عايش... ولكن !!!!
وانا خارج امبارح كعادتى علشان اقضى سهرتى بره مع اصحابى قابلت ابن خالتى ودار بينا حوار صغير كده
ابن خالتى:- ازيك يا هندسه
انا :- اهو عادى يعنى ماشى الحال... انت رايح فين كده؟
ابن خالتى :- انا رايح الصيدليه شويه كده وهبقا اجيلكوا
انا:- طيب قشطه ابقا كلمنى بقا علشان تعرف احنا فين....... امال انت كنت جاى كده حاطط الهاند فرى فى ودنك كده شكلك مزاجك رايق اوى
ابن خالتى :- لا والله عادى يعنى بس واحد مزاجه اروق منى لقيته باعتلى اغنيه جديده مش عارف بتاعة مين بس ايه مقولكش كلمات ايه بقا لا تقولى اللى انت بتكتبه ولا الكلام الفارغ ده
انا:-طيب قشطه ابعتهالى
وقعد يبعتهالى لغاية ما وصلت النادى ومشى هو وانا دخلت النادى... المهم انى مكنتش لسه سمعتها

دخلت النادى.. وجرى ع البوفيه .... مساء الفل ياعم صلاح القهوه بتاعتى والنبى وهتهالى بره فى الهوا
المهم طلعت بره وقولت اسمع الاغنيه لقيت الكلمات ايه بقا
***************
بتحبنى ... لا اشك .... مين دول اللى ع الفيس بوك
لو مشيلتيش العيال دى ... عليك هسك

واناااااااا ... انا مش خروووونج
انا كينج كونج
دنا وانا رابط ايدى
بلعب بينج بونج

مش ابن هانم ولا ابن لورد
اتفضلى هاتى الباس ورد
دنا ارجوز متربى فى سيرك
مش عيل كاورك
******************
شوفتوا الكلمات وصلت لفين بقا

المهم طبعا مسيبتهاش كده قعدت اسمعها لاصحابى وميتين ضحك عليها
ومره واحده سمعنا رزعة من ورانا .... " قفله ع الدش "
وبعدين شوية هيصه
فبسأل واحد صاحبى ... هو المدرسه اللى ورانا دى مسكونه وكمان الجن بتاعها مزاجو رايق قوى انه يلعب "ضمنو " وبيعمل كمان قفله ع الدش :)
قالى لا ده العادى مدرسين اخر زمن
قولتله نعم ؟!!! هيا المدارس بقت بتشتغل بعد العشا ولا ايه ... دى الساعه دلوقت 9ونص
قالى يابنى دول مدرسين مدرسة الاعدادى بيجوا هنا يسلوا وقتهم وكل واحد جايب النشاط بتاعه معاه
يعنى اللى بيلعب ضمنو جايب الضمنو والطربيزه معاه واللى بيحب الطاوله جايبها معاه واللى بقا غاوز دش اهو عنده غرفة الوسائط يخش يتفرج بقا براحته واللى غاوز كمبيوتر وجيمز اهو عنده بردو يعنى
ومنها بردو عمك عبده فراش المدرسه بيجى يسرفس عليهم وياخدله قرشين بردو

قولتله ... ودول بيمشوا الساعه كام بقا
قالى يعنى على 12 كده

قولت يا سلام هما دول المدرسين بجد .... انا خلاص نويت انقل نشاطى من هندسه للتدريس :)
قولت استنى بقا اتأكد من الحوار ده
طلعت وقفت بره الساعه 12 لقيتهم خارجين ومنهم مدرس معرفه اوى يعنى
روحت سلمت عليه ... وازيك يا استاذ متولى اخبارك ايه
الاستاذ متولى :- اهو تمام زى مانت شايف لسه مبهدل الاستاذ خالد 4 عشرات ضمنو ومغلبنيش غير واحده بس :)
انا :- اه انت هتعرفنى انت طول عمرك حريف ضمنو ... بس مش احرف منى :)
وقعدنا ندردش شويه لغاية ما خلعت منهم وروحت لاصحابى وكملت سهرتى بس بجد انا كنت فطسان ضحك ع الموضوع ده

