنى وده كان الجزء الاول
انا مش يعنى من مغرمى تامر ولا بكرهه يعنى فى العادى فى اغانى بحب اسمعهاله واغانى مبقبلهاش بس بعد البرنامج ده مبقتش اقبله هو شخصيا
ليه بقا ... اولا جابلى سدة نفس ع الاكل وخلانى معرفتش افطر كويس هما رغيفين بس اللى كلتهم :)
ثانيا بقا قطع شفايفه من كتر المصمصه ممثل بارع
ثالثا ورابعا بقا تسمعوا الحلقه يا سلام بجد مش ده تامر بتاع الصوره دى
ولا تامر بتاع دى


والحدق يفهم

خامسا بقا وركزوا معايا اوى وياريت تشوفوا الحلقه انا كنت بحاول احطلكوا الفديو ع اليو تيوب بس مش راضى الظاهر ان فى مشكله فالى عايز يشوفها يضغط هناااااااااااااااااا

الشيخ تامر كان بيقول ايه بقا بالحرف كده
" افتكر ان انا كنت قاعد مره فى الفصل وبقول يا رب انا حاسس ان انا هبقى حد مشهور بس عاوز او محتاج انى اتوجه " اصل هو تفل تفل يعنى وعمرو الليثى بيقوله انت طول عمرك تفل يا تموره
وقال ايه بقا " وانا قاعد فى الفصل لقيت المدرس داخل الفصل وقفل شباك الفصل ولقيت شعاع نور من الشمس داخل عليا انا بس......( مش بقولكوا شيخ ) قولت يارب فى رساله وصلانى بس يارب تكون صح " وقام المدرس ناقله من مكانه
شوف المزع بقا اللى على اصوله ال ايه لما الشيخ تامر اتنقل شعاع الشمس مسابهوش اصل بيقولوا ان تامر وشعاع الشمس اصدقاء منذ الصغر الشعاع لف وراه لغاية ما جه عليه قام بقا الشيخ تامر اتاكد انه هيبقى نجم الجير وتوته توته فرغت الحدوته طبعا ملتوته

ومش عايز اتكلم بقا عن اللى كان بيقوله فى الحلقه عن نشأته اللى كان ناقص يقول انه كان بيبيع فل فى الاشارات ومع ذلك كان بيلعب فى الزمالك والاهلى طيب ازاى .... عااااااااادى
وطبعا الحلقه مش هتعدى كده الا لما يتسأل عن السجن ايوه مهو رد سجون يقوم بقا الشيخ تامر يقول ايه بقا
ال ايه انه كان فاضله كام شهر على ما يعدى التلاتين ويسقط الجيش عنه فمكنش فى نيته انه يتهرب من الجيش طيب هو اللى يقرب من التلاتين ده مش متهرب؟ مهو اللى بيفضل فى الدراسه لحد سن 28 بيخرج يأضى جيشه وبعدين يرجع يعنى كده كده هربان ... ما علينا
اه على فكره تامر اول مطرب فى العالم يطلع له موقع ضده يعنى تامر برايفت فى كل حاجه
واول حاجه برايفت فيها ان نص اغانيه غريبه وقفتى تتنطتى و ببقى نفسى أأأه و اعتزرى واتاريها لاي حد وزغرطى يا منحرفه واخرهم خليها تاكلك والبقيه تأتى وسلملى ع الشعاع

مع حبى للاعلامى الرائع عمرو الليثى الا ان من يرى هذه الحلقه يجد انه يجامل تامر جداااا
وعلى رأى المثل
ابوك البصل و أمك التوم منين تجيك الريحة الحلوة ما مشئوم

65 تعليقات
  1. :)
    لا بركه بركه يعنى :)
    عامل ايه ياعلاء
    يارب تكون امتحاناتك بخير وانت تكون كويس
    التليفزيون ياعلاء نصيحه لو عايز تحافظ على ضغطك وصحتك بلاش تسمعه سوا برامج او افلام او اغانى او حتى شيوخ
    اما عن تامر فانا اصلا مش بحترمه وعن عمرو الليثى فانا بكرهه
    وسلام بقى وادعيلنا علشان مناقشه مشروعنا بكره :((


  2. Ramy Wasel Says:

    على رأى سعيد صالح
    احنا عندنا الاستعداد للانحراف
    بس عاوزين اللى يوجهنا

    بس اهم حاجه
    ان شعر صدره بخير
    غير كده مش مهم

    ربنا يرحمنا من الاشكال الزباله دى


  3. انا اتفرجت على الحلقه من الحاجات الى بتشلك
    انه بيقول انه عمل وعمل وعمل وعمل
    طب الى بيعمل خير مش بيقول


