عايش... ولكن !!!!
" بحبك .... والله بحبك ... عارفه انا من يوم ما عرفتك وانا اتغيرت .... مبقتش اشرب سجاير ولا بعرف بنات ولا حتى بحط جل على شعرى ... صدقينى .." وفجأه علاااااااااااااااااااااااااااااااااااء ( بوم بوم بوم " ده رزع ع الباب " بوم بوم بوم ) قوم يالا علشان تفطر

عايز ايييييييه يا محمد(اخويا )... اتهد بقا وانت ما بتجيش فى وقتك ابدا
منك لله يا شيخ طيب سيبنى اكمل الحلم ده الواحد كان ماشى كويس وعمال يكدب وزى الفل
فطار ايه بس دلوقت الواحد لو كان كمل الحلم كأنه فطر بالظبط ... هو حد عارف الحلم كان هيخلص على ايه :)))

المهم بدأت اقوم ولسه بفرد ضهرى " آآآآآآخخخخ " لا متقلقوش بتتاوب بس وقولت اعمل التمطيعه الصباحيه
ايوه مهو دى هيا سر النشاط بتاع اليوم لو مااتعملتش هفضل طول اليوم مقلق كده واكيد فى حاجه وحشه هتحصلى
جيت اتمطع وبفرد دراعاتى كده ولسه هرجع لورا بقا ...
لالالالالالالالا دى مش تمطيعتى العاديه دى تمطيعتى وانا فى ابتدائى فى حاجه غلط استرها يارب
المهم نزلت علشان افطر
انا :-سلامو عليكوا صباح الفل يا حاجه ... صباح الفل يا بابا ...........
بابا وماما :- صباح النور يابنى اغسل وشك واقعد افطر
طيب
طسيت وشى بشوية ميه ولسه جاى اقعد " تتتررم انا بيييييييب تتتترتتم انا بييييييييييب "
بابا لماما .. عندك انابيب فاضيه يا ام بهاء
ماما:- ايوه طبعا والنبى يا علاء روح غيرها
انا :- طيب ...وانا عمال اقول فى بالى " انا من ساعة التمطيعه وانا عارف ان الصباح ده ازرق زى كالو الصباع "
انا :-هاتى يا حاجه الفلوس .... خد من ابوك
بابا :-هات يا بابا ... اصطبحنا وصبح الملك لله ع الصبح كده هات يا بابا
انا : - هو انا هاكلها دنا هغير الانبوبه بيهم ولو مش عايز بلاش :)
بابا :- 5 جنيه اهى يلا بس اوعى تجيبها منفسه
انا :- حاضر يابابا بس هى الانبوبه بتتغير ب5 جنيه
بابا :- روح بس يلا هى بخمسه جنيه
انا :- يارب قوينا ... ولفعت الانبوبه على كتفى ...." هيا الانابيب فين يا ام محمود "
ام محمود :- هناك عند عمك خالد بتاع الطعميه ... وعليها موووووت وضرب بالجزم
انا :- ربنا يسدها فى وشك يا ام حوده ... بتبشرينى
انا:- يادوب وصلت عند اول الشارع وشوفت المنظر .... وقفت وتنحت
ده ضرب بالجزم بجد يالهوى وبلغ وشباشب جلد كمان
المهم وصلت عند العربيه بتاعة الانابيب ولقيت خالتى واقفه هناك قومت رامى الانبوبه جنبها وقلتلها حافظى عليها زى ابنك خالد احسن حراميه الانابيب كتير الايام دى ولمى 8 معاكى ولمى منهم الفلوس بسرعه
وقمت شابط فى العربيه وطالع فوق جنب الراجل اللى بيوزع ... ورازعه سيجاره تمام ... وقلتله استنى شويه
انا :- بسسسسسسسس سكوووووووووووووت .... هناخد كل 10 انابيب مره واحده يعنى كل 10 يتجمعوا مع بعض ويلموا فلوسهم وهنخلص فى ثوانى النظام حلو يا جماعه
واحد معرفهوش :- نظام مين ياعم بلاش وجع دماغ
انا :- ورينى بقا هتاخد انابيب ازاى
محمد ( اللى بيوزع ):- ايوه اللى مش هيجمع 10 وبنظام مش هياخد انابيب

انا :- ( كنت عاوز اطلعله لسانى بس انا كنت فوق وكل عامة الشعب شايفنى ههه ) .... ها يا جماعه مين اللى جمع
.... طبعا اول واحده كانت خالتى مجمعه 10 انابيب وفلوسهم جاهزه وزى الفل هاتى يا خالتى 50 جنيه دول ؟
ماشى تمام ..... خد يا محمد هات 10 انابيب وانا هنزل استلم منك علشان الحريم دول
1-2-3-........-10 تمام يا محمد ... يلا ياخالتى وزعى الانابيب وسيبى انبوبتى معاكى دقيقتين بس
يلا يا جماعه اللى بعدو