مدرسه بالنهار وياريت بقا فى تعليم
وبالليل بتتقلب كافيتريا وغرزه للمدرسين
شىء جميل اوىىىىىى

وعلى رأى المثل
اقطع راس الكلب و ارميها و اللى فيه خصلة ما يخليها
16 تعليقات
  1. والله اعنية جاااامدة اخر حاجة ههههههههههههه

    والمدرسة دى اللى تحفة اووى عارفة ان التعليم بايظ وحالته صعبة وعاوز حد يساعده بس مش للدرجة دى

    يلا اللى يعيش ياما يشوف وكويس ان الطلبة نفسهم مبيجوش يسهروا


  2. يا علاء هو عمك صلاح لسه ماسك الكافتيريا بتاع النادى؟

    الراجل ده عليه قهوه وشاى إدمان

    طبعا المدرسه الى ورا النادى هى الإعدادى...عمار يا بلدنا

    بقولك إيه ..إيه أخرة الحوار بتاع الكتاب طمنى


    على فكره أنا نازل قريب عشان الشغل مش جايب همه


    سلام ياد يالولو

    أخوك أبوكريم


  3. هههههههههههههه

    جامده الأغنيه دى يا سلام هى دى الأغانى

    مش بتاعة زمان دى

    ومالهم المدرسين متغلطش دول ولاد كارى برده

    ولا إغلط أنا أصلا دخلت تربيه غلط

    تحياتى


  4. MaNoOoSh Says:

    الاغنية توووووووووووحفة

    والمدرسين الحقيقة
    (لا تعليق)


  5. nody Says:

    هو الهندسه ماله ومال المدرسين

    كده نزعل بجد

    الناس بترفه عن نفسويتها

    ماهو الى ايده فى الميه مش زى الى ايده فى النار

    حد يتحمل غباوه وتناحه تلامذه اليومين دول ياناس؟


  6. للاسف دا بقى حال اغلب الشعب المصرى


  7. star in the sky
    هههه انا بردو بقول انها جامده
    لا الطلبه بيسهروا فى اماكن تانيه :)
    نورتنى


  8. ابو كريم
    اه ياعم منا لازم اروح اخد فنجان القهوه بتاعه ... بيعمله ايه من الاخر
    ايوه مدرسة الاعدادى
    اه حوار الكتاب رايح كمان ساعتين القاهره علشان اشوف ايه الجديد
    سلام يا بوب


  9. حلمى البعيد
    هههههه معلش بقا انا بتكلم ع اللى شايفه وبعدين عادى يعنى مش كل المدرسين كده
    نورتنيى


  10. MaNoOoSh
    كل دى توووووووحفه :)
    نورتينى


  11. nody
    ههه ايوه بترفه عن نفسويتها
    هو صحيح العيال بتوع اليومين دول تنحه وبلطجيه بس يعنى المفروض ان الناس دى تتأقلم مع الواقع :) شكلك كده يا نودى مدرسه ههه
    نورتينى


  12. ندا منير
    عندك حق
    نورتينى


  13. عابرة Says:

    الاغنية جميلة جدا
    وثانيا المدرسين اروع بيسهر للساعه 12 بالليل والصبح عاملين حالهم بيدرسوا
    زي ما قلت مدرسين اخر زمن
    بس مش حنقدر نعمل حاجه للوضع ده


  14. Tarkieb Says:

    طب وربنا أغنية مودرن وحلوة بس انت ما اتكلمتش على اللحن هههههههه.. اما المدرسين فاكيد المدرسة ارخص من القهوة.. أنت بقى لو ربنا بيحبك تتصاحب على مدرس منهم في الاجازة أوقر من القهوة تروح معاة