  4. Sweet Violet Says:

    انا مش اتفرجت على الحلقة
    لكن موت ضحك من كلامك
    وخصوصا موضوع الشعاع ^_^

    و كمان هو من الناس اللى ماشيين بدى نقرة و دى نقرة
    و التفسير حسب الاهواء بقى

    بس بجد خد نصيحة نور فعلا بلاش تتفرج على الحاجات دى افضل
    ^_^


  5. نور
    ههههه صحيح بركه
    اه الحمد لله تمام كله تحت المسطره :) الحرف تى هههه
    هحاول مشوفهوش
    يارب يوفقك يا نور


  6. ramy wasel
    ايوه عندنا الاستعداد للانحراف :)
    يارب ارحمنا


  7. صوت من مصر
    ايوه ياعم مهو عمل كتير اوى كان عال يمصمص فى شفايفه قطعهم مصمصه
    عادى بقا فى الزمن ده بقا بيقول


  8. Sweet Violet
    هههه امال بقا لو كنتى شفتى الحلقه والنعمه انا بقا جوايا احاسيس متضاربه حاسس انى هتنقط وفى نفس الوقت ميت من الضحك
    اهو هحاول اطبق نصيحه نور


  9. 7annen Says:

    انا جيت ارد الزياره البلوج بتاعك شكله حلو ومختلف

    والله يسلمك ياسيدى لما ارجع هتابع كل بوستاتك ان شاء الله

    ربنا يديم التواصل

    حنين


  10. smilyrose Says:

    السلام عليكم

    اول زيارة يا علاء

    الاقى الشيخ تامر

    يا لهوووووووووووووووى

    ايه البركات دى كلها

    والله يابنى احنا فعلا مش بنقدر

    قيمة الناس اللى معانا

    وعجبى عليك يازمن

    بقيت لكل من عمل وعمل

    ويارب رحماك

    المهم يارب تكون انجزت فى امتحاناتك يارب

    وربنا يتم شفاء عمرو على خير

    لانى من محبى قلمة الصادق

    وردشان

    روح الحب الصادق


  11. بقي رغفييييييين ونفسك اتسدد

    يالهوي ياني

    انت كنت ناوي تاكل مين مع الاكل عاااااااااااااا

    هههههههههههههههههههههه حلوه حكايه الشوعاااااااااااااااااااااااااع دا

    الراجل مبرووووووووووووووووووووووووك ياعمنا

    هكلمه يعملك حجاب يفك النحس ومش عارفه ايه

    ويجهزك ويجوزك

    ايه رايك

    مهو مبرووووووووووووووووووووك

    ربنا يشفي عمرو :)


  12. nody Says:

    اولا بالسبه ليك
    بقى انت بتصحى تلاقى الفطار متحضر

    يعنى احقد عليك دلوقت؟

    اما بالنسبه للحبسجى بتاع الختامه
    فاانا اعتقد ان شعاع الشمس الى دخل مخصوص ده دخل له كانوع من التطهير
    سفت انت المراتب لما الواحد يحطها فى الشمس علشان تنضف
    هو كده ماهو اكيد من زمان وهو بالمنظر النتن ده
    جاته القرف عليه وعلى المسهوكين معدومين التربيه الى بيتحدفوا عليه ويصوتوا علشان يحضنوه


  13. kmt Says:

    السلام عليكم ورحمة الله وبركاته

    ههههههههههههه
    شوفت الحلقة اكيد
    واستغربت لعمرو الليثي
    ولكن للناس فيما يعشقون مذاهب

    تحياتي
    الى اللقاء


  14. أبو كريم Says:

    ياد يالولو بطل فرجه على التليفزيون ياله بحاول اشوفلك حاجه تلهيك هنا وتجيب منها فلوس الضربه الاقتصاديه وانفلونزا الخنازير مدمره السياحه!!