انا :- اى خدمات يا محمد
محمد :- شكرا يا باشا مفيش واحده ال ام كمان
انا :- واحده ال ام ماشى يا حماده ... متغلاش عليك
يلا يا خالتى ارفعى معايا على كتفى .... يالهوىىىىى الحلم شكله تعب الواحد اوى :))))
خالتى :- بتقول ايه ....
انا :- لا مفيش يا خالتى عاوزه حاجه بقا انا همشى بقا احسن هيعملوا الفطار ومش لاقيين غاز .. سلام بقا
وانا فى طريقى للبيت ... ام محمود جارتنا شافتى
ام محمود :- ايه ده يا علاء انت جبت بسرعه كده ازاى
انا :- فى بالى ("ومن شر حاسد اذا حسد" يالهوى حتى فى دى قر وحسد)
مفيش يا ام محمود اصل اللى بيوزع كان زميل دراسه :))) ... سلامو عليكو

ولانى بكتب البوست ده وانا بنام .... يبقى على رأى المثل

مكتوب على ورق الخيار من سهر بالليل ينام بالنهار
49 تعليقات
  1. Desert cat Says:

    كل ده بسبب واحدة ال ام
    طيب طالما السر اتعرف كل 10 يجمعوا مع بعض ويجبوا له علبة مارلبوروا ويخلصوا فى الوقت القياسى ده
    كل حلم وانت طيب يا عيلاء


  2. على فكره بقى الموضوع اكبر من سيجاره ال ام
    كويس انها مع الغلب بتتغير بخمسه جنيه بس احنا عندنا وصلت رقم قياسى 35 جنيه
    صدق او لا تصدق !!


  3. ياد يالولو

    فضحت العائله فى البوست وطلعت أسرار شارع زهرة اللوتس بره منك لله

    بس شفت المهم انك طلعت بالأنبوبه بس قولى جبت الإل إم منين وانته على رأى الشاعر

    أراك خلى الجيب شيمتك الفقر
    أما للغنى سعى لديك ولا ذكر
    بلى انا مبسوط وعندى فكة
    ولكن دخلى لا يعاش به شهر

    حلو البوست يواد

    أخوك بهاء أبو كريم


  4. غير معرف Says:
    أزال أحد مشرفي المدونة هذا التعليق.

  5. Desert cat
    ساعات بتنفع السجاير دى والله
    انا نفسى مبعرفش ازاحم فى مواصلات الكليه بتاعتى بدى السايس سيجاره يكون مظبطلى احلى مكان فى العربيه :)
    وانتى طيبه
    نورتينى يا قطه :)


  6. نور
    عارف انها وصلت للأرقام دى يا نور
    بس هنا لسه بيشاوروا نفسهم يشتروا ولا لا
    نورتينى :)


  7. ابو كريم
    ايه يا بوب مفيش فضايح ولا حاجه ربنا ما يجيب فضايح
    ههههه ماشى ياعم الشاعر
    سلملى ع الواد كوكو


  8. هههههههه

    يالهوى عليك حكيت كله باتفصيل كده ينفع
    ههههههههه
    ربنا يسعدك يارب
    ويوفقك
    تحياتى
    ايناس


  9. ابتسامة ملاك
    ههه عادى بقا :)
    ربنا يسعدك انتى كمان
    نورتينى يا ايناس


  10. شوفت كل ده في ايه؟
    النظاااااااااااااام
    النظاااااااااااام ياااااا
    ولا بلاش
    تصبح علي خير بقي
    بوست خفيف
    وياريت كل حاجه في حياتنا تمشي بنظام كانت خلصت بسرعه
    تحياتي


  11. سمكه واحده
    ده اللى اقصده بالظبط
    النظاااااااااام
    وانتى من اهل الخير
    نورتينى


  12. ههههههههههههههه
    تصدق مكنتش فاهمة ايه ال ام دى اتاريها سيجارة

    البوست رهيبة بس مش متخيلة المنظر بيتهيالى لو حصل وفى مرة رحت اشترى حاجة فيها طابور من كسوفى واحراجى هفضل مستنية الناس لما تخلص الاول
    ههههههههههههههههههههههههههههههههههههههههههههههههههه
    يعنى مش هشترى حاجة


  13. star in the sky
    اى خدمه ادينى عرفتك حاجه جديده اهو :)
    لا اللى زيك كده مش هيخلص حاجه فى حياته هههه


  14. gogo!sf Says:

    علاء صباح الخير يا فقرى

    انت حكاياتك كده كلها مأساه

    بلاش افضل تحلم تانى عشان بس نكون مطمنين عليك اكتر والنبى

    قال اتغيرت قال وكمان بطلت تحط جيل يادى الموصيبه

    بس انت ازاى غيرت الانبوبه ب 5 جيه

    انا اعرف انها بأكتر من كده كتيييييييير اوى عدت بجد ال 30 جنيه

    ما علينا

    المهم انت فطرت بعد كل المأساه دى ولا لاء

    انا بخير وتمام الحمد لله

    جوجو


  15. و اضح الموهبه في طريقة السرد
    فانت تملك ادوات القاص الجميلة

    و لي بعض الملاحظات ولنا لقاء آخر

    تحياتي


  16. gogo!sf
    صباح الفل يا جوجو
    عادى بقا يا جوجو :)
    اجمل حاجه الاحلام دى هيا اللى بفرج عن الواحد:)
    اه فطرت طبعا مينفعش بعد كل ده ومفطرش :)
    يارب دايما تكونى بخير ومنورانى كده


  17. أحــوال الهـوي
    شكرا ليك على زوقك
    بس فين الملاحظات دى ؟؟؟؟
    عموما نورتنى


  18. ايه ده يا علاء
    اكيد الانبوبه ايامها كانت بعشره جنيه بس والوقت بـ 40 جنيه .. اصل انا ما اعرفش سعرها عشان عندى غاز طبيعى .. الحمد لله .. بس والله كان حلم كويس .. ابقى اتمطع زى الناس عشان الكوابيس دى ما تجيش لك تانى احسن المره الجايه والدك يطلب منك تجيب 10 ارغفه من المخبز

    تحياتى


  19. فشكوووول
    هههههه التمطيعه دى سر النشاط بجد
    لازم تمطيعه كده الصبح علشان اعرف اصلب طولى :)
    لا موضوع العيش ده مش هيحصل احسن بيجيلنا العيش يوم ويوم :)
    نورتنى


  20. enjy Says:

    ايه يا عيلاء الهسس دة؟؟؟؟؟؟

    دة اكيد كان حلم جامد جدااااااا

    حلم اكشن


  21. Lyssandra Says:

    :)))

    من زمان ماضحكتش كده :)

    بس بجد حلو النظام
    من غير ضرب ولا خناقات

    ...

    تحياتي

    Lyssa


  22. يا بختك عرفت تجيب انبوبة احنا بقا بقالنا شهر واقفين فى الطابور
    بوست هايل
    تحياتى


  23. بردو النظام حلو يا بشر
    بس تعال هنا هي فين الانبوبه اللي ب5جنيه دي الانبوبه ببيرزه قفوله بتباع عندنا يا نجم
    تحياتى لك يا جميل ودمت بكل خير


  24. SAYED SAAD Says:

    مدونتك جميله وزيارتك لمدونتي اسعدتني
    اتمنى الدوام
    تعرف ان سعر الانبوبه اللي في الشركة بتتكلف ستين جنيه على الدوله وبتتباع مدعمة ب2.50 في الشركة وان سبب الازمة ديه اصحاب الافران ومزارع تربثية الطيور لأننا في الشتا وبيحتاجوا تدفئه علشان الطيور متموتش وبالتالي بسحبوا الانابيب من السوق علشان يوفروا في سعر التكلفة علي نفسهم
    وده السبب اللي خلي الناس تروح تملي اللي عنها والانبويه او الاثنين الاحتياطي
    المشكله مش حكومة صدقنى مش معني كده اني بيعجبني اللي بتعمله فينا بس المشكله ديه من ضمن مشاكل كتير بنقع فيها سببها ازمة النفوس والضمير اللي بقي مش موجود احنا اللي بنعمل في بعض كده
    تحياتي


  25. enjy
    اه يا انووج والله كان حلم جامد اوى :))


  26. lyssandra
    اى خدمه اديكى ضحكتى شويه اهو هاتى بقا ربع جنيه مخروم :)))
    طبعا احلى حاجه النظام
    نورتينى


  27. شفقه واحسان
    مش اى حد يا عم احسان :))
    شكرا ليك
    نورتنى


  28. mostafa rayan
    طبعا احلى حاجه النظام
    ياعم بطل قر بقا خمسه جنيه حلو اوى هيا اصلا المفروض تكون ب2.5
    نورتنى


  29. SAYED SAAD
    شكرا ليك انا اللى اتشرفت بزيارتك
    ان شاء الله
    ايوه عارف بس بردو الحكومه عليها دور
    وبعدين دحنا بنصدر الغاز لاسرائيل وبعدين نرجع نستورده من الجزائر
    مش عيب علينا ؟؟؟