    المهم يا معلم انا بقى شفت الحلقه وعمك تامر نبره صوته كانت واطيه خالص كانه عارف ان البنات بس الى بتتفرج عليه ..بس انته نسيت اهم جزء الأغنيه الى قال فيها فى واحد الناس عايزه تدمره بس بدعوه امة بيعدى" حاجه زى كده وعمرو الليثى مستمع اوى من الأخر انا حسيت انى هولع فالتليفزيون من الحسوكه


    أنا مش عارف أتغير
    حلقت شعرى قصير
    وبردك لسه بيقولو خنثى
    وحبسجى منه فيه

    كل ما اقول انا هبدأ
    وأبان زى عمرو بمبدأ
    عرق هيافتى بينقح تانى...ومش بس انا بصغر قوى


    وأرجع تانى وحاول تانى..وكل محاوله انا بفشل تانى
    أنا موكوس طول عمرى حقيقى...أنا نصاب هريب وحرامى


  15. ساعات بيضطر المذيع يجامل اللى قصداه لاسباب مجهولة او معروفة

    وتامر زيه زى اى مطرب او ممثل من الى فاكرين انهم عملوا كتير قوى وضحوا كتير قوى فى سبيل الفن


  16. ياسيدى متدقش
    ماكلا البلد كده
    والله اغلب الفنانين والرياضين والمشاهير منافقين
    والناس كمان بقت منافين
    انت مبتشوفش البت المحجبة اللى....
    ولا الراجل ابو دقن اللى......
    معظم الناس يقولوا حاجة ويعملوا حاجة تانية
    يعنى مش تامر خليها تاكلك بس
    البلد كلها كده
    ربنا يصلح حالنا كلنا
    انا اصلا مبقبلش الواده على فكرة


  17. زمن عيال صحيح
    لما واحد زي الواد ده يبقي نجم كبير بالشكل ده
    مش عارف علي ايه


  18. اول زياره ليه للمدونه الجميله جدا دي

    شكرا علي زيارتك ليه في المدونه
    وكل سنه وانت محقق احلامك ان شاء الله


    بس عايزه اعرف ايه اللي ودي شعاع الشمس عند هذا التامر


  19. gogo!sf Says:

    صباح الخير علاء

    ايه يا ابنى البوست الجامد ده

    احنا عرفنا قصتك قبل ما نعرف قصه الشيخ تامر

    بس بجد موتنى من الضحك فى الجزء اللى يخصكيعنى انت كسلان وبتاخد دشك على سريرك وبتفطر ادام ال TVوبتصد نفسك قبل الفطار اييييييييييييييييه ده فى ابه انت عايش مأساه مع التليفزيون



    بس على فكرة انا سمعت قصه تامر حسنى دى من زمان اوى ... وعاديه يا علاء كل ممثل او ممثله بيقولو كده والله اعلم اذا كان حقيقى ولا لاء

    بوست خفيف بجد

    تحياتى

    جوجو


  20. أنا حر Says:

    اكيد بهزر ده تمورة رمز الشباب المصري ابو قميص من غير زراير
    يا عزيزي تامر ده اتفه من انه يتكتب عنه كلمة واحدة لانه كذاب ومنافق ورد سجون واي حد بيسال مين دهعلشان كل الدوشة اللي حوليه دي؟
    تحياتي


  21. ahmed_k Says:

    يا علاء أنت مش واخد بالك شعاع الشمس ده نااااااااار
    هو الشعاع ده بركه لا أنتوا فاهمين غلط دي رساله له أنك حتعمل حاجه تخليك تتحرق لو ملحقتش نفسك مهما حاولت تتجنبها طول ماأنت في نفس السكه فالنار وراك وراك,
    وبعدين بخلاف موضوع الأهلي والزمالك وأنهم دليل كذبه في حد في الحاله الماديه الزفت دي وامه تفكرله يدخل الكونسرفتوار (والله كتبتها بالعافيه)
    فما بالك بدخولها
    يا عم سيبك الظاهر انه وعمرو الليثي كانوا في رحله وحبوا يسلوا نفسهم بس جات على دماغ المشاهدين

    وبركاتك يا شيخ تااامر يا جننننننن


  22. مصطفى ريان Says:

    بص انا معاك فى كلامك
    ماعادا حاجتين
    اولا الصورة التانية واضح انها تركيب
    ثانيا : مش معاك فى المثل الاخير مش معنى ان الاهل وحشين العيل يطلع وحش اوالعكس
    لك كل التحية

    ______________

    ملحوظة: لو اردت
    ان تشارك معنا ببعض الرباعيات او احدى القصائد فى مجلة ميكانو يمكنك ان ترسلها على الايميل الموجود فى المدونة
    تحياتى لك


  23. 7annen
    منتظر زيارتك لما ترجعى


  24. smilyrose
    وعليكم السلام
    يارب بس متكونش الاخيره
    اسعدنى مرورك


  25. كيارا
    نقى بقا اهو النق بتاعكوا ده اللى جايبنا لورا هههههه
    طبعا مبروووك مهو كان اسمه مبروك الاول وبقا اسمه تامر


  26. nody
    هو كلوا هيحقد ولا ايه مفيناش من كده اللى عاوز يفطر معايا يجى البيت فتوح :)
    حبسجى هههه هو ده احسن لفظ يتقال عليه تصدقى يا نودى ممكن يكون كده


  27. kmt
    وعليكم السلام ورحمة الله وبركاته
    كلنا استغربنا مش انتى لوحدك


  28. ابو كريم
    ياعم بهاء ربنا يكرم هيا شكلها اجازه فقر اصلا
    ايوه مهو اكيد لازم يمثل اصل عمر وسلمى علمه التمثيل
    حاسب ع التلفزيون اهم حاجه ده عليه اقساط ههههه


  29. ندا منير
    معتقدض ان فى مزيع بيبقى مضطر


  30. حلم بيعافر
    على رايك كل البلد كده
    وعلى فكره معظم الناس مش بتقبله


  31. خواطر ليست عابره
    على شعر صدره


  32. شمس النهار
    ان شاء الله تزورينى دايما
    كان بيعاكسه :)


  33. gogo!sf
    صباح الورد يا جوجو
    هههههه اهو بقا حبيت اعيشكوا معايا شويه يا جوجو والناس بتقر عليا يا جوجو شوفتى
    مش عاديه ولا حاجه اتفرجى ع البرنامج وانتى تفهمى


  34. انا حر
    على رايك بس اهو حبيت اخرج شويه من اللى جوايا احسن كنت هنفجر من الغيظ


  35. ahmed_k
    طول عمرك يا احمد ليك وجهة نظر غير الكل حلو التحليل ده :)))
    عادى اهو الكدب كان باين اوى عليه


  36. مصطفى ريان
    الصوره اعتقد انها مش تركيب وحتى لو تركيب احنا كلنا عارفينه مش الصوره اللى هتغيره
    اما بقا موضوع الاهل فدى قاعده وكل قاعده وليها شواز وبعدين كمان مش كل امثالنا الشعبيه صح فيها كتير غلط


  37. shemo Says:

    السلام عليكم........
    اول مرة ازور مدونتك بس مش حتبقى اخر مرة ان شاء الله........اسلوبك حلو .....الحلقة دى انا اتفرجت عليها والله كانت الدمعة حتفر من عنيا هههههههههههه عندك حق والله كنت متغاظى او ى من المصمصة الى هو كان عمال يمصمصها وهو اعد دى.........يلا ربنا يسهله ويجيلو اشعاع نور تانى يقوله انه حيدخل الجنة بالمرة ...........دومت بخير ........فى رعاية الله.
    shemo


  38. Hossam Says:

    Hello
    اول زيارة ليا
    انا اتفجرت عل الحلقة بس قمت من اولها عشان الموضوع معجبنيش لانى اساسا مبحبش تامر
    كلامك ممكن يكون صح وممكن يكون غلط وبالنسبة للمثل فان بعض الظن اثم
    تحية لك صديقى


  39. اول زيارة يا باشمهندس

    موضوعك جميل و الغريبه انا كنت فاكر نجم الجيل بتاعكم محبوب بينكم لكني فوجئت بشبه اجماع علي عدم حبه او اخذه قدوه


    بصراحه الحلقه مستفذه و ما سمعته حسبت انه مبروك و وولي من اولياء الله و مكشوف عنه البتاع

    تحياتي


  40. micheal Says:

    ألف سلامة علي عمرو الليثي
    عامة أنا لا بحب تامر ولا بكرهه..فقط بضحك علي أغانيه وكلماته العجيبة
    :)
    بس دلوقتي ضحكت أكتر علي حدونة الفصل والشعاع اللي دخله
    ربنا يوعد بشعاع احنا كمان
    تحياتي


  41. Angel Says:


    السلام عليكم ورحمة الله وبركاته

    أزيك يا علاء؟؟
    أتمنى تكون بخير.