  30. بجد يا علاء البوست روعة روعة

    و عودة جامدة جدااااااااا



    بس خد بالك المرات الجاية و اتمطع كويس




    دمت بخير


  31. Baskouta Says:

    حلوة اوي قصة الكفاح الانبوبية دي
    انا كمان كافحت في حكاية الانابيب بس كفاح على ادي
    كفاح بساكيتي
    يعني انى انزل الانبوبة الفاضية من الدور التاني للارضي طبعا سلمة سلمة وانى اطلع المليانة سلمة سلمة كمان
    ده اقصى كفاح اقدر عليه
    واقدر اقول وانا رافعة راسي انى في الكام يوم اللى فاتوا غيرت انبوبتين

    هههههههههههه
    تحياتي البسكوتية الكفاحية
    ميرسي لزيارتك مدونتي


  32. السلام عليكم

    كل المجهود ده علشان تجيب انبوبه

    الحمد لله إخواتى هما اللى بيتعبوا ربنا معاكم

    بجد توبيك دمه خفيف

    واسلوبه حلو

    ربنا يحفظك

    تقبل مرورى


  33. sookra Says:

    ههههههههههههههههههه
    بجد ضحكتنى طريقه سردك للاحداث
    هههههههههههههه
    انا اول زياره ليا هنا واكيد ان شاءالله موش تكون الاخيره
    شاطر والله برافو عليك
    (موش الاغنيه )
    عشان عرفت تنظم الناس وفكرت ونفذت بسرعه جدا
    شاطر بجد


  34. sal Says:

    والله التدوينه هايلة
    وانا متهيألى حتيجى اجيال بعدنا
    ويقروها عشان يعرفو طبيعة حياتنا
    وشكلها ايه ...يعنى زى ما نقرأ احنا تاريخ المقريزى
    تحياتى 


  35. Tamer Nabil Says:

    ازيك علاء اخبارك اية

    حمد الله على السلامة

    احلام جميلة

    وبعدين داخلين على عيد الحب غير احلامك شوى هههه

    ربنا يوفقك ويكرمك


    مع خالص تحياتى


  36. اللهم لا اعتراض!!!!!! انا عمري ما تخيلت حد جاب صوت التمطيعة ^_^

    ما شافكش اسماعيل ياسين كان احتاجك معاه في الفيلم لماكان محتار يكتب صوت الـ...... مش عارفة اوصفه
    ياللا ما علينا

    انا اول مر اعتـّب هنا.. وبجد انشكحت كده لأ وضحكت كمان شوف الصدفة ام شاء الله

    تسلم ايدك وابقى تعالى عندنا وانا هاجي كمان.... ان شالله يا رب

    سلامو عليكووووووووو زي اسماعيل ياسين
    ^_^


  37. اخي عايش ولكن
    شكرا وبارك الله فيك واسعدني مرورك
    تحياتي والسلام ولا سلام مع الصهاينة


  38. Soul.o0o.Whisper
    ربنا يكرمك
    حاضر بس لو فى مره جايه :))
    نورتنى


  39. baskouta
    ايه رأيك الفها :))))
    ههههههه حلو الكفاح البساكيتى ده
    انبوبتين
    لا بجد تعبتى
    نورتينى


  40. حلمى البعيد
    وعليكم السلام
    ايون بالظبط كل ده علشان انبوبه
    شكرا ليكى يا مونى
    نورتينى


  41. sookra
    يلا اى خدمه هاتى ربع جنيه مخروم بقا حق الضحك ده :))
    شكرا ليكى
    نورتينى


  42. sal
    شكرا ليكى
    طبعا يقروا ويتريقوا علينا بقا هههههه
    نورتينى


  43. tamer nabil
    الحمد لله يا تامر
    الله يسلمك
    اهو بحاول والله يا تامر قول يارب :))
    نورتنى


  44. أحسن تـستاهـل
    مهو احنا بتوع الجديد بقا
    ههههههه ياريت كان شافنى مكنش ده بقا حالى
    كويس انك انشكحتى وضحكتى
    خلاص كلنا هنيجى ونروح بقا وهتبقى خلطبيته
    حد فاهم حاجه؟!!!
    وعليكووووووو والسلااااام


  45. Beram ElMasry
    صهاينة مين ياعم بيرم
    صلى ع النبى
    انت فى مدونه محترمه يا خال :)))


  46. بجد البوست بتاعك ضحكنى جدا دمك زى العسل
    وعموما تحيه من ال اماوى الى كل الال اموايه بس ازرق ولا ابيض؟؟
    الناس كلها ما اخدتش بالها م الحلم
    ياريت تبقى تكمله وتبقى تقولى عليه
    تحياتى


  47. SAYED SAAD Says:

    عايش ولكن
    معلومة بسيطة
    الغاز اللي بنحتاجة للأنبوبة اسمة غاز سائل وده مختلف عن الغاز اللي بنصدرة نوع تاني يعني
    كون بخير