    أولاً بتمنى تتقبل إعتذاري على طول الغياب
    ثانياً مبروك على الtemplate الجديد
    المدونة شكلها بقى حلو أوي

    ثالثاً بقى .. بالهنا والشفا بقى الفطار اللي تمور مش هناك عليه خالص
    (:

    الصراحة بعد اللي قولته عن اللي اتقال في الحلقة دي اللي الحمد لله إني مشوفتهاش

    أنت مخلتش ليا أي سبب إني اسمع له تاني (:
    وأنا أصلا بستظرفه من زمااااان
    كمان بقى شيخ يا عيني من زمان وقلبه حاسس

    يللا أنا مش هقول اكتر من كده دع الخلق للخالق
    (: (: (:

    أختك
    Angel Love



  42. mero-moory Says:

    السلام عليكم و رحمة الله وبركاته

    موضوع كامد جدا جدا وللأثف الثديد
    اتفرجت ع الحلقتين الفوظاعين له

    أولا ربنا يشفي الاستاذ عمرو الليثي ويعافيه ويقومه بالسلامه لأني من محبيه جدا
    واستغربت فعلا لموقفه من تامر في الحلقه والثكر اللي بيقوله عليه
    ناقص يقوله ماما نحله وجابت كمية عسل مغرق وملزق مصر اكتر من تلزيق الحر اللي احنا فيه

    عمال يقول اشتغلت اشتغلت ويحكي عن ابوه شويه موش ده برده اللي اول لما طلع قال ابويا رماني وقال وقال وفجاه بقى عنده بر بالوالدين انا موش ضده اطلاقا بس ضد اني لبس توب موش توبي
    اقول حاجه تخلي غيري يقول وربنا يالا انت ابن حلال واتمرمت كتير
    هستفيد ايه انا رجل بغني يبقى شايل رساله جيل بحاله واجيال هتتاثر بيها واديك قلت مثال للرسايل اللي بيقدمها

    رسايل مهمه بجد هههههههههه

    هم يبكي وهم يضحك انا جالي شلل خماسي من الحلقه ومن أم شفايفه اللي عمال يحمر فيها ما خلاص ياعم الروج موش هيروح

    لا وفعلا كله كوم والشعاع اللي قال عليه كوم تاني كان هاين عليا احط ايدي ع الشاشة واقول بركاتك يا سفيق :d

    يارب رحمتك الواحد اتخنق من اللي حواليه ومن اللي ابعد شويه

    وبطل طفاسه رغيفين يا علاء على اساس مسح زور بلا نيلة كان بان عليك الاكل
    :d
    في رعاية الله


  43. انا عن نفسي مش بطيقه اصلا

    هو ليه كام اغنية كويسة


    بس هو كأنسان مش بحترمه

    بالنسبة لعمرو الليثي بجد

    بحبه جدا جدا

    بيجيب حاجات قوية

    و ليه كارزمة جميلة جدا


  44. ههههههههههههههه هو البصل والتوم دول كانوا على الفطار ولاا جم كده
    مثل تحفه يصراحه

    والبوست ده تحفه تحفه بجد

    انا برضه تامر عادى يعنى مش فارقه قوى بس كلامك فى اغلبه صح

    بس شكله فطار الست الوالده كان معتبر عشان مخك يصحصح كده

    ربنا ما يحرمك منها ابدا
    ويباركلك فى عمرها


  45. ههههههههههههههههههههه
    هههههههههههههههههه

    بجد تامر دا توحفة اي نعم انا بحب بعض اغانيه لكن مش بطيق البنى آدم دا

    وخصوصا شعر صدره الي بيزلنا فيه وين ما يروح على ايه معرفش شكله كله على بعضه مقرف :]

    وكله كوووووم وحكاية الشعاع دا كوووووم تيب عاوز يكدب يقول حاجة معقولة مش شعاع :]ميكنش سوبر مان واحنا مش عارفيييين هههههههههههههههه

    اسلوبك يجنن والله متت من الضحك

    هتفرج عالحلقة بكره براحتي واتشل براحتي برضوا هههههههههههههه

    ربنا يسعدك


  46. لا دة حقت ... انت بتحقت على النجم
    (من حقد يعنى )
    دة الواد تقى وصالح ومن الأوليا
    دة كفايه بشهادتك نفسها انه والشعاع اصحاب من زمان

    والنبى مرارتنا بقت قد كدة ومحدش فينا ناقص سى زفت دة كمان
    وربنا يعوض عليك فى الفطار


  47. (Joudy) Says:

    أولا فى أول زيارة ليا أحب أقولك ميرسييييييي كتيييير انك نورتنى بتعليقك.

    ثانيا أحب أن أبدى اعجابى برباعياتك اللى نشرتها فى الحنب جميلة بجد

    ثالثا موضوع البوست بصراحة أنا مش متابعة لتامر حسنى بصراحة ومش بسمع ليه غير حاجات بسيطة جدا الهادى منها وله معنى بس وبالنسبة لكلامه هو أكيد كان بيحلم واحنا مش هناخد على حلم أو يمكن دى هواجس ماعلينا

    دمت بكل الخير والسعادة


  48. shemo
    ههههه انتى كنتى متغاظه انا جالى السكر والضغط من اللى كان بيقوله


  49. hossam
    احسن بردو حميت نفسك من الشلل الرباعى :))


  50. أحــوال الهـوي
    لا نجم جير ايه بس ومحبوب ايه كل سنه وانت طيب :))


  51. micheal
    الله يسلمك
    اضحك اضحك مهو اره كده بهلوان يضحكنا :))


  52. Angel
    وعليكم السلام ورحمة الله وبركاته
    يااااه ازيك والله ليكى وحشه
    انا تمام الحمد لله
    اخبارك انتى ايه؟
    الله يبارك فيكى عقبال مدونتك كده :)
    هههه معلش بقا عقدتك فى تمور هههه
    طيب عموما يارب تكونى منوره مدونتى دايما


  53. mero-moory
    وعليكم السلام ورحمة الله وبركاته
    ميروووووووو
    ههههه شلل خماسى ده جديد ده هههه
    معلش قدرنا بقا يا ميرو نعمل ايه
    وبطلى بقا هتسيحيلى فى وسط الناس ولا ايه هههه


  54. عمرو وجيه
    هو محدش بيحبه ولا ايه ؟!!!


  55. mahasen saber
    مش بقولكوا شكلكوا باصينلى فى الاكله اللى كلتها :))


  56. ঔ نـــوارة ঔღঔ
    هههههه ال تحفه ال
    خساره فيه
    بعد الشر عنك من الشلل يا نواره :))


  57. صفــــــاء
    هههه اه حقت اصل عنده شعرتين فى صدره زياده عنى هههههه


  58. (Joudy)
    شكرا ليكى يا جودى ويارب منورانى دايما
    دى شهادة نجاح للرباعيات
    يحلم بقا ولا يالف من عنده اعتقد ان البرنامج اللى كان يقصد بيه كسب المعجبين ظهره على حقيقته


  59. السلام عليكم
    الشيخ تامر والشيخ والشيخ بصراحه البلد كلها صارت شيوخ
    البقاء لله كان زمان الشيخ رمز الدين
    بص انا مش هاتحامل قوى على تامر لان سعات فيه كلمات بتعجبنى بس للاسف فيه كلمات تانيه بزيئه بتحط منه اهو دا باه المطرب الطالع نازل للاسف
    اسف مش مطرب يعنى نقول مش لاقى وصف للاسف
    كمان يعنى انسان غريب بصراحه انا مش عارف هويته ايه وياترى الموضه تربية شعر الصدر ويكون موازى لشعر الدقن
    ياباشا دا السجن ليه رحمه
    ياله سلام


  60. (Joudy) Says:

    هتقل عليك يا أستاذ علاء معلش هسألك عن التمبلت المشترك بنا لأنه تعبنى جدا وتعب أصحابى ان الكلام صغير جدا وبيتعب عنيهم أنا نفسى عينى تعبت منه فياريت تقولى أقدر أصلح المشكلة دى ازاى


    دمت بكل الخير


  61. يظهر إن شعاع الشمس ده اثر على تكوين جسمه وخلى العنكبوت النونو ينسج خيوط شعر صدره ودقنه وحواجبه اللى قرفنا بيهم ليل ونهار
    وقرفنا بيهم اكتر لما الشباب البيجى بيجى اللى بيروح وييجى بقى هو مثلهم الاعلى فى تربية الشعر ومحاولة تطويله
    كل ده كوم وهزة صدره كوم تانى والنبى اجدع من سهير زكى
    واللى يغيظ يا أخى إنى اول مرة الاقى واحد فارق شعر صدره
    -----------------------------
    وسمعنى سلام قوم اقف وإنت بتكلمنى
    ------------------------------
    مع تحياتنا / حازم وهانى


  62. shahrzad... Says:

    بجد بجد

    فعلا وعجبى

    انا هدخل اشوف الحلقة اللى تشل دى

    بس بجد خايفة اطلع منها معاقة

    ربنا يسهلله


  63. Nora 7wades Says:

    ههههههههههههههه
    نفاق ياابنى بعيد عنك
    هههههههههه